ပ္ဍဲဂကောံအလဵုအသဳတွဵုရးဍုင်မန် ဒပ်ပၞာန်ဗၟာအုပ်ဓလီုလဝ်ဂှ်ဝွံ ညးစၞးကၠတ်ထဝ် နူဗော်ညဳသၟဟ်မန် (၂) တၠ ဂွံဒုင်ခါန်ကၞက်ပ္တိုန် နဒဒှ်ဝန်ဇၞော်ရောင် သ္ပဒတန်ဏာ ပ္ဍဲကောံဓရီုကၠတ်ထဝ် ဂိတုအေဗရဴ (၇) တ္ၚဲဏံရ။

ပ္ဍဲကဵုပေဲါကောံဓရီုကၠတ်ထဝ်တွဵုရးဍုင်မန် အလန်တတိယ မကၠောန်ဗဒှ် ဂိတုအေဗရဴ (၇) တ္ၚဲဏံဝွံ နူကဵုကၠတ်ထဝ် သ္ပဒတန်ခါန်ကၞက်ဏာ ဝန်ဇၞော် (၇) တၠ ပ္ဍဲဂကောံအလဵုအသဳ တွဵုရးဍုင်မန်ရ။

ပၞောဝ်ကဵုကၠတ်ထဝ် သ္ပဒတန်ခါန်ကၞက်ဏာ ဝန်ဇၞော် (၇) တၠဂှမ္ဂး ညးစၞးကၠတ်ထဝ် နူဗော်ညဳသၟဟ်မန် နာဲလျးတၟးဂှ် နဒဒှ်ဝန်ဇၞော် ပရေင်ဘဏ္ဍာ ကေုာံ ကိုန်စဳဇန်၊ ညးစၞး မိလွဳဟာန်ဂှ် နဒဒှ်ဝန်ဇၞော် ပရေင်ထိင်ဒဝ်ပွဳပွူသဘာဝ ကေုာံ သယံဇာတကီု ပါလုပ်ရ။

နာဲလျးတၟးဝွံ ဗွဲကြဴနူဒပ်ပၞာန်ဗၟာသီအဝဵုတုဲဂှ် ဂွံဒုင်ခါန်ကၞက်လဝ် နဒဒှ်ကောန်ဂကောံကံင်ဇြဳ ပရေင်အုပ်ဓုပ်ရ။ ပြဟ်ပြဟ်ဏံလေဝ် သၟာင်နူယိုက်ဂၠေင်မံင်တာလျိုင် နဒဒှ်ဝန်ဇၞော် ပရေင်ပိုန်ဒြပ်ဂှ်တုဲ အခိုင်ခြာဟွံလအ်ဏံရ နူက္ဍိုပ်သ္ကိုပ်ပၞာန် ဇိုန်နှင်ကဵုတဆိပ်ကြာ “ဝဏ္ဏကျဝ်ထေန်” ကီုရ။

မိလွဳဟာန်ဝွံ နူကဵုပေဲါရုဲမာဲပတောံ ကမ္မယှေန်ပၞာန်မွဲတဆင့်ဂှ် နကဵုညးစၞးကၠတ်ထဝ် ကလိဂွံလဝ်ဇၞး ပ္ဍဲဆန္ဒမာဲပွိုင်ဍုင်ရေဝ်ရ။

သ္ကိုပ်ဗိုလ်ဇၞော်ကျဝ်ဇြဲမျေအ်ဂှ် နဒဒှ်ဝန်ဇၞော်ကေင်ကာပယျဵု ကေုာံ ဂီုကၠီု၊ ဥူတေအ်ဇြဝ်ထောန်ဂှ် ဝန်ဇၞော်ပရေင်မၞိဟ်၊ ဒံက်တာအောင်မျာတ်ကျဝ်ဇြုင်ဂှ် ဝန်ဇၞော်ဗဂဵုလဟဵုဍုင်ကွာန်၊ ဥူမေန်ဇြေယာဥူဂှ် ဝန်ဇၞော်ပရေင်ဆက်စၠောံဂၠံင်ဍာန် ကေုာံ ဓာတ်လလဳ ဇြဟတ် ကွတ်စက်၊ ဥူမေန်မျေအ်မာင်လေဝ်ဂှ် နဒဒှ်ဝန်ဇၞော် ကၟိုန်ဍာ် ကေုာံ ပရေင်တဵု/လွဳကီု ခါန်ကၞက်လဝ်ရ။

တုဲပၠန် ဥူမျိုဝ်မေန်လှာင်ဂှ် နဒဒှ်ဝန်ဇၞော်ကေင်ကာကောန်ဍုင်အရင်ဗၟာ၊ ဥူချေတ်တုင်ဂှ် ဝန်ဇၞော်ကေင်ကာကောန်ဍုင်အရင်ပအိုဝ် ကေုာံ ဥူအဝ်အောင်ကျဝ်တုင်ဂှ် နဒဒှ်ဝန်ဇၞော် ကေင်ကာကောန်ဍုင်အရင်ကရေင်ကီု နူကဵုကၠတ်ထဝ် သ္ပဒတန်ခါန်ကၞက်လဝ်ရ။

ညးဂွံဒုင်ခါန်ကၞက်လဝ် နဒဒှ်ဝန်ဇၞော် သ္ကိုပ်ဗိုလ်ဇၞော်ကျဝ်ဇြဲမျေအ် ကေုာံ ဥူတေအ်ဇြဝ်ထောန်၊ ဒံက်တာအောင်မျာတ်ကျဝ်ဇြုင်တံလေဝ် ပြဟ်ပြဟ်ဏံ ဒှ်ညးယိုက်ဂၠေင်မံင်တာလျိုင် နဒဒှ်ဝန်ဇၞော် ပ္ဍဲဂကောံအလဵုအသဳတွဵုရးဍုင်မန်ရ။

ပ္ဍဲကဵုပေဲါကောံဓရီုကၠတ်ထဝ်တွဵုရးဍုင်မန် အလန်တတိယ မကၠောန်ဗဒှ်ဒမံင် အခိုင်လၟုဟ်ဏံ ဝွံ ကိစ္စခါန်ကၞက်ပ္တိုန် သ္ကိုပ်ဝန်ဇၞော်ကီု၊ ဝန်ဇၞော်ဂမၠိုင် ကေုာံ ဌာနဝန်ဇၞော်ကီု၊ ဂအုပ်နာဲဗ္စာ ကၠတ်ထဝ်တွဵုရးကီု၊ နာဲဗ္စာကီုဂှ် သ္ပဒတန်ခါန်ကၞက်ဏာလဝ်ကီု ဂွံတီကေတ်ရ။