ညံင်သ္ဂောံဒှ်ညးစၞးမၞုံကဵုင်ုဟ်မး မ္ဒးဂစာန်ရေင်တၠုင်သွက်ညးဍုင်ကွာန်အံက်သာ (ရာမညဌာနဳ)

ပေါဲရုဲမာဲ နူကဵုက္ဍိုပ်သကိုပ် (ကဝ်မယှေန်ပၞာန်) တအ် မကၠောန်ဗဒှ်ဂှ် လုပ်သၞောဝ်ဟီုဟီု ဟွံလုပ်သၞောဝ်ဟီုဟီု ဂၠးတိပသမ္တီကီုဒှ် ဟွံပသမ္တီကီုဒှ် ကိတ်ညဳကဵုသၞောတ်ဒဳမဵုကရေဇြဳကီုဒှ် ဟွံကိတ်ညဳကီုဒှ် ပေါဲရုဲမာဲဂှ် ကၠောန်ဗဒှ်အာစိုပ်ဒတုဲအာတုဲရ။ ညးစၞးအမာတ်ကၠတ်ထဝ်လေဝ် ညးဍုင်ကွာန်တအ် ဒးစိုတ်ကီုဒှ် ဟွံဒးစိုတ်ကီုဒှ် ဗီုက္ဍိုပ်သကိုပ် (ကဝ်မယှေန်ပၞာန်) တအ် နွံပၟိက်ဂှ် မံက်ပြာကတ်ကၠုင်တုဲရ။ ညးက္ဍိုက်ပ်ရုင်ကၠတ်ထဝ် ဥက္ကဌကၠတ်ထဝ် ဒုတိယဥက္ကဌကၠတ်ထဝ်လေဝ် သာ်ဂှ်ကီုရ ညးစၞးတအ် ဒးစိုတ်ကီုဒှ် ဟွံဒးစိုတ်ကီုဒှ် အတိုင်ပၟိက်ဆန္ဒ (ကဝ်မယှေန်ပၞာန်) တအ်ကေတ်ဂှ် ရုဲစှ်တုဲဒှ်အာရ။ ဟီုအဓိပ္ပါဲကၠးကၠးမ္ဂး ဂၠုင်က္ၜင် (ပရေင်ဍုင်ကွာန်) ဏအ် ညးဂှ် မိက်ဂွံဍိုက်မ္ဂးဍိုက် ဟွံမိက်ဍိုက်မ္ဂးလ္ပဍိုက် ဂၠုင်က္ၜင် (ပရေင်ဍုင်ကွာန်) ဂှ် စတိတ်နူသင်ရ။

ပ္ဍဲဂၠုင်က္ၜင် (ပရေင်ဍုင်ကွာန်) ဂှ် ညးစၞးကၠတ်ထဝ် မကၠုင်နူဗော်ညဳသၟဟ်မန်တအ်လေဝ် ပါဗက်အာ (၁၇) တၠကီုရ။ ညးစၞးအမာတ်မန်တအ်လေဝ် ညံင်ရဴသာ်ဂှ်ကီု ညးဍုင်ကွာန်ကောန်ဂကူမန်တအ် ဒးစိုတ်ကီုဒှ် ဟွံဒးစိုတ်ကီုဒှ် က္ဍိုပ်သကိုပ် (ကဝ်မယှေန်ပၞာန်) တအ် သ္ပကဵုသမ္တီတုဲ ဍိုက်ဗက်အာဂၠုင်က္ၜင် (ပရေင်ဍုင်ကွာန်) တအ်ဂှ်တုဲရ။ အဓိပ္ပါဲဍေံဂှ် ညးဍုင်ကွာန်ဂကူမန်တအ် ထံက်ဂလာန် ဟွံထံက်ဂလာန်ဂှ် အဓိကဟွံသေင် ဗွဲတၟေင် ကမၠောန်ညးတအ် ညံင်သ္ဂောံဒှ်ဒတုဲဖဵုသွက်ဂကူမန်ဂှ် ညးတအ်ရုန်ဂစာန် ကၠောန်အာကဵုရောင်ဂှ် ညးတအ်ဒုင်လဝ်ကတိပါင် ကုညးဍုင်ကွာန်ကောန်ဂကူမန်တအ်ရ။

