ကမ္မတဳပံင်ကောံမန်ဍုင်သၟာင် (OMCC) ကေုာံ ဂကောံမန်ဍုင်သေံ (Thai-Mon Communities) ဂမၠိုင် မပါလုပ် ကမ္မတဳပရေင်ပညာမန် ဍုင်သေံ (Mon Education Committee) တအ်ဝွံ ရန်တၟအ်ကဵု ပရေင်ပံင်တောဲအာက္ဍိုပ်မွဲကရောံမွဲစွံ ဆေင်စပ်ကဵု ပရေင်ပညာတုဲ သွက်သ္ဂောံပံက်အာ တန်ဗ္တောန်သၠုင်ပတိုန်ဍာ်ဒကေဝ်ဗဟုသုတ သွက်သၟတ်မန်တအ်နွံရောင် ဂွံတီကေတ်ရ။
ကမ္မတဳပံင်ကောံမန်ဍုင်သၟာင်ကဵု ဂကောံမန်ဍုင်သေံတအ်ဝွံ ဂိတုမာတ် စၟတ်တ္ၚဲ (၂၂) ပပ္တံနူ (၃) နာဍဳတ္ၚဲစေင် စဵုကဵုစိုပ် (၅) နာဍဳဂှ် ကၠောန်သ္ပကၠုင်လဝ် ပေါဲဆဵုဂဗသဳကၠဳနွံတုဲ အပ္ဍဲကဵုဂှ်မ္ဂး သ္ပအဓိကကဵု ကဏ္ဍပရေင်ပညာသၟတ်မန်တအ်တုဲ သဳကၠဳကၠုင်လဝ်ရ။
နဒဒှ်တင်သ္ဂုတ်သွာတ်ပေါဲသဳကၠဳဂှ်မ္ဂး နူကဵုကမ္မတဳပံင်ကောံမန်ဍုင်သၟာင်တံ သ္ပသ္ကိုပ်သ္ကတုဲ သွက်သ္ဂောံပံက်အာ တန်ဗ္တောန်မဆေင်စပ်ကဵု ကွတ်ပညာ ပရေင်အာက္ဍိုပ် (leadership)၊ ပရေင်ကောပ်ကာဲ (Management)၊ ပရေင်ပိုန်ဒြပ် (Business)၊ ကွတ်ပညာဗဟုသုတ ဆေင်စပ်ကဵုအခေါင်အရာမၞိဟ် (Human Rights) ကေုာံ ဍာ်ဒကေဝ်ဗဟုသုတတၞဟ်တၞဟ်တအ် ပါလုပ်ရ။
တန်ဗ္တောန်ဝွံ ပံက်အာ ပ္ဍဲကဵုဌာနကွာန်ၜင်က္ဍဳ၊ ဍုင်ၜင်ကံက်တုဲ ညံင်သၟတ်မန်ဂမၠိုင် သ္ဂောံပါလုပ်တိုန်စိုပ်မာန်ဂှ် စဳဇန်ဒၟံင် သွက်သ္ဂောံပံက်အာ သီုလ္တူအန်လာင်လေဝ် နွံရောင်ဂှ် ညးကဵုကသပ် ကမ္မတဳပံင်ကောံမန်ဍုင်သၟာင် နာဲဨရာမာန် ဟီုလဴကုဌာန်ပရိုင်ဗၠးၜးမန် (IMNA) ရ။
“တန်ဗ္တောန်ဂှ်တှ်ေ ပိုဲပံက် ပ္ဍဲကဵုကွာန်မန်ၜင်က္ဍဳပ္ဍဲတေံရ။ ပ္ဍဲလိင်လဝ်ရုင်ပ္ဍဲဂှ်ရ။ ဨဂှ်တှ်ေ ပ္ဍဲကဵုဗဒမ်ပိုဲကဵုတန်ဗ္တောန် (Training) ဂှ်တှ်ေ လၟိဟ်ကွးဘာလုပ်ဂွံ ဟွံဂၠိုင်ပုဟ်။ ဂွံၜိုတ် (၁၂) တၠရ ပိုဲချပ်လဝ်။ ဆဂး ညံင်ဂွံဂၠိုင်နူဂှ်ပၠန်ဂှ် ပိုဲဒုင်တဲ လ္တူအန်လာင်လပှ်ကျာနွံဏောင် ဗီုဏံ ပိုဲချပ်စဳဇန်နွံမံင်” သာ်ဝွံ ဟီုသောင်ကလးလဝ်ရ။
ပရေင်ကိစ္စဓမံက်ရုပ်ရဴကမၠောန်ဂှ်ဝွံ ပြဟ်ပြဟ်ဏံ တံင်ဓဇက်ဖျေံဒၟံင် ဗီုပြင်ကမၠောန်ဖိုဟ်တုဲ အကြာသၞာံ (၂၀၂၆-၂၀၂၇) ဏံမ္ဂး ကမၠောန်မချပ်ဇန်လဝ်တံဂှ် ညံင်ဂွံဓမံက်ရုပ်ရဴမာန် ဂစာန်အာဒၟံင်ရောင်ဂှ် ညးဆက်ဂးလဝ်ရ။
နကဵုကမ္မတဳပံင်ကောံမန်ဍုင်သၟာင် (OMCC) ကေုာံ ဂကောံမန်ဍုင်သေံ (Thai-Mon Communities) တအ်ဝွံ သ္ဂောံရီုဗင်ထံက်ပင်အာ ပရေင်ပညာသၟတ်မန်တအ်ကီု သ္ဂောံသၠုင်ပတိုန်အာ ဓဝ်ကၠိုဟ်ခၠင်လမိင်လညာတ် သၟတ်မန်တအ်ကီုတုဲ ချပ်ဇန်ကၠုင် သွက်ဂွံပံက်အာတန်ဗ္တောန်ဏံရောင် ဂွံတီကေတ်ရ။
