ပ္ဍဲတွဵုရးဍုၚ်မန်ဝွံ ဟိုတ်နူခက်ခုဲကၠေၚ်စက်တုဲ ဍာ်သုၚ်သၟးဇ္ၚး (၂၀) လဳတာမွဲဗူဂှ် ၚုဟ်သၠုၚ်တိုန်အာ စဵုကဵု (၂၀၀၀) ဒကေဝ်ရဂှ် ဂွံတီကေတ် နူတၠကမၠောန်ဍာ်သုၚ်သၟးဇ္ၚး အပ္ဍဲပွိုၚ်ဍုၚ်မတ်မလီုရ။
ဍာ်သုၚ်သၟးဇ္ၚး (၂၀) လဳတာမွဲဗူ နူကဵုသွံတြးဒၟံၚ် (၁၅၀၀) ဒကေဝ်ဂှ် ဟိုတ်နူဒးဆဵုဂဗခက်ခုဲ ကၠေၚ်စက်ပိုတ်သ္ကုတ်တုဲ စပ္တံနူဂိတုအေဗရဴ (၁) ဏံ ဍာ်သုၚ်သၟးဇ္ၚး (၂၀) လဳတာမွဲဗူဂှ် ပြံၚ်လှာဲသွံအာ နကဵုၚုဟ် (၂၀၀၀) ဒကေဝ်ရ။
ဟိုတ်နူကၠေၚ်စက်ပိုတ်သ္ကုတ်ကီု၊ ၚုဟ်ကၠေၚ်စက်သၠုၚ်တိုန်ကီု သီုၚုဟ်ကပေါတ်နာနာ သၠုၚ်တိုန်ကၠုၚ်ကီုဂှ်ရ အတိုၚ်တၚ်တုပ်စိုတ်ပ္ညဳပ္ညပ် တၠကမၠောန်ဍာ်သုၚ်သၟးဇ္ၚးဂမၠိုၚ်တံတုဲ သၠုၚ်ပ္တိုန်ၚုဟ်ရဂှ် တၠကမၠောန်ဍာ်သုၚ်သၟးဇ္ၚး ပ္ဍဲပွိုၚ်ဍုၚ်မတ်မလီုတံ ဟီုရ။
“အဓိက ၚုဟ်ကၠေၚ်စက်သၠုၚ်တိုန်ကီု။ ကပေါတ်စကာ ကမၠောန်ဍာ်သၟးဇ္ၚး သၠုၚ်တိုန်ကၠုၚ်။ လၟုဟ်ဏံ ၚုဟ်ကပေါတ်သၠုၚ်မံၚ်တှေ် ၚုဟ်သၟာကမၠောန်တံလေဝ် ၜိုတ်သ္ပမာန် အကာဲအရာ ဒးသၠုၚ်ကဵုနွံရ။ ဟိုတ်ဂှ်ရ ဍာ်သုၚ်သၟးဇ္ၚး (၂၀) လဳတာမွဲဗူ နူ (၁၅၀၀) ဂှ် စနူဂိတုအေဗရဴ (၁) ဏံ ဒးသွံအာ နကဵုၚုဟ် (၂၀၀၀) ဒကေဝ်ရ။ ဣဏံဂှ်လေဝ် အတိုၚ်တၚ်တုပ်စိုတ်ပ္ညဳပ္ညပ် တၠကမၠောန်ဍာ်သုၚ်သၟးဇ္ၚးတံ သီုဖအိုတ်ဂှ်ရ သၠုၚ်ပ္တိုန်ဏာၚုဟ်” သာ်ဝွံ တၠကမၠောန်ဍာ်သုၚ်သၟးဇ္ၚး လ္တူဍုၚ်မတ်မလီုမွဲတၠ ဟီုရ။
ဆေၚ်စပ်ကဵု ပြံၚ်လှာဲၚုဟ်မး ဗူဍာ်သုၚ်သၟးဇ္ၚး (၂၀) လဳတာဂှ်မ္ဂး ကဵုသမ္တီလလောၚ်တြး ကုညးဍုၚ်ကွာန်သုၚ်စောဲတံတုဲ စနူဂိတုအေဗရဴ (၁) ဏံ ပြံၚ်လှာဲၚုဟ်မးတုဲ သွံဏာလဝ်ရ။
အပ္ဍဲပွိုၚ်ဍုၚ်မတ်မလီုဝွံ ကမၠောန်ဍာ်သုၚ်သၟးဇ္ၚး နွံအကြာ (၂၀) တုဲ ကောန်အရာပ် လ္တူဍုၚ်မတ်မလီုသၟးဟွံသေၚ် စဵုကဵုအရာပ် / ကွာန် မၞုံအပ္ဍဲပွိုၚ်ဍုၚ်မတ်မလီုဂမၠိုၚ်ဂှ် ဗက်သွံတြးဒၟံၚ်ကဵု ဍာ်သုၚ်သၟးဇ္ၚးရ။
ပ္ဍဲတွဵုရးဍုၚ်မန်ဝွံ ကၠေၚ်စက်ဂှ် ၜိုတ်နွံပၟိက် ရာန်ဟွံဂွံကီု၊ ပ္ဍဲဆေၚ်သွံကၠေၚ်ဂမၠိုၚ် ကၠေၚ်ပိုတ်သ္ကုတ်ကီုဂှ်ရ ဒးဆဵုဂဗခက်ခုဲကၠေၚ် စဵုကဵုဗဒဲါပွိုၚ်မွဲဂိတုဏံမ္ဂး သွက်သ္ဂောံဂွံကၠေၚ်ဂှ် ဒးမၚ်ပြေၚ်ရေၚ်ရာန်ကၠေၚ် အခိၚ်လအ်မံၚ်ဖိုဟ်ရ။
ဟိုတ်နူခက်ခုဲကၠေၚ်စက်တုဲ ကမၠောန်ဒးဂေတ်မံၚ်ကဵု ကၠေၚ်စက်တံဂှ် စဵုကဵုဒးဒေံါဇူကမၠောန်နွံကၠုၚ်တုဲ စရိတ်ပရေၚ်ပလံၚ်ဗ္စိုပ် ကေုာံ ၚုဟ်ကပေါတ်ဂမၠိုၚ်ဂှ်လေဝ် သၠုၚ်တိုန်ကၠုၚ် ဟွံမွဲကဵုသၞောတ်ဗ္ၜတ်ရ။
အခိၚ်လၟုဟ်ဏံ ပ္ဍဲကဵုဆေၚ်သွံကၠေၚ် မၞုံအပ္ဍဲတွဵုရးဍုၚ်မန်ဝွံ ကၠေၚ်ဓာတ်မွဲလဳတာ နူကဵု (၃၇၆၅) ဒကေဝ်ဂှ် ဒှ်အာ (၄၈၂၅) ဒကေဝ်၊ ကၠေၚ်ဒဳဇြာမွဲလဳတာ နူကဵု (၅၀၃၀) ဒကေဝ်ဂှ် သၠုၚ်တိုန်အာ စဵုကဵု (၆၄၂၀) ဒကေဝ်တုဲ ပ္ဍဲကဵုဗွဝ်ဖျာမ္ၚး (ဒမၠုက်) ဂှ်မ္ဂး ကၠေၚ်စက်မွဲလဳတာ စဵုကဵု (၂၀၀၀၀) ဒကေဝ် သွံရာန်မံၚ်အိုတ်ရ။
