စနူဂိတုမာတ် စၟတ်တ္ရဲ (၁၆) ဏအ်မ္ဂး စကၠောန်ဗဒှ်အာ ကောံဓရီုကၠတ်ထဝ်ဂမၠိုင်တုဲ နူဂှ်မွဲအဆံင် အလဵုအသဳတၟိလေဝ် မံက်တိုန်ကၠုင်ကီုရောင်။ မွဲလ္ပာ်ဂှ်လေဝ် ပဋိပက္ခပေါဲပၞာန်အလုံဍုင် မမံက်ဒှ်ကၠုင်နူ အဆက်ဖဵုပၞာန်သီအဝဵုတေံဂှ် အသိင်ဍိုန်စှ်ေအာဟွံမွဲဏီရ။ စပ်ကဵုအကာဲအရာတအ်ဂှ်တုဲ အ္စာပရိုင် ဌာန်ပရိုင်ဗၠးၜးမန် “တၠလွဳ” ကေတ်အဆက်သၟာန်သွဟ်လဝ် သၟာပရေင်ဍုင်ကွာန်မန် (ဟွံမိက်ဓမံက်ယၟု) မွဲတၠဂှ် ပ္တိုန်ထ္ၜးဏာရ။
သၟာန်။ ။ ခြာဟွံလအ် ဒပ်ပၞာန်ဗၟာတအ် ကော်ကောံဓရီုစၠတ်ထဝ်အဆံင်တုဲ သွက်ဂွံပံက်အာအလဵုအသဳတၟိ နွံမံင်ရ၊ လ္တူဏအ် ဗီုလဵုအ္စာ ညာတ်ကေတ်ရော?
သွဟ်။ ။ ပေါဲရုဲမာဲဏံတုဲဂှ် လ္ပာ်တၠအဝဵုပၞာန်ကဵု ဗော်သ္ပစၞးဒပ်ပၞာန် ဇၞးလဝ်မာဲဂှ်တှ်ေ ပ္ဍဲဂိတုမာတ်ဏံ သွက်ဂွံကၠောန်ကောံဓရီုစၠတ်ထဝ် ရုဲစှ်တာလျိုၚ်အဆံၚ်ၚ်ဂှ် လ္ပာ်လဵုရံၚ်ၚ် မွဲဒမြိပ် ယျေဘူယျတှ်ေ လ္ပာ်ပရေၚ် ပၞာန်ဂှ်လေဝ် ဗီုဍေံနွံပၟိက်ဂှ် ဖန်ဇန်ကၠုၚ်နွံ၊ လ္ပာ်အလဵုအသဳဂှ်လေဝ် ဗီုဍေံနွံပၟိက်ဂှ် ဖန်ဇန်ကၠုၚ်လဝ်နွံရ။ အေဂှ်တှ်ေ ပ္ဍဲကဵုဍေံဖန်ဇန်ဏံဂှ် နူကဵုဒပ်ပၞာန်ဍေံ ဂွံလဝ်အဝဵုရရဂှ်လေဝ် ညးဍုၚ်ကွာန် ဟွံဒးရုဲမွဲသာ် (၂၅) တၟံကၠံဂှ် ဍေံဂွံလဝ်တုဲတုဲမံၚ်ရ။ တုဲတှ်ေ ဗော်ဂွံလဝ်ဇၞး (ကျဖောအ်) လၟုဟ်ဏံဂှ်တှ်ေ မၞိဟ်ဍေံရ ဍေံစုတ်စွံလဝ်ဏောၚ်ဟီုတှ်ေ ၜိုန်ရဍေံတံဟီုမံၚ် ဒုၚ်သ္ဇိုၚ်ကဵု သၞောဝ်ဥပဒေ (၂၀၀၈) ကီုလေဝ် မ္ၚးနူသၞောဝ် (၂၀၀၈) တုဲဂှ် ဍေံတံဖန်ဖက်မာန်ဒၟံၚ်ဖ္အိုတ်ရ။ ယဝ်ရဒးဟီုတှ်ေ ပဒုဟ်လဝ်ကဵု သၞောဝ် (၂၀၀၈)၊ ဆဂးတှ်ေ နကဵုပၟိက်ဆန္ဒဍေံ အဓိပ္ပါဲဍေံ မိက်ဂွံကၠောန် မိက်ဂွံဒှ်ဂှ်တှ်ေ အလဵုအသဳဍေံဂှ် ပ္ဍဲကဵုဂိတုမာတ်၊ ဨဗရဴဏံ ဍေံဓမံက်ရုပ်ရဴ ကၠောန်ဗဒှ်စၠတ်ထဝ်ဏောၚ် ဟီုဗက်ဟွံဂတာပ်၊ ပ္ဍဲကဵုစၠတ်ထဝ်ဏံဂှ် နကဵုညးစၞးတၞဟ်ဟ်ကီု၊ ကောန်ဂကူကောန်ဍုၚ်အရၚ်ကီု အဓိပ္ပါဲမုရောဟီုတှ်ေ ၜိုတ်ဍေံလဴစရ၊ နူဍေံတံ သွက်ဂွံကၠောန်ဂှ် ဖန်ဇန်လဝ် ဒတုဲရ။ အေဇှ် စၠတ်ထဝ်ဏံဂှ် အဓိပ္ပါဲဍေံ ဒှ်စၠတ်ထဝ် သွက်ဂွံထ္ၜးစရ။ ကြက်ဍေံဍာံဍာံဂှ် ရဲဒပ်ပၞာန်ဍေံတအ် ဖအိုတ်ရ ဖန်ဇန်ပ္ကၚ်ရၚ်အုပ်ဓုပ်ဍုၚ်ဏောၚ် ဟီုစဂွံရ။
လၟုဟ်ဏံ ဍေံဖျေဟ်လဝ်ဗီုလဵုရောဟီုတှ်ေ ပ္ဍဲတွဵုရးသၟးဟွံသေၚ်၊ ရး၊ ပွိုၚ်ဍုၚ်ဖ္အိုတ်ဂှ် နူကဵုပၞာန်ဍေံ ဒးကၠုၚ်သ္ပ ဥက္ကဌရ။ အေဒှ်ဟဂှ်တှ်ေ နူတမ် ဒဵုကဵုစိုပ်ကၞောတ် ရဲဒပ်ပၞာန် တၠအဝဵုပၞာန်တံဖအိုတ်ရ ပ္ကၚ်ရင်အုပ်ဓုပ်အာဍုၚ် ဍိုပ်ကၠံမာန်ဏောၚ်ဂှ် ညာတ်ကေတ်သာ်ဂှ်ရ။
သၟာန်။ ။ အကာဲအရာလၟုဟ်ဏောဝ်ဟီုတှ်ေ အလဵုအသဳတၟိ မံက်ကၠုင်ဂတဏအ် ဗီုလဵုဂွံဆက်ကၠောန် ကမၠောန်ရော?
သွဟ်။ ။ လၟုဟ်ဂှ်တှ်ေ ရံၚ်ကဵုသ္ကုတ်လ္ပာ်လ္တူ မပ္တံကဵု ကချေၚ်၊ ချေၚ်၊ ရခေၚ်ဂှ် ပေါဲဗတိုက်သ္ကာတ်မြဟ်ဒၟံၚ်တုဲ ပ္ဍဲကဵုကရောံအကြာဂှ်တှ်ေ ဗဂေါ၊ ဨရာဝတဳ၊ မဂွေတံလေဝ် အသိၚ်ပေါဲဗတိုက် သ္ကာတ်မြဟ်ဒၟံၚ်ကီုရ။ ဗီုဂှ်ကီု ဒၞာဲတၞဟ်ဟ်လေဝ် အသိၚ်ပေါဲဗတိုက်သ္ကာတ်မြဟ်ဒၟံၚ်ကီုတှ်ေ ၝဍေံရန်ပတဝ်လဝ်ဂှ်တှ်ေ ဍေံလုပ်ကၠောန်သ္ပ အလုံဍုၚ်မွဲဟွံမာန်ပုဟ်၊ ဟီုစဟဏံတှ်ေ ၜိုတ်နွံဗွိုၚ်ဍေံ ၜိုတ်ဍေံဂါံစိုပ်ဂှ်ရ ကၠောန်ဂွံမာန်၊ နွံဒၟံၚ်ဗွိုၚ်မ္ၚးမ္ၚးဂှ်တှ်ေ ဍေံက္ဍစိုပ်ဟွံမာန်ပုဟ်။
သၟာန်။ ။ တုဲပၠန် အလဵုအသဳတၟိဍေံ မံက်ကၠုင်တုဲဏောင်ဟီုတှ်ေ စပ်ကဵုကိစ္စကေတ်မံင်ကောန်ပၞာန်တၟိဂှ်ရော ဗီုလဵုဆက်ဒှ်ကၠုင်မာန်ရော?
