ရာန်ပ္တိတ်ဏာကၠေင်စက် နူလ္ပာ်တိဍာ်သေံတုဲ သွံရာန်ဒၟံင်ပ္ဍဲတိဍာ်ဗၟာ အကြာဒေသကျာ်ပိနွံဂှ်ရ ပ္ဍဲဂိတုမာတ် စၟတ်တ္ရဲ (၁၇) စနူအခိင်လ္ဒောဝ်တ္ရဲဂှ်တုဲ နူလ္ပာ်ညးတာလျိုင်သေံတံ တၟာတ်ထောံအခေါင်တတ်ကၠောံ ပ္ဍဲသၞေဟ်ကင် မၞုံဒၞါဲကွာန်ပလိုင်ဂျပါန်ကဵု ကွာန်ဂူၜဴ ဒေသကျာ်ပိဂှ်ရောင် ဂွံတီကေတ်ရ။
ကွဳစက်လ္ၚဵုတံဂှ်ဝွံ လုပ်ရာန်ကၠေင်စက် ပ္ဍဲဆေင်ကၠေင်မၞုံလ္ပာ်သေံ ဍုင်သခႅဠၜူရဳတုဲ ကလေင်သွံတြးဒၟံင်ကၠေင် အကြာဒေသကျာ်ပိ (သြင်ဗၟာ) နွံဒၟံင်ဂှ် ဂွံမိင်ကေတ်ပရိုင်ဂှ်ရ ကွဳစက် လုပ်တိတ်အာကၠုင်ဒၟံင်ဂၠံင်သၞေဟ်ကင်ပလိုင်ဂျပါန်ကဵု ဂူၜဴတံဂှ် လ္ပာ်သေံတံ တၟာတ်ထောံအခေါင်တတ်ကၠောံရောင် ညးစုက်လုက်ကဵု ဒပ်ပၞာန်သေံမွဲတၠ ဟီုရ။
“ဟိုတ်ဍေံဂွံတၟာတ်ထောံ ပၞော်ဂၠံင်လုပ်တိတ် (၂) ကွာန်ဏံဂှ်တှ်ေ ရဲတေင်လဝ် နူကဵုသွာင်အလဵုအသဳ (အံင်ဖေ) ဂှ်တှ်ေ ရဲလုပ်တိတ် ကၠတ်သွံဒၟံင်ကၠေင်တံဂှ် လုပ်တိတ်အာကၠုင်မံင် သ္ကုတ် (၂) ပၞော်ဏံ ဂၠိုင်တုဲ ဍေံ (သေံ) တၟာတ်ထောံရောင်” သာ်ဝွံ ညးဟီုရ။
ဆဂှ်သၟးဟွံက ဒၞါဲပၞော်ဂၠံင်ဍာန်လုပ်တိတ်ပယျဵုဂမၠိုင်ဂှ်လေဝ် လ္ပာ်ဒပ်ပၞာန်သေံတံ ဖျေံပတေင်လဝ် ဇြဟတ်ဂီုကၠီု ဗပေင်လဝ်ကောန်ပၞာန်ဂမၠိုင်တုဲ မင်စၟဳစၟတ်ဒၟံင်ကွဳစက်၊ ကွဳလိုန်ဓါတ်တအ်နွံရောင် ညးဆက်ဟီုရ။
ပြဟ်ဟ်ဏအ်မ္ဂး ပ္ဍဲသၞေဟ်ကင်ဂၠံင်ဍာန်လုပ်တိတ် ပၞော်ပယျဵုသေံကဵုဗၟာ ဒၞါဲကွာန်ပလိုင်ဂျပါန်ကဵု ကွာန်ဂူၜဴဂှ် သ္အာင်နူကဵုကွဳစက် ပလံင်ကွးဘာ၊ ပလံင်မၞိဟ်ယဲတုဲ ကွဳစက်လဵုမွဲ ဟွံကဵုအခေါင်တတ်အာကၠုင်ရောင် ညးဒေသကွာန်ဂူၜဴမွဲတၠ လဴထ္ၜးကၠုင်ရ။
တုဲပၠန် ကိစ္စဒပ်ဂီုကၠီုပၞာန်သေံတံ တၟာတ်ထောံပၞော်ဂၠံင်လုပ်တိတ်ပယျဵု ၜါပၞော်ဂှ်ဝွံ အဓိက သွက်ဂွံစဵုဒၞါအာ ပရေင်ကၠတ်ပ္တိတ်ကၠေင်စက်နူသေံဟေင်ဂှ်ရ သွက်ကောန်ကွာန်ပလိုင်ဂျပါန်၊ ဂူၜဴတံမ္ဂး ကေတ်ဓဝ်ကၠိုဟ်ခၠင်ကဵု ညးတာလျိုင်သၞေဟ်ကင်သေံတံဂှ်တုဲ နကဵုကွဳလိုန်ဓါတ် လုပ်တိတ်အာကၠုင်ဂွံမံင်ဏီရောင် ဂးရ။
“ကိစ္စတၟာတ်လဝ်ဂၠံင်ဍာန်လၟုဟ်ဏံ ဂွံကလေင်ပံက်ပၠန်ဂှ် ဒးမင်ရံင်ကေတ် ပေါဲဗတိုက်အမေရိကာန်ကဵု အေဿရေ ပန်ဗတိုက်အဳရာန်တံ တ္ၚဲဒေါံပန်ပှော်ဂှ်မှ ကလေင်ပံက်ကဵုဏောင် ပၞာန်သေံ ပ္ဍဲပယျဵုတံ ဟီုမံင်ဟဂှ်ရ” သာ်ဝွံ ညးဟီုရ။
အကြာမွဲၜါတ္ၚဲဝွံ ပ္ဍဲကဵုဆေင်စုတ်ကၠေင် (ပါန္နမာန်) ဇၞော်ဇၞော် မၞုံလ္ပာ်သြင်သေံ ဍုင်သခႅဠၜူရဳ (၂) ဆေင်ဂှ် ကွဳစက်ကီု၊ ကွဳလိုန်ဓါတ်ကီု လၟိဟ်ကဵုကၠံဖ္ဍိုက် ပြေင်ရေင်မင်ဒၟံင် သွက်ဂွံစုတ်ကၠေင်ဓါတ်၊ ကၠေင်စက်အရိုဟ်ဒဒှ်တ္ရဲနွံရောင် ညးဒဳကွဳစက်မွဲတၠ ဟီုရ။
ဒှ်သာ်ဂှ်ရ နူကဵုညးတာလျိုင် သွာင်ဒပ်ဗၠာဲသၟိင်သေံ၊ ဒပ်ပၞာန်သေံ၊ ရုင်အလဵုအသဳ (အံင်ဖေ) တံ ဖျေံစွံလဝ်မၞိဟ် ပ္ဍဲကဵုဆေင်ကၠေင်ဂမၠိုင်ဂှ်တုဲ ကဵုမင်ရံင်ကျောဝ် စၟဳစၟတ်ဒၟံင်လေဝ်နွံရောင် ဂွံတီကေတ်ရ။
