ပ္ဍဲသ္ကုတ်ဂၠံၚ်ယေန်ဒံၚ်-ကွာန်လှာ၊ ဂၠံၚ်ကွဳစက်ဇၞော် စၟတ် (၈)၊ ပွိုၚ်ဍုၚ်မုဟ်ဍုၚ်၊ တွဵုရးဍုၚ်မန်ဂှ်ဝွံ ဟိုတ်နူပရူဒဒှ်ပန်ပှော်ဂှ်ရ ညးဒဳကွဳက်စက်ဖ္ဍိုက်ကပေါတ် (၁) တၠ ဒးချိုတ်အာတုဲ ညးဗြဴ (၁) တၠ ဒးအာဘဲဝပ်နွံရဂှ် ဂွံတီကေတ်ရ။

နူတနေံဏံ ဂိတုအေဗရဴ (၄)၊ အခိၚ်သဝ်တ္ၚဲ ၜိုတ် (၄) နာဍဳကဝက်ဂှ်ဝွံ ကွဳစက်ကမ္မယှေန်ပၞာန်ၜါဖ္ဍိုက် ဒဳကၠုၚ်လ္တူသ္ကုတ်ဂၠံၚ်ယေန်ဒံၚ်-ကွာန်လှာဂှ် နူဂကောံဒပ်ပၠန်ဂတး မချဳဓရာၚ်မံၚ်အပ္ဍဲဒေသတံ ပန်ပှော်ဗ္တိုက်ဏာလဝ် ၜိုတ်ကဝက်နာဍဳရဂှ် ညးဒေသမွဲတၠ ဟီုရ။

အခိၚ်ကတဵုဒှ်မံၚ် ပရေၚ်ပန်ပှော်ဂှ်မ္ဂး ကွဳစက်ဖ္ဍိုက်နၚ်ခရံက်မွဲဖ္ဍိုက် ဒဳတတ်အာဂှ်ရ ညးဒဳကွဳစက်ဂှ် ဒးအာလွဟ်တုဲ ချိုတ်အာပ္ဍဲဒၞာဲဂှ်ရောၚ် ဂးရ။

“ၜိုတ်ကဝက်နာဍဳ ဂွံမိၚ်မံၚ်ရမျာၚ်လွဟ်ရ။ လအ်ဂွံမွဲနှေံဂှ်တှေ် ကာဟံၚ်ပြာ်တံ တိုန်အာ လ္ပာ်မတ်မလီုရ။ ညးဒဳကာဂှ်တှေ် ချိုတ်အာရ။ ညးဗြဴ ဍိုက်ဗက်ကၠုၚ်ကရောံညးဂှ် ဒးအာဘဲဝပ်” သာ်ဝွံ ဟီုရ။

ညးဒဳကွဳစက် အာယုက် (၃၅) သၞာံ၊ မၞုံယၟု ဥူအံၚ်တူဝေန် ဒးဒုၚ်ပန်လွဟ်ချိုတ်အာဂှ်ဝွံ ဒၟံၚ်တန်တဴမံၚ် ပ္ဍဲအရာပ်ဝေဗာဂဳ၊ ဍုၚ်ဥက္ကလာပသၟဝ်ကျာရောၚ် ဂွံတီကေတ်ရ။

အခိၚ်ကတဵုဒှ်မံၚ် ပရေၚ်ပန်ပှော်ဂှ်ကဵု ကတဵုဒှ်တုဲလလအ်ကဵုနာဍဳဂှ်မ္ဂး ပရေၚ်ကွဳစက်တၟာတ်ဆိုအ်နွံကီုလေဝ် အပ္ဍဲတ္ၚဲဂှ်ဟေၚ် ကလိဂွံအခေါၚ် တတ်ကၠောံအာကၠုၚ်ရ။

ပ္ဍဲလ္တူကွဳစက်ပၞာန်ဂှ်ဝွံ ကောန်သ္ဂံၚ်ကမ္မယှေန်ပၞာန်လ္ၚဵု ဒးဒုၚ်ပန်ဗ္တိုက်ဏာဂှ်ရ ဆေၚ်စပ်ကဵု အကာဲအရာ ဒးဘဲချိုတ်ဂျိုၚ် ကေုာံ ဂကောံဒပ်ပၠန်ဂတးလဵု ပါလုပ်ပန်ပှော်ဂှ်တုဲ နူကဵုဌာန်ပရိုၚ်ဗၠးၜးမန် IMNA အဃောသၟာန်သၟုက်မံၚ် သ္ဂောံသ္ပဒတန်ရ။

ပ္ဍဲဒေသသ္ကုတ်ဂၠံၚ် ကတဵုဒှ်ပရေၚ်ပန်ပှော်ဂှ်ဝွံ ဗော်ဍုၚ်မန်တၟိ (ဗတိုက်သရိုဟ်တၠအဝဵုပၞာန် – NMSP(AD) ကီု သီုဂကောံဒပ်ပၠန်ဂတးတၞဟ်တၞဟ်တံ ချဳဓရာၚ်ဒၟံၚ်တုဲ ပရေၚ်ပန်ပှော် ဂမၠိုၚ်လေဝ် ကတဵုဒှ်မံၚ်မွဲနှေံမွဲနှေံရ။