အခိၚ်ကာလကဵုပညာသၞောတ်မ၊ စုံ မဖျေံစၟတ်လဝ် သွက်ဂွံစကာ ပွမဟေန်ချာဲကၠေၚ်စက် တုဲဒှ်အာတုဲ အပ္ဍဲတွဵုရးဍုၚ်မန်ဝွံ ညးအာကၠုၚ် တ္ၚဲမ၊ စုံ ဗၠေတ်မှာတံ ဒးဒုၚ်ကေတ်အရေဝ် နကဵုဒဏ်သြန် (၃၀၀၀၀) ဒကေဝ်ရောၚ် အတိုၚ်ညးဒဳကွဳစက်ဆဵုဗဂနတဲတံ ဟီုဂးလဝ်ဂှ် ဂွံတီကေတ်ရ။
ကိစ္စကေတ်အရေဝ် သၞောတ်မ၊ စုံဂှ်ဝွံ အခိၚ်ကာလကဵုပညာတုဲကၠုၚ်ဏံဂှ် ကေတ်အာအရေဝ် ဒဏ်ထံၚ်မွဲဂိတုကဵု ဒဏ်သြန် (၂၀၀၀၀) ဒကေဝ်ရောၚ် နူကမ္မယှေန်ပၞာန် ဟီုဂးကဵုလဝ်သမ္တီကီုလေဝ် အခိၚ်လၟုဟ်ဏံ ကေတ်အာအရေဝ် နကဵုသၞောဝ်ဥပဒေ ဘဲအန္တရာဲယာဉ်သၟးဇ္ၚးကဵု ပရေၚ်ကောပ်ကာဲကွဳစက်ယာဉ် (၂၀၂၀) ၝောံပိုဒ် (၉၆) ဂှ်ရောၚ် ဗၠာဲသၟိၚ်ထိၚ်ဒဝ်ကွဳစက်ယာဉ်တံ ချူဓမံက်လဝ် ပ္ဍဲမုက်လိက်ပရေၚ်မၞိဟ်ညးတံရ။
အတိုၚ်ၝောံပိုဒ်ဂှ်မ္ဂး ဒဏ်ထံၚ်ဟွံပါမွဲသာ်တုဲ ဒဏ်သြန်ဟွံဂၠိုၚ်နူ (၃၀၀၀၀) ဒကေဝ် ဖျေံစၟတ်မာန်ရောၚ် ဂွံတီကေတ်ရ။
နူကဵုကမ္မယှေန်ပၞာန်တံ လလောၚ်ပ္တိတ်လဝ်ဗဗွဲဓဝ် ဟွံမွဲဏီကီုလေဝ် ညးအာကၠုၚ် တ္ၚဲမ၊ စုံ ဗၠေတ် လ္တူဂၠံၚ်ဍာန်တံဂှ် ရပ်မံၚ်ကဵုဂကောံတုဲ ဒးကဵုဒဏ်သြန် (၃၀၀၀၀) ဒကေဝ်နွံရောၚ် ညးဒဳကွဳစက်ဖ္ဍိုက်ညးအာတရဴ ဆဵုဂဗနတဲမွဲတၠဂှ် ဟီုရ။
“လ္တူဂှ်တှေ် ဗၠာဲသၟိၚ်တံ၊ သၞေဟ်ကၚ်ဗွဲမဂၠိုၚ်တံ စၟဳစၟတ်မံၚ် မဂၞန်မ၊ စုံရ။ ဍေံတံရပ်ဂွံတှေ် ဒးကဵုဒဏ်သြန် (၃) ဠက်ရ။ ကွဳစက်အဲဂှ် အာဒးတ္ၚဲမ၊ စုံတုဲ ဒးကဵုသြန်ရ။ ဒဏ်ထံၚ်ဂှ် ဟွံဖျေံပုဟ်။ ကဵုသြန်တုဲ ဍေံတံဟလးရ။ ဆဂး လၟုဟ်ဏံ ဒးတိက်ပ္ဍဲမတ်မလီုမွဲဗ္တံရ။ ဆက်အာဟွံဂွံပုဟ်” သာ်ဝွံ ညးဒဳကွဳစက်ဂှ် ဟီုရ။
ဒဏ်သြန် (၃၀၀၀၀) ဒကေဝ်ဂှ်ဝွံ ဒးကဵုဗၠာဲသၟိၚ် စၟဳစၟတ်ဒၟံၚ်လ္တူဂၠံၚ်ဍာန်ဂှ် လဝဲါဂှ်ရောၚ် ညးဆက်ဟီုရ။
