ပ္ဍဲလ္ပာ်ကွာန် သ္ကုတ်ရေဝ်သၟဝ်ကျာ၊ ပွိုင်ဍုင်ရေဝ်၊ တွဵုရးဍုင်မန်ဂှ်ဝွံ ဒပ်ကမ္မယှေန်ပၞာန်တံ ထပ်ဗပေင်ကၠုင်ဇြဟတ်ဂှ်ရ ပရေင်ပၞာန်ကြံင်မ္ၚိုဟ်ဒၟံင်ကဵု ဂကောံဒပ်ပၠန်ဂတးတံရောင် အတိုင်ဂကောံဒပ်ပၠန်ဂတးကဵု တမ်ရိုဟ်ပရိုင်ဒေသတံ ဟီုဂးလဝ်ဂှ် ဂွံတီကေတ်ရ။
ကရောင်ပၞာန်ကမ္မယှေန်ပၞာန် ဇြဟတ်ၜိုတ် (၁၅၀) မထ္ပက်ကၠုင်လဝ်ကရောင်ပၞာန် အပ္ဍဲဂိတုဖေဖဝ်ဝါရဳတုဲကၠုင်ဂှ်ဝွံ စဵုကဵုပွိုင်မွဲဂိတုပြင်ဏံ ဟွံက္လေင်ဆုတ်တိတ်အာမွဲသာ်တုဲ သၟာင်နူကေတ်လဝ်ဒၞာဲ ပ္ဍဲပွဳဗွိုင်ဗဒဲါကွာန်အံင်တာယာ၊ သ္ကုတ်ရေဝ်သၟဝ်ကျာဂှ်မ္ဂး ထပ်ဗပေင်ဒၟံင်ဇြဟတ်လေဝ်နွံရ။
“စဵုကဵုလၟုဟ် ကရောင်ပၞာန်နွံမံင်ဖိုဟ်။ ဇြဟတ်ၜိုတ် (၁၅၀) နွံရ။ တုဲတှ်ေ ဍေံတံ ထပ်ဗပေင်လဝ်ဇြဟတ်နွံရ။ အကြာပွဳဗွိုင်ဗဒဲါကွာန်ဟေင် ဆက်ချဳဓရာင်မံင်ရ။ အကာဲအရာပၞာန်လေဝ် ကြံင်မ္ၚိုဟ်မံင်ဖိုဟ်” သာ်ဝွံ ညးမၞုံအခေါင်ဟီုဂး ဒပ်ပၠန်ဂတးဍုင်မန် (MSRF) မိတၠညာဏ် ဟီုရ။
ပ္ဍဲပွဳဗွိုင်ဗဒဲါကွာန်ကၠအ်လိမဴ ကေုာံ အံင်တာယာ ကရောင်ပၞာန်ကမ္မယှေန်ပၞာန် ကေတ်လဝ်ဒၞာဲဂှ်ဝွံ အပ္ဍဲဂိတုမာတ်ဏံ ကတဵုဒှ်အာပေဲါဗ္တိုက်ၜါလ္ပာ် ဟွံအောန်နူ (၅) ဝါနွံရ။
ဂိတုမာတ် စၟတ် (၁၉၊ ၂၀၊ ၂၁) တုဲကၠုင်ဏံဂှ်လေဝ် ကရောင်ပၞာန်ကမ္မယှေန်ပၞာန်ဂှ် ဒပ်ပံင်ကောံကောဒေံဒရုင် မန် – တၞင်သဳ ကေုာံ ဂကောံဒပ်ပံင်ကောံမဟာမိတ်ပၠန်ဂတးတံ ပန်ဗ္တိုက်ထောံဖျေံဗမ်ကုဒရုင် ဗဒဲါ (၂၀) မရ။
“ဍေံတံ ထ္ပက်မံင်ကရောင်ပၞာန်ဂှ် ၜိုတ်မွဲဂိတုနွံကၠုင်ရ။ ဆဂး ကရောင်ပၞာန်ဍေံတံဂှ် မံက်အာ ကၠေံအာ ဒှ်မံင်ဗီုဂှ်ရ။ ဨဇှ်တှ်ေ အခိင်ဍေံတံမံက်ကၠုင်ဂှ်တှ်ေ ဂကောံဒပ်ပၠန်ဂတးတံ ဗ္တိုက်ထောံဖျေံဗမ်ကဵုဒရုင်ရ။ ချဳဓရာင်မံင် ပရေင်ပၞာန်ဗီုဂှ်နွံ” သာ်ဝွံ မိတၠညာဏ် ဆက်ဟီုလဝ်ရ။
အပ္ဍဲကဵုပေဲါဗ္တိုက်ၜါလ္ပာ် ကတဵုဒှ်ဒၟံင် သ္ကုတ်ရေဝ်သၟဝ်ကျာဂှ်ဝွံ လ္ပာ်ဒပ်ကမ္မယှေန်ပၞာန်တံ ဒးဘဲဇီုကပိုက်ချိုတ်ဂျိုင်ဂၠိုင်တုဲ လ္ပာ်ဂကောံဒပ်ပၠန်ဂးတံလေဝ် ဒးဘဲဇီုကပိုက်နွံမံင်ကီုရောင် ဂွံတီကေတ် နူတမ်ရိုဟ်ပရိုင်အပ္ဍဲဒေသရ။
အဃောဒပ်ကမ္မယှေန်ပၞာန်တံ ထ္ပက်ကရောင်ပၞာန်ဂှ်မ္ဂး ပွမဘပဠ၊ ရပ်သီ ဖုင် ကေုာံ သြန် ညးဒေသ ကၠောန်ဒၟံင်ကၠအ်ဂူတံနွံရ။
ဟိုတ်နူထ္ပက်ကရောင်ပၞာန်ကဵု ပေဲါဗ္တိုက်ၜါလ္ပာ် ကတဵုဒှ်မံင်ဂှ်ရ ညးဒေသတံ သွက်ဂွံအာ ကၠအ်ဂူဂှ် ဒးဆဵုဂဗခက်ခုဲတုဲ ဒးဒေံါဇူလဝ်ကမၠောန်ရဂှ် ညးဒေသတံ ဟီုရ။
ဒပ်ကမ္မယှေန်ပၞာန်တံဝွံ သွက်ဂွံထိင်ဒဝ် သ္ကုတ်ဂၠံင်ဇၞော် စၟတ် (၈) အကြာဇြပ်ဗု-ရေဝ်၊ သ္ကုတ်သၟဝ်ကျာပွိုင်ဍုင်ရေဝ်ဂှ်မ္ဂး ပြုပြေင်ထ္ပက်မံင်ပၞာန် ဗွဲမသ္ကာတ်မြဟ်ဂှ်ရ ကတဵုဒှ်မံင်ပေဲါဗ္တိုက်ကဵု ဂကောံဒပ်ပံင်ကောံမဟာမိတ်ပၠန်ဂတးတံ မွဲနှေံမွဲနှေံရ။
နကဵုညးဍုင်ကွာန် ညးဒေသတံဝွံ အကြာသ္ကုတ်ဂၠံင် ရေဝ် – ဇြပ်ဗုကဵု သ္ကုတ်သၟဝ်ကျာ ပွိုင်ဍုင်ရေဝ်ဂှ် အခိင်ဟွံရုဲ ကတဵုဒှ်ကၠုင်ပေဲါဗ္တိုက်မာန်ဂှ်ရ မံင်စံင်အာကၠုင် နကဵုသတိညိဂှ် လ္ပာ်ဂကောံဒပ်ပၠန်ဂတးတံ ဖတိုက်ဖအောဝ်လဝ်ရ။