ဒှ်အမာတ်တုဲ အတိုင်ဝတ် ကေုာံ တာလျိုင် ညးစၞးကၠတ်ထဝ် သၞောတ်ဒဳမဵုကရေဇြဳစှ်ေစှ်ေ ယဝ်ခါရကၠောန်အာမ္ဂး ဒှ်ဂုဏ်ဖဵုသွက်ညးဍုင်ကွာန်တအ် ချိုတ်ပၠိုတ်ရ။ သာ်ဂှ်ဟွံသေင် ဟွံကွာ်ဗက်သၞောတ်ဒဳမဵုကရေဇြဳဍာံဍာံတုဲ ကွာ်ဍံင်ဗက်အာ အတိုင်ဂၠံင်တရဴ ပၟိက်ဆန္ဒတၠအဝဵုပၞာန်တအ်မ္ဂး ဂွံဒှ်ဂုဏ်ဖဵုသွက်ညးဍုင်ကွာန်တအ်ဂှ် အောန်ရောင်ညာတ်ရ။ ဒ္ဂေတ်ဝတ် ကေုာံ တာလျိုင် ညးစၞးကၠတ်ထဝ်တအ်ဂှ် ပၟိက်ဇၞော်တဴရ။ မုဟိုတ်ရောဟီုမ္ဂး စပ်ကဵုညးစၞးကၠတ်ထဝ်တအ်ဂှ် နွံမံင်ကဵု ဥပဒေ၊ နဲဥပဒေ၊ အမိင် ကေုာံ တင်စၞောန်ပညုင်တအ်ရ။ ၜိုန်ရနွံမံင်သာ်ဂှ်ကီုလေဝ် ဒ္ဂေတ်ဝတ် (စရိတ္တ) ဟီုဂှ်လေဝ် နွံပၟိက်မံင်ရ။ ပ္ဍဲဍုင်ပိုယ်ကီု၊ ပ္ဍဲဂၠးကဝ်ကီု ဂကောံအလုံအိုတ်သီုဂှ် နွံကဵု ဒ္ဂေတ်ဝတ် (စရိတ္တ) အိုတ်ရ။ ပ္ဍဲကိစ္စလ္ၚဵုတအ်ဂှ် ၜိုန်ရဟွံဂွံပလဝ်ဒတန် နကဵုဥပဒေ၊ နဲဥပဒေကီုလေဝ် နကဵု ဒ္ဂေတ်ဝတ် (စရိတ္တ) ဂှ် ဒးဒ္ဂေတ်ဗက်အာ တာလျိုင်နွံမံင်ရ။

ဒ္ဂေတ်ဝတ် (စရိတ္တ) ဂှ် ၜိုန်ရဟွံဂွံပလဝ်ဒတန် နကဵုဥပဒေကီုလေဝ်၊ ယဝ်ရဒ္ဂေတ်ဗက်အာ အတိုင်ဒ္ဂေတ်ဝတ် (စရိတ္တ) တအ်မ္ဂး သွက်ဂကောံဇကု ကလိဂွံဓဝ်ပတှေ် နူညးဍုင်ကွာန်တုဲ လတူညးစၞးကၠတ်ထဝ် (အမာတ်) တအ်လေဝ် ဓဝ်ပတှေ်ညးဍုင်ကွာန်တအ် သၠုင်တိုန်အာ တၟာဂလိုင်ရ။ ဓဝ်ပတှေ်ညးဍုင်ကွာန်တအ် သၠုင်တိုန်အာမ္ဂး ပ္ဍဲဍုင်ပိုယ်ဏအ် သၞောတ်ဒဳမဵုကရေဇြဳဂှ် ခိုင်ကၠိုက်ဗိုန်ဗတ်တိုန်အာမာန်ရ။ ဟိုတ်ဂှ်ရ သွက်ညးစၞးကၠတ်ထဝ် (အမာတ်) တအ်ဂှ် ဒ္ဂေတ်ဝတ် (စရိတ္တ) ဂှ် နကဵုသၞောဝ်ဥပဒေ ၜိုန်ရသ္ပလဝ်ဒတန်ဟွံမွဲကီုလေဝ် ပ္ဍဲဂကောံဇကု ဒးဓဇက်ချူခၞံဗဒှ်ကေတ်ရ။

ညးစၞးကၠတ်ထဝ် (အမာတ်) တအ်ဂှ် တာလျိုင်ကေင်ကာအဓိက နွံ (၃) သာ်ရ။ တာလျိုင်တအ် မုရောဟီုမ္ဂး ပထမဂှ် – ပွမပခၞံဥပဒေတၟိ၊ ပွမလေဝ်ပလေတ်ဥပဒေဂမၠိုင်၊ ပွမထပ်ဗပင်စုတ်၊ ပွမပဒတန်ဥပဒေစပ်ကဵု (ဗေတ်ဂျေတ်) အစဳအဇန်ကမၠောန် ကိစ္စဇၞော်သွက်ဍုင်ဗွဲမဂၠိုင်တအ်ဂှ် ဒးရေင်တၠုင်ကၠောန်အာရ။

