အခိင်ညးဍုင်ကွာန်တအ် ကြေပ်ဂြတ်ဒမံင်ကဵု ပရေင်ကၠေင်စက်ဇၞော်ကဵုဒြဟတ်ဂှ် ပ္ဍဲဆေင်သွံကၠေင်လ္ၚဵုတအ် ပါ်ခြာအဆင့်တုဲ သွံဒမံင်ကၠေင် ၚုဟ်တၞဟ်ခြာနွံရောင် ညးရာန်ကၠေင် ဒးဒုင်ပါ်ခြာၚုဟ်ကၠေင် နူဍုင်ဇြပ်ဗုမွဲတၠ ဟီုလဴထ္ဘးရ။
ၚုဟ်ကၠေင်ဂှ် ကာလညးတာလျိုင် မၞုံကဵုအဆင့်မ္ဂး တၠဆေင်ကၠေင်တအ် သွံကဵုအတိုင်ၚုဟ်လုပ်သၞောဝ် ပကတိတုဲ ကာလညးဍုင်ကွာန်ဓမ္မတာတအ်ရာန်မ္ဂး သၠုင်လဝ်ၚုဟ်တုဲ သွံဒမံင်ရောင် တၠကွဳစက်ရာန်ကၠေင်မွဲတၠ ဟီုလဴထ္ဘးရ။
“ဠ ညးတာလျိုင်မၞုံကဵုကဆင့် ဗီုကဵုသၞာဲဒဴတအ်၊ ဗီုကဵုဒပ်ပၞာန် (ဗၟာ) တအ်တှ်ေ တၠဆေင်သွံကၠေင်တအ် သွံကဵုမွဲၚုဟ်၊ ဠ ညးဍုင်ကွာန်ဓမ္မတာတအ်တှ်ေ သၠုင်လဝ်ၚုဟ်တုဲတှ်ေ ပါ်သွံကဵုမံင် ၚုဟ်မွဲဗီု၊ ဂွံလဝ်စၞောန်ဗီုဂှ်ရဟာဂှ် ကေတ်ဟွံဒးရ၊ ၚုဟ်စုတ်လဝ်ပ္ဍဲဆေင်ဂှ်မွဲဗီု၊ ၚုဟ်သွံမံင်ကဵုညးဍုင်ကွာန်ဂှ် မွဲဗီု” သာ်ဝွံ နာဲဃာင်ထောန် (ဗလေတ်လဝ်ယၟု) ဂှ် ဟီုရ။
ကာလညးတာလျိုင် မၞုံကဵုအဆင့်တအ်၊ ဗီုကဵုဂကောံသၞာဲဒဴတအ်၊ ဗီုကဵုဒပ်ပၞာန် (ဗၟာ)၊ ဂကောံသ္ၚိကၟိန်ဒပ်ပၞာန် (ဗၟာ) တအ်မ္ဂး နူကဵုဆေင်သွံကၠေင်တအ် သွံကဵုၚုဟ်လုပ်သၞောဝ်တုဲ ကာလညးဍုင်ကွာန်ဓမ္မတာတအ်မ္ဂး သၠုင်လဝ်ၚုဟ်ကီု၊ ဖအောန်ဖျေံလဝ် (လဳတာ) ဂှ်ကီု နွံဒမံင်ရောင် ညးဆက်ဟီုထ္ဘးရ။
ၚုဟ်ကၠေင်စက်ဂှ် နူကဵုဌာနဇြဟတ် (စွမ်းအင်) တအ် စၟတ်လဝ်ဂှ်မ္ဂး ကၠေင်ဓာတ်မွဲလဳတာဂှ် ၜိုန်ရအကြာ (၅၀၀၀) နွံကီုလေဝ် ကာလသွံတြးကဵုညးဍုင်ကွာန်တအ်ဂှ် မွဲလဳတာ (၇၅၀၀) တုဲ မွဲလဳတာဂှ် ပဵုတၞဟ်ခြာဒမံင် (၂၀၀၀) ပြင်ရ။
“အခိင်ဏအ်ဂှ် မင်ပတိတ်စမံင်ပရဲ ဗီုညးဗီုညးရ၊ ရဲသွံကၠေင်တအ်ဂှ် ဇၟာပ်ကၠေင်ဒှ်ခက်ခုဲ မွဲမွဲသာ်တှ်ေ ပၞော်ဍေံပတိတ်စပရဲမွဲမွဲသာ် နွံတွဵုရ၊ ရဲဂွံလဝ်အဆက်ကဵု မၞိဟ်နွံကဵုတာလျိုင်ကဆင့်တအ်လေဝ် ပတိတ်သွံစကၠေင် ၚုဟ်သၠုင်သၠုင်ၜါပိဆ၊ အိုတ် ကၞောတ်တှ်ေ ဗီုညးကဵုညး မင်ပတိတ်စပရဲ လတူညးဍုင်ကွာန်တအ်တုဲတှ်ေ ညးဍုင်ကွာန်တအ်ပၠန်ရ ဒှ်ဒဒိုက်” သာ်ဝွံ တၠကေမၠာန်တဵုလွဳကၠအ်ထ္ဘိုတ် နူပွိုင်ဍုင်ဇြပ်ဗု မွဲတၠဂှ် ဟီုရ။
ၚုဟ်ကၠေင်ပ္ဍဲတွဵုရးဍုင်မန်ဝွံ ကၠေင်ဓာတ်မွဲလဳတာဂှ် နွံၚုဟ်အကြာ (၅၀၀၀) ပြင်တုဲ ကၠေင်ဒဳဇြေဝ်မွဲလဳတာ နွံၚုဟ်အကြာ (၇၀၀၀) ပြင်ရ။ တော်ကဵုအလုံဍုင်မ္ဂး ဍုင်မန်ဂှ် ၚုဟ်မးကၠေင်သၠုင်အိုတ်ရ။
ဆက်စပ်ကဵုကၠေင်စက်တုဲ ပရေင်ဟိုတ်ဖဵုမွဲမွဲသာ် ယဝ်ရဟွံပေင်စိုတ်နွံမ္ဂး ဆက်ဖုင် ပတိုန်ထ္ဘးမာန် နူကဵုကမ္မတဳထိင်ဒဝ်တြးကၠေင်တအ် ကဵုလဝ်မဂၞန်ဖုင်နွံတုဲ ဆေင်သွံကၠေင် တြးသွံကၠေင်ဟွံဓဝ်ယာလ္ၚဵုဂှ် ဒးဒုင်စၟဳစၟတ်၊ ဒးဒုင်ရပ်ထိင်ကၠုင်လေဝ်နွံရ။
