ကောန်သ္ၚိစာတ် (ကောန်ထံၚ်) ၆၅% နွံပ္ဍဲသ္ၚိစာတ် (ထံၚ်) ဍုၚ်မတ်မလီု ကဵု ဍုၚ်သဓီု တွဵုရးမန်ဂှ် ဒၟါနူအမှုဂဥုဲၜူမာဲရဏောၚ် သ္ကိုပ်ဝန်ဇၞော်တွဵုရးမန် ဒံက်တာအေဇြာန် ဟီုရ။

“စပ်ကဵုအမှုဂဥုဲၜူမာဲတုဲ တ္ၚဲဟွံဗက်ရပ်ဏံ မွဲတ္ၚဲဟွံမွဲပုဟ်၊ကောန်သ္ၚိစာတ် နွံပ္ဍဲထံၚ် သဓီု ကဵု ထံၚ်မတ်မလီုတံ သရောပ်သၟဟ်ထောံမ္ဂး ၜိုတ် ၆၅ % ဂှ် ဒှ်ညး ဒးထံၚ်နကဵုအမှုဂဥုဲၜူမာဲဖအိုတ်ရ၊ ဂစာန်ရပ်ဒၟံၚ် အမှုဂဥုဲၜူမာဲ ၜိုတ်လဵုရောဟီုမ္ဂး ပ္ဍဲထံၚ်တံ ဒဵုကဵုဒၞါဲစွံဟွံမွဲ ဒှ်ကၠုၚ်အကာဲအရာဂှ်ဣရ” သာ်ဝွံ သ္ကိုပ်ဝန်ဇၞော် ဂး။

သွက်ဂွံဒၞါတာ ပြသၞာဂဥုဲၜူမာဲဏံ အလဵုအသဳ၊ ကၠတ်ထဝ် ကေုာံညးဍုၚ်ကွာန်တံ လုပ်ပံၚ်တောဲတုဲ တွဵုရးဇၞော်မောဝ် ဖေါအ်ဗြေဝ်တိုန်မှ ပြသၞာဏံ ပသောၚ်မာန်ဏောၚ်ဂှ်လေဝ် သ္ကိုပ်ဝန်ဇၞော် ဟီုသောၚ်က္လးဏာ ပ္ဍဲကၠတ်ထဝ်တွဵုရးမန် အလန်ဒုတိယ ကောံဓရီုလၟေၚ် ဒသမ မကၠောန်သ္ပလဝ် ပ္ဍဲဂိတုဂျောန် ၅ ရ။

ဒံက်တာအံၚ်နာၚ်ဥူ ညးစၞးကၠတ်ထဝ်တွဵုရး နူဒေသမာဲ လၟိဟ် (၁) ပွိုၚ်ဍုၚ်တ္ကံခၟိုၚ် ပ္တိုန်ဂလာန်သၟာန်ဏာ စပ်ကဵုကိစ္စဒၞါတာပရေၚ်ဂဥုဲၜူမာဲဂှ်တုဲ သ္ကိုပ်ဝန်ဇၞော် တွဵုရးမန် ဟီုသောၚ်က္လးဏာ အတိုၚ်ဗွဲလ္တူတေံရ။

သွက်ဂွံရပ်စပ် ပသောၚ်သၟး ပြသၞာဂဥုဲၜူမာဲ ကဵု ပရေၚ်ရာဇဝတ်ဂမၠိုၚ်ဂှ် အလဵုအသဳ တွဵုရးမန် ဗီုလဵုရေၚ်တၠုၚ် ဖျေံလဝ်အစဳဇန် ကေုာံမူဝါဒတံကီုရော၊ ပ္ဍဲအရာဓမံက်ရုပ်ရဴ မူဝါဒ ကေုာံအစဳဇန်ဂှ်လေဝ် ဗီုလဵုရပ်ပါ်စကာလဝ် နူသြန်ဂအုံဘဏ္ဍာ တွဵုရးဂှ်ကီုရော၊ သွက်ဂွံဒၞါတာ ဗ္တိုက်သၟး ကိစ္စတံဂှ်လေဝ် ပ္ဍဲကဵုဇြဟတ် ညးဂၠေၚ်ဝန် ကေုာံကပေါတ်စက်ယန် နွံမံၚ်လၟုဟ်ဏံ ဗီုလဵုရေၚ်တၠုၚ် သမၠဲပ္တိတ်လဝ်ကီုရော နဂလာန်သာ်ဏံ ဒံက်တာအံၚ်နာၚ်ဥူ သၟာန်လဝ်ရ။