ဒုတိယဂှ် ဒှ်ပွမမင်မွဲထိင်ကြာပ်ရ။ တာလျိုင်မင်မွဲထိင်ဒဝ် ဂတးဂတန် အကြာသွာင် (၃) သွာင်ဂှ်လေဝ် ဒးယိုက်ဂၠေင်မင်မွဲထိင်ကြာပ်အာရ။ တတိယဂှ် ပွမယိုက်ဂၠေင်တာလျိုင် သွက်ညးဍုင်ကွာန် ညးမကဵုလဝ်ဆန္ဒမာဲတအ်ရ။ အခိင်ကာလမယိုက်ဂၠေင်မံင် တာလျိုင်ကေင်ကာ သွက်ညးဍုင်ကွာန်တအ်ဂှ်မ္ဂး နကဵုပွမရှေ်သှေ်ဒ္ဂေတ်ဗက် ဒ္ဂေတ်ဝတ် (စရိတ္တ) ညးစၞးကၠတ်ထဝ်ဂှ်ဟေင် ဒှ်အထံက်အပင် ပ္ဍဲအရာမဒက်ပတန် ဍုင်ဖေတ်ဒရာဒဳမဵုကရေဇြဳရ။ တုဲပၠန် စပ်ကဵုပွမဒုင်လျိုင် မူသဇိုင်နွံမံင် (၁၀) တင်ရ။ ပွမဒုင်ကေတ်လျိုင်ဟီုဂှ် သွက်ညးစၞးကၠတ်ထဝ် (အမာတ်) တအ်မ္ဂး ကိစ္စဇၞော်မံင်တၟာဂလိုင်ရ။ ကမၠောန်ပရေင်ညးစၞးကၠတ်ထဝ်တအ် ရေင်တၠုင်မံင်သီုဖအိုတ်ဂှ် ဒးနွံကဵုတင်ဒုင်လျိုင်ရ။ ပွမနွံကဵု တင်ဒုင်လျိုင်သာ်ဏအ်ဂှ် ဒှ်မင်မွဲကဵု ဂုဏ်သိက္ခာ ကၠတ်ထဝ်မွဲသာ်ကီုရ။

တင် (၁) ဂှ် ဒှ်ပွမမံင်စံင်၊ ဒ္ဂေတ်ပွ၊ ပွမဟီုဂး ကေုာံ ပွမဗိုက်လတက်ကယျိုင်ရ။ တၞဟ်နဂွံဒှ်အာ ပရေင်ရှေ်သှေ် ကဆင်အလံင်ဇကုဂှ်တုဲ ဒးမံင်စံင်အာ ညံင်ဂွံကိတ်ညဳကဵု ဂုဏ်သိက္ခာရ။ တင် (၂) ဂှ် ပ္ဍဲကၠတ်ထဝ်မ္ဂး ပွမပတိုန်ဂလာန် (အဆို)၊ ပွမသၟာန်သၟုက်၊ ပွမချပ်ဂၞန်၊ ပွမကဵုမာဲတုဲ ဖျေံသၞောဝ်၊ ပ္ဍဲလၟေင်ကမၠောန် မရေင်တၠုင်မံင်တအ်ဏအ် သီုဖအိုတ်ဂှ် ညးစၞးကၠတ်ထဝ်တအ် ဒးနွံကဵုတင်ဒုင်လျိုင်ရ။ စိုတ်မိက်ဂွံယိုက်ဂၠေင် ဒုင်ကေတ်လျိုင်သာ်ဏအ်လေဝ် ဒးနွံရ၊ နွံလေဝ်ဒးနွံထေက်ရ။

တင် (၃) ဂှ် ပ္ဍဲအရာပွမသၟာန်သၟုက် ကေုာံ ပွမချပ်ဂၞန်ဂမၠိုင် ပ္ဍဲစၠတ်ထဝ်ဂှ် ဒးရေင်တၠုင်အာ ဗွဲမသအးဇ္ၚးတပ်တးရ။ ပွမမုသာ လှေံလှန်လီစၞာဲတအ်ဂှ် ဒးဝေင်ပါဲရ။

တင် (၄) ဂှ် စပ်ကဵုပွမရေင်တၠုင် ညးစၞးကၠတ်ထဝ် ပ္ဍဲစၠတ်ထဝ်တုဲ ပွမလှာဲဂတး နကဵုသဘဴဓဝ် မနွံကဵုင်ုဟ်မးဒှ်ဒှ်၊ ဟွံမွဲကဵုင်ုဟ်မးဒှ်ဒှ်၊ သဘဴမကဵုလာပ်ဗဇဴတအ်ဂှ် ဒးဒုင်တဲဟွံဂွံရ။