သွဟ်။ ။ အေဂှ်တှ်ေ စပ်ကဵုကိစ္စ ဍေံကေတ်ကောန်ပၞာန်ဟီုဂှ် ဍေံဒှ်ဒၟံၚ်ကမၠောန်ဏောၚ်၊ မုပ ဍေံဒှ်ကမၠောန် ဟီုတှ်ေ တဲကၠာဂှ် ဍေံဂွံကောန်ပၞာန်ဏောၚ်၊ ဍေံဟွံဂွံကောန်ပၞာန်ပုဟ်တှ်ေ ဍေံဂွံလှုဲဏောၚ်၊ ဍေံဂွံစကာ မၞိဟ်ဍေံဂွံ ဆေၚ်စပ်ကဵုကေတ်ကောန်ပၞာန်ဏံဂှ် ဂုဏ်ဖဵု ဂွံလှုဲ နူကဵုအဆံၚ်သၟဝ် ဒဵုစိုပ်အဆံၚ်လ္တူတေံ ဂွံဒၟံၚ်လှုဲ ဗီုဏံတှ်ေ အဓိပ္ပါဲဍေံ ကမၠောန်ဏံမွဲဂှ် ဍေံကၠောန်ဒးဒၟံၚ်ဗီုရ။ အေဍေံဒှ်ကၠုၚ်ဗီုဂှ်ဟွံဂတာပ် ကမၠောန်ဏံဂှ် အလဵုအသဳဍေံ ကၠာဟွံဂွံမံက်လေဝ် ဍေံကၠောန်မံၚ်ရ၊ အလဵုအသဳဍေံမံက်တုဲလေဝ် ဍေံဆက်ကၠောန်ပၠန်ရ။ အေဇှ်တှ်ေ ညးဍုၚ်ကွာန်ပိုဲတံ မွဲဒမြိပ်ဂၠံၚ်တရဴ လက်ထက်တၠအဝဵုပၞာန်ဏံရတှ်ေ လမျီုလေဝ် ပရေၚ်ဂီုကၠီု ဟွံမွဲပုဟ်၊ ပိုန်ဒြပ်လေဝ် ပရေၚ်ဂီုကၠီုဟွံမွဲပုဟ်၊ အလုံမွဲဘဝဂှ် ပရေၚ်ဂီုကၠီု မုဟွံမွဲဟဂှ်ရ။ ဟိုတ်ဂှ်ရ ပိုဲတံစၟဳစဂွံ ဂှ် နွံမွဲသာ်ဓဝ်ရ၊ မုပိုဲစၟဳစမွဲသာ်ရောဟီုတှ်ေ လ္တူပေါဲဗတိုက် ကောန်ဂကူကောန်ဍုၚ် အရၚ်တံကဵု PDF တံ လုပ်တဝ်စၞေဟ်ဒၟံၚ်ပေါဲဗတိုက် ဗတိုက်သရိုဟ်တၠအဝဵုပၞာန်ဂှ် ခါရနူကမ္မယှေန်ပၞာန်တံ ဆုတ်တိတ် ဒးဒုၚ်ကျ တှ်ေ ဗီုပၟိက်စိုတ် ဍေံဖန်ဇန်ဒၟံၚ်ဂှ် ဍေံတံဗဂေတ်ဖန်ဇန်ဟွံမာန်တှ်ေ ပိုဲသာညိ၊ ပစ္စပ္ပုန်လၟုဟ်ဏံ မုလေဝ် ဂွံဆက်စၟဳစ ဆက်ပဓါန်စ ဟွံမွဲပုဟ်၊ ပိုဲပဓါန်စ စၟဳစဂွံဂှ် ပေါဲဗတိုက် ကောန်ဂကူပိုဲ၊ PDF၊ NUG တံရ။ အဵုပေါဲဗတိုက်တံဏံ ယဝ်ရအသိၚ်ဍေံ သ္ကာတ်မြဟ်ကၠုၚ်ဏောၚ် ယဝ်ရဍေံလေဝ်ဒုၚ်ဒဝ်ဟွံမာန်၊ ဍေံလေဝ် ဒှ်ဒၟံၚ်လ္ပာ်ဆုတ်ဏောၚ်ဟီုတှ်ေ ပိုဲတံ စၟဳစသွက်ဂွံသာညိနွံ၊ ယဝ်ရဟဂှ်ဟွံသေၚ် လ္ပာ်ပၠန်ဂတးတံ ဟွံအံၚ်ဇၞး လ္ပာ်ဆုတ်ဏောၚ် ဟီုဟဂှ်တှ်ေ ညးဍုၚ်ကွာန်တံ ဒးဆဵုဂဗဒဒိုက် အလုံဍုၚ်ရ။