အခိၚ်လၟုဟ်ဏံ ဂကောံဂၠိုက်ဂၠာဲစၟဳစၟတ်ကမ္မယှေန်ပၞာန်တံ ဒၞာဲအဓိကလုပ်တိတ်ဍုၚ်၊ ဂၠံၚ်ဇၞော် ကေုာံ ဂၠံၚ်သွာၚ်ဂမၠိုၚ်ဂှ် ကၠောန်သ္ပစၟဳစၟတ်ဒၟံၚ်တုဲ အတိုၚ်သၞောဝ်ဥပဒေဂှ် ကေတ်မံၚ်အရေဝ်လေဝ်နွံရ။
လ္တူသၞောတ်မ၊ စုံ ကမ္မယှေန်ပၞာန်ဂှ် ပရေၚ်ဟီုဂးပါ်ပဲါ သၠုၚ်တိုန်မံၚ်တုဲ သၞာဲဒဴတိုန်စှေ်ရုၚ်လၟေၚ်တ္ၚဲကဵု ညးအဆံၚ်သဇိုၚ်တံ စရိတ်အာကၠုၚ်အိုတ်ဂၠိုၚ်ကၠုၚ်ကီု သီုကဵုအခိၚ်အိုတ်ဂၠိုၚ်ရောၚ် သၞာဲဒဴမွဲတၠဂှ် ဟီုရ။
“သွက်ပိုဲ ညးဒးတိုန်မံၚ်ရုၚ်လၟေၚ်တ္ၚဲဂှ်တှေ် ဒှ်ခက်ခုဲရ။ ကွဳလိုန်ဓာတ်ဇကုမတှေ် ပ္ဍဲတ္ၚဲစုံဂှ် ဂွံအာကမၠောန်ခက်ရ။ ဒးလိၚ်ကွဳလိုန်ဓာတ်တၞဟ်တၞဟ်လေဝ် ဟွံပြေပြံၚ်ပုဟ်။ သြန်ဂိတုဂှ်လေဝ် ခိုဟ်မံၚ်ဟွံသေၚ်ပုဟ်။ ကၠောန်သ္ပဗီုဏံ ဟွံထေက်ပုဟ် ညာတ်ကေတ်ရ။ ကၠေၚ်ဓာတ်ဂှ် မိက်ဂွံသၞောတ်ဗ္ၜတ်တှေ် သၞောတ်ဗ္ၜတ်လေဝ်၊ ကဵုအာမၞိဟ်အာကၠုၚ်တံ မုဆေၚ်ရော၊ ကၠောန်ဟွံထေက်ပုဟ် ညာတ်ကေတ်ရ” သာ်ဝွံ ညးဟီုရ။
အပ္ဍဲဒေသဝွံ သ္ဂောံဂွံကၠေၚ်စက် ဝါတ်ဂါတ်ကၠုၚ်ကီု၊ ဟိုတ်နူသၞောတ်မ၊ စုံကီုဂှ်ရ နကဵုသၞာဲဒဴတံကီု ညးဒဳကွဳစက်ယာဉ်တံကီု သွက်ဂွံစဳဇန် လၟေၚ်တရဴဂမၠိုၚ်ဂှ် ဒးဆဵုဂဗဒၟံၚ်ခက်ခုဲရောၚ် ညးဒဳကွဳစက်ယာဉ်ဂမၠိုၚ်တံ ဟီုရ။
ဂိတုမာတ် စၟတ်တ္ၚဲ (၃) တုဲကၠုၚ်ဏံဝွံ ရန်တၟံကဵု သွက်ဂွံစကာဟေန်ချာဲကၠေၚ်စက်တုဲ ပပ္တံနူဂိတုမာတ် (၇) ဏံ ကွဳစက်ယာဉ်ပုဂ္ဂလိကဂမၠိုၚ် သွက်ဂွံဒဳအာ နကဵုသၞောတ်တ္ၚဲမ၊ စုံဂှ် ဂကောံလလောၚ်ပရိုၚ်ကံၚ်ဇြဳဂီုကၠီုကဵု ပရေၚ်စဵုဒၞာကောန်ဂကူတံ ကဵုသမ္တီလလောၚ်ပ္တိတ်လဝ်ရ။
တုဲပၠန် အခိၚ်ကာလစၟတ်လဝ် နဒဒှ်ကာလကဵုပညာ နူဂိတုမာတ် (၇) စဵုကဵု (၁၃) ဂှ်လေဝ် အစဳဇန်ကဵုပညာ ကြပ်ဟွံမွဲ အောန်ဒၟံၚ်ဂှ်ရ ညးဍုၚ်ကွာန်စကာကွဳစက်ယာဉ်တံဝွံ စဵုကဵုတ္ၚဲဏံ သ္ဂောံကၠိုဟ်ခၠၚ်သၞောတ်ဂှ်ဂှ် ဝါတ်ဂါတ်၊ ခက်ခုဲမံၚ်ရောၚ် ဂွံတီကေတ်ရ။