တင် (၅) ဂှ် ပွမကေတ်အခေါင်ရ။ ပ္ဍဲမကေတ်အခေါင်သာ်ဏအ်လေဝ် ဒးနွံကဵုပွမတပ်တးရ၊ သၞောတ်ဗ္ၜတ် ကေုာံ သၞောဝ်တအ်ဂှ် ဒးရပ်စပ်စကာဗၠေတ်ဗၠေတ်ဟွံဂွံရ။ ညံင်ဟွံဂွံဒှ် ဗီုပြင်ပွမကေတ်စအခေါင်အရာဂှ် မ္ဒးဝေင်ပါဲရ။

တင် (၆) ဂှ် ဒးစကာအာ အခိင် ကေုာံ ဒြဟတ်ကမၠောန် ပေင်ပေင်ကၠံတၟအ်ကၠံ (၁၀၀%) ရ။ ကမၠောန်မ္ၚး မဒှ်အန္တရာယ်ကဵု ပွမယိုက်ဂၠေင်တာလျိုင် ညးစၞးကၠတ်ထဝ်မွဲဂှ် ဒးဝေင်ပါဲရ။

တင် (၇) ဂှ် ပ္ဍဲဂကောံပရဟိတနာနာတအ်ဂှ် ညးစၞးကၠတ်ထဝ်တအ် ပါလုပ်ရေင်တၠုင်ဒးမာန်ရောင်။ ၜိုန်ဂှ်လေဝ် တာလျိုင်တမ်မူလဇကု ညံင်ဟွံဂွံယောင်ယာအာဂှ် ဒးမင်မွဲအာရ။

တင် (၈) ဂှ် ပ္ဍဲဒေသတိဍာ်ဆန္ဒမာဲဇကု ကာလဆဵုဂဗကဵု ညးဍုင်ကွာန် မကဵုလဝ်မာဲတအ်မ္ဂး ပရူမရေင်တၠုင်မံင် ပ္ဍဲကၠတ်ထဝ်ကီု၊ ပရူမရေင်တၠုင်မံင် သွက်ဒေသဂွံဇၞော်မောဝ်တအ်ဂှ်ကီု ဒးသောင်ကလး ဟီုတွဟ်ကဵုညးဍုင်ကွာန် ကောန်ဒေသဇကုရောင်။

တင် (၉) ဂှ် ဂလာန်ပတိုန်ထ္ၜး ကေုာံ တင်ကဵုကသပ် ညးဍုင်ကွာန်တအ်ဂှ် ဒးစၟတ်သမ္တီလဝ် ဗွဲမနွံကဵုသၞောတ်ရ။ တင်စၟတ်သမ္တီလဝ်တုဲတအ်ဂှ် ဒးဆက်ပတိုန်ထ္ၜးကဵု ဌာနမဆက်စပ်ကဵုတင်တအ်ဂှ်တုဲ တင်ကဵုကသပ်တအ်ဂှ် ဒးဆက်ပတိုန်ထ္ၜးအာကဵု ဂကောံမဆေင်စပ်တအ် နကဵုသၞောတ်စှ်ေစှ်ေရ။

တင်လက္ကရဴအိုတ် တင် (၁၀) ဂှ် စပ်ကဵုတင်ပတိုန်ထ္ၜး လိက်နူညးဍုင်ကွာန် ပလံင်ဗစိုပ်လဝ်တအ်ဂှ် ဂၠိုက်ဂၠာဲပတိုန်ထ္ၜး ဌာနအဆင်ဆင်တုဲ ပ္ဍဲအခိင်မကိတ်ညဳမ္ဂး ဒးကလေင်သောင်ကလးကဵု ညးဍုင်ကွာန်တအ်ပၠန်ရောင်။

သရောပ်ကၠေံမ္ဂး ညးစၞးကၠတ်ထဝ် (အမာတ်) တအ်ဂှ် ဗီုလဵုဒှ်ဒှ် ဇကုတိုန်ဍိုက်ကေတ်ဂၠုင်က္ၜင် (ပရေင်ဍုင်ကွာန်) နူကဝ်မယှေန်ပၞာန်တအ်တုဲရဒှ်တုဲ သွက်ဂွံဒှ်ဖဵုသွက်ညးဍုင်ကွာန် ကောန်ဂကူဇကုဂှ် ဆက်ယိုက်ဂၠေင် ကေတ်အာတာလျိုင် အတိုင်မရိုဟ်ရေင်လဝ် ဗွဲလတူတေံမာန်မ္ဂး ဒှ်ညးစၞး မၞုံကဵုသိက္ခာ နွံကဵုင်ုဟ်မး သွက်ညးဍုင်ကွာန်တအ်ရောင်ဂှ် ပတိုန်ထ္ၜးဏာရ။