လ္တူတၚ် UNFC ကံၚ်ဇြဳဖေဝ်ဒရေဝ်ကောန်ဍုၚ်အရၚ် ပ္တိုန်ထ္ၜးကၠုၚ်လဝ် (၈) တၚ်ဂှ် ဂစာန်တတ်ကၠောံ နကဵုနဲကဲနာနာသာ်ထေက်ဣရ သာ်ဝွံ ညးမဒှ်က္ဍိုက်သ္ကိုပ်ဂကောံ DPN ခူဥူရာ ဟီုပ္တိတ်ကၠုၚ် ပ္ဍဲဂလာန်ပံက်ကောံဓရီု တ္ၚဲအံက်တဝ်ဗာ ၂၃ ဂှ်ရ။

ပ္ဍဲဂိတုအံက်တဝ်ဗါ ၂၃ ဂှ် ကမ္မယှေန်ပရေၚ်ၜိုဟ်လလံ PC အလဵုအသဳကဵု DPN ဂကောံညးစၞး ပ္ညဳပ္ညပ်သဳကၠဳပရေၚ်ဍုၚ်ကွာန် နူ UNFC တံ စကၠောန်သ္ပကောံဓရီုလုပ်သၞောဝ် မရနုက်ကဵု (၇) ဝါ ပ္ဍဲဌာနဗဟဵု ပရေၚ်သၟဟ်သၟန်ကောန်ဂကူကေုာံပရေၚ်ၜိုဟ်လလံ NRCP နွံပ္ဍဲဂၠံၚ်ယှိုဲလဳ ဍုၚ်လ္ဂုၚ်တုဲ အခိၚ်ဟီုဂလာန် ပံက်ကောံဓရီုဂှ် ခူဥူရာ က္ဍိုပ်သ္ကိုပ်ဂကောံ DPN ဟီုပ္တိတ်ကၠုၚ်ဂလာန်သာ်ဏံရ။

“ဂလာန်ပိုဲ ပ္တိုန်လဝ် ၈ တၚ်ဂှ် ညံၚ်ဂွံတတ်ကၠောံမာန် နကဵုနဲကဲနာနာသာ်ဂှ် အခိၚ်စိုပ်ဣရဏောၚ် ပိုဲတံကၠိုဟ်လဝ်” သာ်ဝွံ ခူဥူရာ ဂးရ။

နူကဵု UNFC ပ္တိုန်လဝ်ဂလာန် ၈ တၚ် ကုကမ္မယှေန်ပရေၚ်ၜိုဟ်လလံတုဲ သဳကၠဳမံၚ် လအ်ကၠုၚ် ၁၅ ဂိတုပြၚ်ကီုလေဝ် အဃောဒးသဳကၠဳမံၚ် သီု ၈ တၚ်ဏံဖိုဟ်ရ။

ဒှ်သာ်ဂှ်ရ အခိုက်ကၞာယေန်သၞာၚ် အရာဆဵုဂဗသဳကၠဳဏံ မွဲလ္ပာ်ကဵုမွဲလ္ပာ် ဗၠေၚ်မံၚ်ပ္ဍဲကဏ္ဍနဲကဲဟာ၊ တၚ်ဍိုလျ နွံကၠုၚ်မံၚ်ဟာ သာ်ဝွံ ခူဥူရာ ပ္တိတ်ကၠုၚ်သမာန်ရ။

“အတိုၚ်ကောန်ဍုၚ် ကောန်ကွာန်တံ စၟဳမိက်မံၚ် သွက်သ္ဂောံဂွံပရေၚ်ၜိုဟ်လလံကၟိန်ဍုၚ်ပံၚ်ကောံဂှ် UNFC ပိုဲ ညံၚ်ဂွံလုပ်စိုပ်မာန် ပ္ဍဲပါၚ်မုခ်လ္ဂာံပထမဂှ် ပေါဲသဳကၠဳဇၞော်ဇၞော် အံၚ်ၚ်ဇၞးဇၞးမွဲ ဒှ်ကၠုၚ်မာန်ဏောၚ် ပိုဲတံစၟဳမံၚ်ဖိုဟ်ရောၚ်” သာ်ဝွံ ဥူတိၚ်ဇြဝ် ဒုဥက္ကဌကမ္မယှေန်ပရေၚ်ၜိုဟ်လလံ ဂးရ။

ပ္ဍဲကောံဓရီုဏံ ဂလာန် UNFC ပ္တိုန်ထ္ၜးလဝ် ၈ တၚ်ဂှ် ဆက်သဳကၠဳအာဏောၚ်ဒှ်တုဲ သွက်ဂွံထ္ပက်စၟတ်တဲ လိက်ကသုက် NCA တုပ်စိုတ်ဒိုအ်ပန်ပှော်အလုံမွဲဍုၚ်ဂှ်လေဝ် သဳကၠဳအာကီုဏောၚ် ဂွံတီကေတ်ရ။

ပ္ဍဲကောံဓရီုလၟုဟ်ဝွံ ဂကောံညးစၞးအလဵုအသဳ ဥူတိၚ်ဇြဝ် ဒုဥက္ကဌကမ္မယှေန်ပရေၚ်ၜိုဟ်လလံ ကေုာံ ဒုသ္ကိုပ်ပၞာန်ဇၞော် (ရာပြည့်) တံ က္ဍိုက်ပ်တိုန်စိုပ်တုဲ နူ DPN ဂကောံညးစၞး ပ္ညဳပ္ညပ်သဳကၠဳပရေၚ်ဍုၚ်ကွာန် ဂှ် ခူဥူရာ ညးက္ဍိုပ်၊ နာဲအံၚ်မ္ၚဵု ဒုညးက္ဍိုပ် ကေုာံကောန်ဂကောံတံတိုန်စိုပ်ရ။ ကောံဓရီုဂှ် အံက်တဝ်ဗာ ၂၃ ကဵု ၂၄ ကၠောန်အာ ပွိုၚ်ၜါတ္ၚဲရောၚ် ဂးရ။

ပ္ဍဲဒပ်ပံၚ်ကောံ UNFC ကံၚ်ဇြဳဖေဝ်ဒရေဝ် ကောန်ဍုၚ်အရၚ်ဂှ်ဝွံ ဗော်ဍုၚ်မန်တၟိ NMSP ၊ ဗော်ပရေၚ်တောတက်ကရေၚ်ဍာဲ KNPP ၊ ကံၚ်ဇြဳကောန်ဂကူရခေၚ် ANC ကေုာံ ဗော်ဒဳမဝ်ကရေတ်တေတ် ဠာဟူ LDU တံ ပါလုပ်ရ။