ပ္ဍဲပွိုင်ဍုင်ၜဳက္လေင်၊ တွဵုရးဍုင်မန်ဝွံ ဒးဒုင်ဗ္တိုက်မံင်ကဵု က္ၜင်ကျာအဆက်ဆက်တုဲ သီုဒးဒုင်ထ္ပိုတ်လဝ် လာင်ဖုင် ကေုာံ အေန်တာနိတ်ဂှ်ရ ညးဒေသ မၞုံအပ္ဍဲကွာန်တံ ပရေင်ဆက်စၠောံပိုတ်မံင်ရောင် ဂွံတီကေတ်ရ။
အပ္ဍဲကွာန်လေကေ၊ ဝေန်တာပါန် ကေုာံ ဂကောံကွာန်မျေတ်ကျိုဝ် ပွိုင်ဍုင်ၜဳက္လေင်ဂှ် စပ္တံနူဂိတုအေဗရဴ စၟတ်တ္ၚဲ (၁) တုဲကၠုင်ဏံ နူကဵုဂကောံကမ္မယှေန်ပၞာန်တံ ပန်ဗ္တိုက်မံင်ကဵုက္ၜင်ကျာပၞာန် ဇၟာပ်ဗ္တံတ္ၚဲရဂှ် ဂွံတီကေတ် နူညးဒေသၜဳက္လေင်ကဵု လိက်လလောင် ဗော်သွးကရေင် (ကေအေန်ယူ) ရ။
ပ္ဍဲကဵုပန်ဗ္တိုက်ထောံဖျေံဗမ်ဂှ်ဝွံ သၟာင်နူသ္ၚိဒမံင်တုဲ သီုကဵုပန်မံင်တိုင်ဖုင် (ဖုန်းတာဝါတိုင်) ဂှ်ရ သၞောတ်ပရေင်ဆက်စၠောံဂမၠိုင် ပိုတ်သ္ကုတ်မံင်တုဲ သွက်သ္ဂောံသ္ပဒတန် အကာဲအရာ အပ္ဍဲဒေသဂှ် ဝါတ်ဂါတ်မံင်ရောင် ညးရီုဗင်ပဲါဒဴဘဲပၞာန် နူၜဳက္လေင်မွဲတၠ ဟီုရ။
“တိုင်ဖုင်တံဂှ် ဒးဒုင်ပလီုကဵုဗမ်ရ။ လၟုဟ်ဏံ ကေတ်အဆက်စၠောံဟွံဂွံပုဟ်။ ပ္ဍဲကဵုကွာန်ဂှ်လေဝ် ညးမွဲဟၟဲပုဟ်။ တုဲတှ်ေ ဂၠံင်အာ ကွာန်လေကေ နူကဵုဍုင်ၜဳက္လေင်ဂှ်လေဝ် ကၟာတ်လဝ်ရ။ ညးဒေသတံ အာလ္ပာ်ဍုင် ဟွံဂွံပုဟ်။ လၟုဟ် ဂွံအာကဵုရီုဗင်ဂှ်လေဝ် ဟွံပြေပြံင်ပုဟ်။ ကဵုညးမွဲလေဝ် ဆက်စၠောံဟွံဂွံပုဟ်” သာ်ဝွံ ညးဟီုရ။
ဂကောံကွာန် မၞုံပ္ဍဲပွိုင်ဍုင်ၜဳက္လေင်၊ ခရိုင်ကဝ်တူလေ၊ တိဍာ်ဗော်သွးကရေင် (ကေအေန်ယူ) ထိင်ဒဝ်ဂှ်ဝွံ စနူဂိတုအေဗရဴ (၁) စဵုကဵု (၅) ဂှ် ဒးဒုင်ဗ္တိုက်မံင်ကဵု က္ၜင်ကျာအဆက်ဆက်တုဲ ဟိုတ်နူထောံဖျေံဗမ်ဂမၠိုင်ဂှ်ရ သ္ၚိဒမံင် ဟွံအောန်နူ (၃၀) မ၊ ဘာလကျာ် (၂) ဘာ လီုလာ်အာရဂှ် ကေအေန်ယူ လလောင်ပ္တိတ်လဝ်ရ။
နကဵုညးဒေသဂမၠိုင်တံဝွံ ဟိုတ်နူဒးဒုင်ဗ္တိုက်ကဵုက္ၜင်ကျာဂှ်ရ ဒးဂြိပ်ပဲါဒဴအာ ဒၞာဲဗၠးဘဲတုဲ ညးလ္ၚဵုတံ ဂြိပ်ပဲါဒဴအာ ပ္ဍဲဘာ ကေုာံ ရုင်ဂဥုဲ ပ္ဍဲဒေသတိဍာ် ကေအေန်ယူ ထိင်ဒဝ်ဂှ်ရ။ ညးလ္ၚဵုတံပၠန်ဂှ်လေဝ် ဂြိပ်ပဲါဒဴအာ ပ္ဍဲဂြိုပ်တေံရ။
ညးဒေသၜဳက္လေင်မွဲတၠဂှ် “နူတနေံဏံလေဝ် ၜင်ကျာတံပဝ်မံင်ရ။ ပိုဲတံ ဒှ်ဓဝိင်ကွေံရ။ ဍေံတံဂှ် ဒၞာဲဟွံရုဲ ပန်မံင်ပြးရ။ ပ္ဍဲသ္ၚိလေဝ် ဟွံဂီုကၠီုပုဟ်။ မ္ၚးလေဝ် ဟွံဂံင်တိတ်ပုဟ်” သာ်ဝွံ ဟီုရ။
အတိုင်ကေအေန်ယူလလောင်ပ္တိတ်လဝ်မ္ဂး ဒပ်ပၞာန်ဗၟာသီအဝဵုတံဝွံ စပ္တံနူသၞာံ (၂၀၂၁) တုဲကၠုင်တေံရ စွံပွန်ကဵု ကောန်ညးဍုင်ကွာန်၊ စမြိုင်ဘာသာဂမၠိုင်၊ ဘာဗ္တောန်လိက်ဂမၠိုင် ကေုာံ ရုင်ဂဥုဲဂမၠိုင်တုဲ ဆက်ကၠောန်သ္ပ ဗ္တိုက်ဒမံင်ကဵုက္ၜင်ကျာရောင် ဂွံတီကေတ်ရ။
ဟိုတ်ဂှ်ရ ညးဒးဂြိပ်ပဲါဒဴနူဒေသတံ သာဂၠိုင်ကၠုင်တုဲ နကဵုကေအေန်ယူ ကဵုမံင်အရီုဗင်ကာတၟေင် သွက်ညးဂြိပ်ပဲါဒဴတံရ။
အပ္ဍဲသၞာံ (၂၀၂၅) တုဲကၠုင်ဏံ ဟိုတ်နူကမ္မယှေန်ပၞာန်တံ ဗ္တိုက်ကဵုက္ၜင်ကျာတုဲ ပ္ဍဲကဵုညးဒးဘဲဝပ်ချိုတ်ဂျိုင် (၉၆) တၟံကၠံပြင်ဂှ် ကတဵုဒှ်အာ ပ္ဍဲဒေသ ဒးဒုင်ထ္ပိုတ် ပရေင်ဆက်စၠောံရဂှ်လေဝ် ဓမံက်ထ္ဘးလဝ် ပ္ဍဲလိက်ဒုင်စဳရေင် ဂကောံပရဝ်ဂျက်မျာန်မာ အေန်တာနိတ်ရ။
