ပ္ဍဲကွာန်ဒပ်ပၞာန်ကရေၚ်ဒတုဲဖဵုဒဳမဝ်ကရေဇြဳ (ဒဳကေဗဳအေ) ထိၚ်ဒဝ် ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ်ဝွံ ဝိုၚ်ဝေၚ်ဇျှၚ်လံၚ်သြန် ဒေံါဇူလဝ်ဂမၠိုၚ်ဂှ် က္လေၚ်ပံက်တုဲ နူကောန်သ္ဂံၚ်ဒဳကေဗဳအေတံ ကေတ်ကဵုမံၚ်ဂီုကၠီု နကဵုကယျိုၚ်ပၞာန်ပေၚ်ပေၚ်ရောၚ် ဂွံတီကေတ်ရ။
ဂကောံရပ်လွဟ်အပ္ဍဲဒေသကဵု တၠကမၠောန် ပြံၚ်ပဆုဲပံက်ဒၟံၚ် ဝိုၚ်ဝေၚ်္ၚၚ်လံၚ်သြန် မွဲကွာန်တုဲမွဲကွာန်တံဂှ်ဝွံ ဝိုၚ်ဝေၚ်ဇျှၚ်လံၚ်သြန် ပ္ဍဲကွာန်မျကုၚ်၊ ဥူတိုဝ်ချံၚ် ကေုာံ မိုဲဟံက် ဒေံါဇူလဝ် နူကၞောတ်သၞာံအိုတ် (၂၀၂၅) ဂှ် က္လေၚ်ပံက်ဏာလဝ်ရ။
ယၚ်ဝိုၚ်ဝေၚ်ဇျှၚ်လံၚ်သြန်ဂမၠိုၚ်ဂှ်ဝွံ တၠကမၠောန်မစုက်လုက်ကဵု ဂကောံ DKBA၊ BGF တံ ကေတ်လဝ်ကာန်ထရိုက်တုဲ ကောန်သ္ဂံၚ်ဒဳကေဗဳအေတံ ကေတ်ကဵုမံၚ်ဂီုကၠီု နကဵုကယျိုၚ်ပၞာန်ပေၚ်ပေၚ်ရောၚ် ညးတြုံ နူဒေသကျာ်မြဟ်မွဲတၠဂှ် ဟီုရ။
“ဝိုၚ်ဝေၚ်တံ က္လေၚ်စကၠုၚ်ပၠန်ဣရ။ လၟုဟ် က္လေၚ်ပံက်ကၠုၚ် ဗီုကၠာတေံပၠန်ရ။ ဨပ္ဍဲကွာန်တံဂှ် ဗ္ဂေတ်အလန်တုဲ ပံက်မံၚ်ရ။ ပ္ဍဲကဵုကွာန်တၞဟ်တၞဟ်ဂှ်တှေ် လကျာ်တံ၊ ကောန်ကွာန်တံ ဂွံပံက်ဂှ် စိုတ်ဟွံထတ်တုဲ ဟွံဂွံအခေါၚ်ပံက်ရ။ မုပေဲါသဘၚ်လေဝ်ဟၟဲပုဟ်။ ပေဲါဇာတ်မွဲဇာတ်ဂှ် လိၚ်လဝ်တ္ၚဲဇမၠိၚ်တုဲ ပြံၚ်အာကွာန်တေံ၊ ကွာန်အဏံတုဲ ပံက်မံၚ်ရ” သာ်ဝွံ ညးဟီုရ။
ဟိုတ်နူအဆက်ဖဵု ပံက်ဝိုၚ်ဝေၚ်ဇျှၚ်လံၚ်သြန်ဂှ်တုဲ သၞာံတုဲကၠုၚ်တေံမ္ဂး အပ္ဍဲကဵုကွာန်တံဂှ် ကပေါတ်ပ္ဍဲသ္ၚိဂမၠိုၚ်၊ သတ်ဆုသတ်ဒုန် တိတ်နူကၠအ်ဂူဂမၠိုၚ် ကၠေံဒၟံၚ်မွဲနှေံနှေံတုဲ ပရေၚ်ပကီုပရာပ်အပ္ဍဲသ္ၚိဂမၠိုၚ်လေဝ် ဂၠိုၚ်တိုန်ကၠုၚ်ကၠးကၠးဖ္ဍးဖ္ဍးရဂှ် သၟတ်နူကွာန်ကအ်ဒုန်ကအ်ပၞဟ်မွဲတၠ ဟီုရ။
