ဂိတုမာတ် စၟတ်တ္ၚဲ (၁၅) နူတနေံဏအ်ဝွံ ပ္ဍဲသၚ်္ခဠၜုရဳ (ဝၚ်္က)၊ အရာပ်နံၚ်လု၊ ကောန်မန်ဗၟာ အာယုက် (၁၈) သၞာံမွဲတၠ ဟိုတ်နူကၠတ်ပလံၚ်ပ္တိတ်ကပေါတ်ဟွံလုပ်ကဵုသၞောဝ် လ္ပါ်ဒေသပယျဵုသေံ-ဗၟာဂှ်ရ ဗၠာဲသၟိၚ်သေံတအ် စၟဳစၟတ်ရပ်စပ်ဂွံရောၚ် ပရိုၚ်သေံဂမၠိုၚ် ပ္တိုန်ထ္ၜးလဝ်ရ။

ကောန်မန်ဗၟာဏအ်ဝွံ ကၠောန်မံၚ်ကမၠောန်ပလံၚ်ကပေါတ် အကြာသၚ်္ခဠၜုရဳ (ဝၚ်္က)ကဵု ဒေသပယျဵုသေံ-ဗၟာကျာ်ပိ နကဵုကွဳလိုန်ဓါတ်သၠာပိမွဲဖ္ဍိုက်တုဲ အကြာဂှ်မ္ဂး ဂွိၚ်ဖေက်သ္ဒးကဵု အကံက်အခေါန်တုဲ အခိၚ်ဗ္တံမ္ဂး စကာပၞော်ဂၠံၚ်ဓလုက်တုဲကၠတ်ပလံၚ်မံၚ်ကပေါတ် ဟွံလုပ်ကဵုသၞောဝ်တအ်ရ။

ပ္ဍဲကဵုမစၟဳစၟတ်ကောန်မန်ဗၟာဏအ်ဂှ်ဝွံ ရပ်သီဂွံ ကပေါတ်စကာအေန်တာနိတ် (TP-Link) ၊ ကပေါက်ဖုၚ်၊ ပဠောံ၊ ဒၞပ်၊ ကပေါတ်နာနာကဵု ဩန်ကြုက်ပတောံ ဗၞတ် (၂,၀၀၀) ယာမ်၊ တၟော်ကဵု ဩန်သေံမ္ဂး မၞုံၚုဟ်မး (၉၃၅,၀၀၀) ကိုဋ်နွံရ။

ကောန်မန်ဗၟာဏအ်ဝွံ “ကပေါတ်တဏံဖအိုတ်ဂှ် သွက်ဂွံပလံၚ်ဏာ ပ္ဍဲကဵုဒေသပယျဵုကျာ်ပိ လ္ပါ်ဍုၚ်ဗၟာတေံဂးတုဲ ကောန်ဍုၚ်ဗၟာညးဟွံတီယၟုမွဲတၠဂှ် ကၠုၚ်စိုပ်ကဵုလဝ်ရ” သာ်ဝွံ ညးဒးဒုၚ်ရပ်စၟဳစၟတ် ကောန်မန်ဗၟာမွဲတၠဂှ် ဂးရ။

ဒှ်သာ်ဂှ်ရ ကောန်မန်ဗၟာဏအ်ဝွံ ဟိုတ်နူကၠောန်သ္ပ နကဵုအမှုကၠတ်ပလံၚ်ကပေါတ် ဟွံလုပ်ကဵုသၞောဝ်ကီု အမှုဟွံကဵုအကံက်အခေါန်ကီု ကွဳလိုန်ဓါတ်သၠာပိဂှ် ဟွံမွဲကဵုလာၚ်ဇြေန်ကီုဂှ်ရ နကဵုဒုဟ်ဒဏ်နာနာသာ်ဂှ် ဗၠာဲသၟိၚ်သေံ မၞုံဒေသသၚ်္ခဠၜုရဳ (ဝၚ်္က) တအ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်တုဲ စၟဳစၟတ်ကေတ်မံၚ်အရေဝ်ရ။

ကပေါတ်မသီဂွံလဝ်ဂမၠိုၚ်ဝွံ ဒှ်ကပေါတ်မဆေၚ်စပ်ကဵု လာၚ်အေန်တာနိတ်တအ်ကီု ဩန်ကြုက်လေဝ်ပါလုပ်မံၚ်ဂှ်ရ ကပေါတ်တဏအ် ဒှ်မံၚ်သံသယ ဆက်စပ်မံၚ်ကဵု ကြုက်ကျာဖျတအ်မာန်ရောၚ် ညးတာလျိုၚ် ဗၠာဲသၟိၚ်သေံသၚ်္ခဠၜုရဳတအ် တၟော်ခယျမံၚ်ရ။

တုဲကၠုၚ်ဂိတုမာတ် စၟတ်တ္ၚဲ (၄) ဏအ်ဂှ်လေဝ် ပ္ဍဲသၚ်္ခဠၜုရဳ (ဝၚ်္က) ကောန်ဍုၚ်ကြုက်ၜါတၠ လိၚ်ကော်ကေတ် ညးဒဳကွဳစက် ပ္ဍဲကဵုဒေသဂှ်မွဲတၠတုဲ ကၠတ်ပလံၚ်မံၚ်ကပေါတ် ဟွံလုပ်ကဵုသၞောဝ် ဂဥုဲၜူမာဲနွံကၠုၚ်လဝ်ရ။

ပ္ဍဲပယျဵုသေံ-ဗၟာ လ္ပါ်ဒေသကျာ်ပိ၊ သၚ်္ခဠၜုရဳ ၊ ကမ္မရဳဏအ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ဟိုတ်မပတၚ်လဝ်ပရေၚ်ဂီုကၠီုဂှ်ရ ညးကၠတ်လုပ်ဍုၚ်သေံကီု ညးကၠတ်ထပၠုပ်ကပေါတ် ဟွံလုပ်ကဵုသၞောဝ်တအ်ကီုဂှ် စၟဳစၟတ်ရပ်ဂွံမံၚ် မွဲနှေံမွဲနှေံနွံရောၚ် ဂွံတီကေတ်ရ။