အလုံဍုင်သေံမွဲဂှ် အသိင်ပရာန်ဂမ္တဴ သၠုင်တိုန်မံင်ရိုဟ်ဒဒှ်တ္ရဲတုဲ ညးဍုင်ကွာန်တအ် ဒးသ္ပဂရုကဵု ပရေင်ထတ်ယုက်ရောင် ပ္ဍဲမုက်လိက်ပရိုင်သေံဂမၠိုင် ချူဓမံက်လဝ်ရ။
အတိုင်ဌာနဥတုဗြဴကျာတအ် စၟတ်သမ္တီလဝ်မ္ဂး ဗ္ၜတ်ဂမ္တဴနွံမံင်အကြာ ၂၇.၀ – ၃၂.၉ ဒဳဂရဳဇြေန်တိဂရိမ္ဂး အဆံင်မ္ဒးသ္ပသတိ၊ ဗ္ၜတ်ဂမ္တဴ နွံမံင်အကြာ ၃၃.၀ – ၄၁.၉ ဒဳဂရဳဇြေန်တိဂရိမ္ဂး အဆံင်ဒးကဵုသတိ၊ ဗ္ၜတ်ဂမ္တဴ နွံမံင်အကြာ ၄၂.၀ – ၅၁.၉ မ္ဂး အဆံင်ဒှ်အန္တရာဲတုဲ ဗ္ၜတ်ဂမ္တဴ ယဝ်ရဒှ်အာ စဵုကဵု ၅၂ ဒဳဂရဳဇြေန်တိဂရိ လ္ပာ်လ္တူမ္ဂး အဆံင်ဒှ်အန္တရာဲလောန်ကာဲရောင် ဂးလဝ်ရ။
ပ္ဍဲကဵုတ္ရဲဏအ် (မာတ် ၂၆) ဝွံ လ္တူဍုင်ဇၞော်က္ၜင်ကံက်ဂှ် ဗ္ၜတ်ဂမ္တဴ စိုပ်ဒၟံင်အကြာ ၄၂ ဒဳဂရဳဇြေန်တိဂရိကဵု ၅၁ ဒသမ ၉ ဒဳဂရဳဇြေန်တိဂရိဒှ်မာန်ရောင် ညးတာလျိုင်ရုင်အလဵုအသဳတအ် ဟီုဂးလဝ်ဂှ် ပရိုင် Bangkok Post ချူလဝ်ရ။
အသိင်ပရာန်ဂမ္တဴ ပ္ဍဲကာလဏအ်ဂှ် တၠုင်လအာတုပ်ကဵုဗီုမမံင်ဒၟံင်ဂတမုက် ပၟတ်ဖဴကာတ်တ်တုဲ အလုံဇကုမွဲ က္တဴသၠာန်မံင်ရောင် ညးဍုင်ကွာန်တအ် ဟီုဂးမံင်အိုတ်ရ။
ဒှ်သာ်ဂှ်ရ ကောန်င္ရာ်အာယုက် ၅ သၞာံလ္ပာ်သၟဝ်ဂမၠိုင်၊ မၞိဟ်အာယုက်ဇၞော် ၆၀ လ္ပာ်လ္တူဂမၠိုင်၊ မၞိဟ်ဗြဴဗုင်င်ဂမၠိုင်၊ ညးမၞုံကဵုယဲဍာ်ဇမၠိင်ဂမၠိုင်၊ ညးမကြောံကၠေင်ဂမၠိုင်၊ ညးမသုင်စသုရာဂမၠိုင်၊ ညးမ္ဒးကၠောန်ဒၟံင်ကမၠောန်အကြာတ္ရဲဂမၠိုင် ကေုာံ ညးမကွာ်တရဴအာကၠုင် တိတ်နူမ္ရးသ္ရိဂမၠိုင်တအ် ဒးစွံသတိတုဲ တၟေင်တၟဟ်ဒှ်မွဲမွဲသာ်မ္ဂး ဗွဲမပြဟ် ညံင်ဂွံထ္ၜးကဵုအ္စာသဝ်တအ်မာန် နူရုင်အလဵုအသဳ ဍုင်က္ၜင်ကံင် ဆဝ်ဗ္ရုဟ်လဝ်ရ။
ဟိုတ်နူဘဲပရာန်ဂမ္တဴတုဲ ပ္ဍဲဍုင်သေံ မၞိဟ်ဒးအိုတ်တဴလမျီု ဟွံဂွံမိင်ပရိုင်ဏီကၠာလေဝ် ပ္ဍဲကဵုဍုင်ဗၟာဂှ် ဟိုတ်နူဒးပြေင်ရေင်မင်စုတ်ကၠေင် အခိင်တ္ရဲကာတ်တ်တုဲ ပ္ဍဲကဵုဍုင်လ္ဂုင်ဂှ် မၞိဟ်တြုံမွဲတၠ၊ ပ္ဍဲကဵုတ္ကအ်ခၟိုင်ဂှ် မၞိဟ်တြုံမွဲတၠ ဒးချိုတ်အာလဝ်နွံရောင် ဂွံတီကေတ်ရ။
