အပ္ဍဲတွဵုရးဍုင်မန်ဝွံ သွက်သ္ဂောံရာန်ကၠေင်စက်ဂှ် ဝါတ်ဂါတ်ဂၠိုၚ်ကၠုင်တုဲ သၟာတဵုၜဲတံ သွက်သ္ဂောံရတ်သီ ဗွဲမဂတာပ်အခိင်ဂှ် ဒှ်မံင်ခက်ခုဲဂှ်ရ ပ္ဍဲသၞာံဏံ သွက်သ္ဂောံဂွံၜဲဂှ် ဟွံချိုတ်ပၠိုတ်ရောင် သၟာတဵုၜဲတံ ဟီုရ။
ပပ္တံနူဂိတုမာတ်မံက်ဏံတုဲ သၟာင်နူသၞောတ်ဗ္ၜတ်သွံကၠေင်စက် သၞောတ်စုံ/မဂှ်မ္ဂး ညးရာန်ကၠေင်စက် သွက်စကာကမၠောန်တံဂှ် လိက်ထံက်ဂလာန်မဆေင်စပ်ကီု သီုကွဳစက်စကာဂှ်ပါဟေင် သွံကဵုဂှ်ရ သၟာတဵုလွဳမွဲဒကုတ်မွဲဒကဴတံ သ္ဂောံဂွံကၠေင်စက်ဂှ် ဒှ်မံင်ခက်ခုဲရ။
ၜဲရတ်သီလဝ်ဂမၠိုၚ်တံဂှ်ဝွံ စဵုကဵုအခိင်လအ်လအ် ကၠောန်သ္ပဗုတ်ကဵုဟွံမာန်ဏီဂှ်ရ သၟာင်နူၜဲဍာ်ဒကေဝ်စှ်ေဂှ်မ္ဂး ကၠုတ်တိုန်တုဲ လီုလာ်အာမာန်ရဂှ်လေဝ် သၟာတဵုၜဲ နူကျာ်မြဟ်မွဲတၠ ဟီုရ။
“ကၠုင်ကဵုကာမှ ဍေံတံ သွံကဵုရ။ ကာရတ်သီၜဲတံ ဂွံအာဒဵုကဵုဆေင်ကၠေင်ဂှ် ဟွံပြေပြံင်ပုဟ်။ တုဲတှ်ေ အခိင်လၟုဟ်ဏံ သွက်ဂွံရတ်သီဂှ် ကိစ္စဇၞော်မံင်။ ဆဂး ဟွံဂွံကၠေင်တုဲ စကာစက်ဟွံမာန်တှ်ေ ဗွဲမဂတာပ်အခိင် ဒတုဲဟွံမာန်ပုဟ်။ ဗြဲဂူတုဲ လဇုဲအာတှ်ေ ဍာ်ဒကေဝ်ၜဲလေဝ် စှ်ေမာန်ရ။ သွက်ဂွံကၠောန်ကဵုဇြဟတ်မၞိဟ်ဂှ် ဟွံပြေပြံင်ပုဟ်။ သၟာကမၠောန်တံလေဝ် ဂၠာဲဟွံဂွံပုဟ်” သာ်ဝွံ ညးဟီုရ။
ပ္ဍဲပွိုင်ဍုင်ကျာ်မြဟ်၊ မုဟ်ဍုင်၊ ၜါသွာင် ကေုာံ ၜဳက္လေင်ဂှ်ဝွံ လၟိဟ်ၜဲကဵုကၠံဨက ရတ်သီဟွံမာန်ဏီတုဲ ဒးဒေံါဇူလဝ်နွံရဂှ်လေဝ် နူကဵုဌာန်ပရိုင်ဗၠးၜးမန် လ္ၚတ်ဂၠိုက်ဂၠာဲတုဲ ဂွံတီကေတ်ရ။