“ဒံက်တာအေဇြာန် ဒုၚ်သစာ ကဵုကတိပါၚ် ဒဒှ်သ္ကိုပ်ဝန်ဇၞော်တုဲဂှ် ပရေၚ်ဂဥုဲၜူမာဲ၊ ပရေၚ်ရာဇဝတ် ညံၚ်ဂွံအောန်ကြဳ အိုတ်အးအာဂှ် ရပ်ကေတ်အာအရေဝ် အတိုၚ်ဥပဒေဏောၚ် ဟီုဂးလဝ် ပ္ဍဲဂလာန်ဒှ်သ္ကိုပ်ဝန်ဇၞော်ရ။ သ္ကိုပ်ဝန်ဇၞော်ဂှ် ဟိုတ်နူဒှ်က္ဍိုပ်သ္ကိုပ် ပ္ဍဲဂကောံအလဵုအသဳ တွဵုရးမန်ဂှ်ရ ဂလာန်သ္ကိုပ်ဝန်ဇၞော်ဟီုဏာဂှ် ဍေံဒှ်အစဳဇန်ကမၠောန်အနာဂတ် သွက်အလဵုအသဳတွဵုရးမန် ဒးဓမံက်ရုပ်ရဴရ၊ ဒှ်သာ်ဂှ်ရ အတိုၚ်ဂလာန် သ္ကိုပ်ဝန်ဇၞော် ဟီုကၠုၚ်လဝ်ဂှ် ရေၚ်တၠုၚ် ကၠောန်ဂွံ ၜိုတ်လဵုကီုရော ညးဍုၚ်ကွာန် မိက်ဂွံတီတံလေဝ် နွံကၠုၚ်တုဲ ဒးပ္တိုန်ဂလာန်သၟာန်သာ်ဏံဏောၚ်” ဒံက်တာ အံၚ်နာၚ်ဥူ ဂးရ။

ဆ္ဂး သွက်ဂွံဒၞါတာ ဗ္တိုက်သၟးပရေၚ်ဂဥုဲၜူမာဲဂှ် ပ္ဍဲဂကောံအလဵုအသဳ တွဵုရးမန် ချူလဝ်မူဝါဒ ချိုတ်တ်ပၠိုတ်တ်ဟွံမွဲ၊ သွက်ဂွံစကာသြန် ပ္ဍဲပရေၚ် ဒၞါတာ ဗ္တိုက်သၟးဂဥုဲၜူမာဲဏံ ဒးပါ်ပ္တိတ်သြန် နူကဵုသြန်ဂအုံဘဏ္ဍာတွဵုရး ဂလိုၚ်တေံ ဂလိုၚ်ဏံဏောၚ်ဟီုဂှ်လေဝ် သ္ဂုတ်သွာတ် ပါ်လဝ်တၞဟ်ခြာဟွံမွဲ၊ ကပေါတ်ကြိယာ ထေက်ကဵုဒးကေတ် ဒးစကာ ပ္ဍဲအရာကမၠောန်ဏံဂှ်လေဝ် ဟွံမွဲ၊ပ္ဍဲအရာဝဳထပိုတ်ဂဥုဲ ကုမၞိဟ်စောဲဒၟံၚ်ဂဥုဲၜူမာဲတံဂှ်လေဝ် သဝ်ဝန် ရုံရုံဂပ်ပ်ဟွံမွဲရောၚ် သာ်ဝွံ ဂွံတီကေတ် နူဂကောံအလဵုအသဳ တွဵုရးမန်ရ။