သၟာန်။ ။ စပ်ကဵုအကာဲအရာရဲပၠန်ဂတးတ္ရဲဏအ်တုဲလေဝ် အ္စာသ္ရဳဂၠိပ်ကဵုဗွဲသရောပ်ကီုညိ
သွဟ်။ ။ သရောပ်သ္ၚဳဂၠိပ်ဟီုတှ်ေ ရံၚ်ကဵုဇြဟတ်ပၠန်ဂတး PDF ကီု၊ ဇြဟတ်ပၠန်ဂတးကောန်ဂကူ ကောန်ဍုၚ် အရၚ် လုပ်ဒၟံၚ်ပေါဲဗတိုက်ပၠန်ဂတးလၟုဟ်ဂှ်လေဝ် ယဝ်ရနွံဒၟံၚ် မွဲဂကောံ၊ မွဲကရောံ၊ မွဲစွံတှ်ေ ပဵုနူဏံ ဍေံစိုပ် တရဴမာန်ဏောၚ်၊ တၚ်ဍိုန်လျဒှ်ဒၟံၚ်လၟုဟ်ဂှ် ပ္ဍဲကဵုကောန်ဂကူဂမၠိုၚ်ဂှ်လေဝ် ဍေံဟွံဒှ် မွဲအမိၚ်၊ မွဲအသံဏီ၊ ပ္ဍဲကဵု PDF တအ်ပၠန်ဂှ်လေဝ် ဗီုဂှ်ကီုရ။ ဟိုတ်ဒှ်သာ်ဂှ်ရ ၜိုတ်ပိုဲရန်ပတဝ်လဝ်ဂှ် ဍေံဟွံစိုပ်တရဴရ။ လၟုဟ်ဏံ ၜိုတ်အဲ တီဂှ်တှ်ေ လ္ပာ်ဇြဟတ်ကောန်ဂကူကီု၊ လ္ပာ်ဇြဟတ် PDF ကီုဂှ်တှ်ေ ညးတံ ဂ္စာန်ဒၟံၚ် ညံၚ်သ္ဂောံကောံ ကလောံညးသ္ကံဖအိုတ်တုဲ အခိၚ်ကာလကောံညးသ္ကံမွဲစွံ ဒှ်ကၠုၚ်မွဲဇြဟတ်တှ်ေ သၞဏံဂှ် ပိုဲကေတ်ဇၞးဍေံ လောဲလောဲရ။
အေဂှ်တှ်ေ ၜိုတ်အဲတီဟီုဂှ် ညးတံဂ္စာန်လွဳဒၟံၚ် ညံၚ်ရဴဂွံဒှ်မွဲဂကောံ၊ မွဲအမိၚ်၊ မွဲသံမာန်မှ ပိုဲဇၞးဍေံဏောၚ်၊ ဟဂှ်ဟွံသေၚ်တှ်ေ အခိၚ်ပၠန်ဂတးဏံ ဂၠိၚ်သ္ၚောဲအာမာန်ဏောၚ်၊ ကိစ္စအခိၚ်ပၠန်ဂတးဏံ ညံၚ်ဟွံဂွံဂၠိၚ်သ္ၚောဲဂှ် ညံၚ်ဂွံဒတုဲပေါဲပၞာန်ဏံ ပြဟ်ဟ်မာန်ဂှ် ညးတံ (ရဲပၠန်ဂတးတအ်) ချပ်ဗ္စာ ဂ္စာန်လွဳဒၟံၚ်ဏောၚ် အခိၚ်ကာလ တ္ၚဲဏံ အဲညာတ်ကၠိုဟ်ကေတ် သာ်ဂှ်ကီုရ။