ကၠေင်စက်မနွံပၟိက် သွက်သ္ဂောံရတ်သီဗုတ် သတ်ဆုသတ်ဒုန်ကြံင်ဍုဟ်ဂမၠိုၚ်ဂှ် ကဵုဖျုန်တြးကဵုညိ နူကဵုဂအုပ်ဂကောံသြောံသ္ၚုကၟိန်ဍုင်ဗၟာ ဖတိုက်ဖအောဝ်လဝ် ပွိုင်ဍုင်/အရာပ် မဆေင်စပ်တံကီုလေဝ် ပ္ဍဲကဵုဗလးတိဏံ ဟွံကၠောန်သ္ပရေင်တၠုင်ကဵုရ ဂှ်လေဝ် သၟာတဵုလွဳတံ ဟီုရ။
အခိင်လၟုဟ်ဏံ ဟိုတ်နူသ္ဂောံဂွံကၠေင်စက်ခက်ခုဲကီု ကေုာံ သီုၚုဟ်သၠုင်တိုန်မံင်ဂှ်ရ ကမၠောန်တဵုၜဲသၟးဟွံသေင် သွက်ကမၠောန်သြောံကသီုလေဝ် ဒးဘဲဇီုကပိုက်ကၠုင်မာန် ရောင် သၟာတဵုလွဳတံ ဒှ်မံင်ဂဝိင်ရ။
“ကၠေင်ၚုဟ်က္ဍင်ဂှ် ကဵုမာန်ကီုလေဝ် ၜိုတ်နွံပၟိက်ဂှ် ရာန်ဟွံဂွံပုဟ်။ ဂိတုဏံအိုတ်တှ်ေ သွက်ဂွံတဵုသြောံဂှ် ဒးပလေဝ်ပလေတ်ရဏောင်။ နူလၟုဟ်ဏံ ဆေင်တံ ကၟာတ်မံင်ရ။ တုဲတှ်ေ သွက်ဂွံကၠောန်ဝါကဵုဂၠဴဂှ်လေဝ် ဂၠဴတံဂှ် သွံထောံအိုတ်ယျ။ စိုပ်အခိင်တုဲ မုမှ ကၠောန်ဟွံမာန်၊ တဵုဟွံမာန်တှ်ေ ဒးဆဵုဂဗခက်ခုဲ ဗွဲမဂၠိုၚ်ဏောင်” သာ်ဝွံ သၟာတဵုလွဳနူဇြပ်ဗုမွဲတၠဂှ် ဟီုရ။
ညးကၠုင်ရာန်ကၠေင်စက် နကဵုဂါလန်/စေဝ်တံဂှ် သၞေဟ်ကင်စၟဳစၟတ်ကမ္မယှေန်ပၞာန်တံ ကံက်ကေတ်မံင်သြန် မွဲဂါလန် (၁) ဠက်နွံရဂှ် သၟာတဵုၜဲတံ ဟီုရ။
ဟိုတ်နူပရေင်ဇီုကပိုက် ရာန်ကၠေင်စက်ဝါတ်၊ ၚုဟ်သၠုင်တိုန်ဂှ်တုဲ ကပေါတ်ရာန်နူလ္တူဍုင် ၚုဟ်သၠုင်တိုန်ကီုလေဝ် ကပေါတ်တိတ်နူဒေသတံဂှ် ၚုဟ်စှ်ေမံင်ဖိုဟ်ရ။
အတိုင်ၚုဟ်ကၠေင်စက်မ္ၚးမ္ဂး ပ္ဍဲလ္တူဍုင်တွဵုရးဍုင်မန်ဝွံ ကၠေင်စက်မွဲလဳတာ စဵုကဵု (၁) ဠက်ဒကေဝ်ပြင် ၚုဟ်နွံမံင်တုဲ သ္ဂောံရာန်ကေတ် ဗွဲမရုံဂပ်ဍိုက်ပေင်ဟွံဂွံဂှ်လေဝ် ဂွံတီကေတ်ရ။