လ္တူဝိုၚ်ဝေၚ်ဇျှၚ်လံၚ်သြန် က္လေၚ်မံက်ကၠုၚ်ဏံဂှ်မ္ဂး ညးဒေသတံ ဒှ်ဂဝိၚ်ဂွိၚ်ဖေက် ပရေၚ်ပကီုပရာပ် ကေုာံ ပရေၚ်ကၠတ်ဂၠံက်ပ္ဍဲသ္ၚိဂမၠိုၚ် က္လေၚ်ကတဵုဒှ်ကၠုၚ်ရ။
“သၞာံတုဲကၠုၚ်တေံ ပ္ဍဲကွာန်ပိုဲဂှ် မွဲဗ္တံဓဝ် ကွဳလိုန်ဓာတ်ကၠေံအာ (၃) ဖ္ဍိုက်ရ။ ကုသဵုခိုဟ် ရပ်ဂွံကမၠတ်တံရ။ ကၠာတေံတှေ် ဟွံကေၚ်မိၚ်ဗီုဂှ်ပုဟ်။ နူစတမ်ဂှ်တှေ် မိပ်ခိုဟ်ကီုလေဝ် လအ်ကၠုၚ်တှေ် ပရေၚ်ယှုက်ထုဲတံဂၠိုၚ်ဏောၚ်” သာ်ဝွံ သၟတ်ဂှ် ဟီုရ။
အကံက်အခေါန် ဝိုၚ်ဝေၚ်ဇျှၚ်လံၚ်သြန် ပံက်လဝ်ဂမၠိုၚ်ဂှ်ဝွံ တၠကမၠောန်ဂမၠိုၚ်တံ ကံက်ကေတ်တုဲ ကောန်ဂကောံဒဳကေဗဳအေတံ ဂွံမံၚ်အကံက်အခေါန် ပ္ဍဲဆေၚ် နွံအပ္ဍဲအကြာဝိုၚ်ဝေၚ်ဂမၠိုၚ်ဂှ်ကီု ဂွံတီကေတ်ရ။
စပ္တံနူသၞာံ (၂၀၂၃) တုဲကၠုၚ်တေံတုဲ ပ္ဍဲပွိုၚ်ဍုၚ်ဗွဲမဂၠိုၚ်ဂှ် ထ္ၜးဟိုတ်ကဵုပေဲါသဘၚ်တုဲ ဂကောံသၟဝ်တဲကမ္မယှေန်ပၞာန်တံ သွက်သ္ဂောံဂွံသြန်ဂအုံဂှ် စပံက်ကၠုၚ် ဝိုၚ်ဝေၚ်ဇျှၚ်လံၚ်သြန်ရ။ ဗွဲကြဴဂှ်မ္ဂး ဂကောံရပ်လွဟ်အပ္ဍဲဒေသ သၟဝ်တဲကမ္မယှေန်ပၞာန်တံ လေဝ် က္ဍိုက်က္ဍိုပ်ပါလုပ်ကၠုၚ်ရ။
ဟိုတ်နူဝိုၚ်ဝေၚ်ဇျှၚ်လံၚ်သြန်ဂမၠိုၚ်ဂှ် စိုတ်ဒှ်ပလာပ်ပထုဲတုဲ စပ်ကဵုပရေၚ်ထတ်ယုက်လေဝ် ဒးဇီုကပိုက်ကၠုၚ်ကီုရ။ ဟိုတ်ဂှ်ရ ညးဒၟံၚ်တန်တဴမံၚ် ဗဒဲါဝိုၚ်ဝေၚ်ဇျှၚ်လံၚ်သြန်ဂမၠိုၚ်တံ ပြံၚ်ဆုဲကၠုၚ်သ္ၚိဒၟံၚ်လေဝ် နွံကၠုၚ်ကီုရ။
