ယာန်ဠေန်အံၚ်၊ ဂိတုမာတ် ၁၂ သၞာံ ၂၀၂၀
ဆေၚ်ကၠေၚ်ဍေန် ဍာ်ဒ္ကေဝ်ဟွံပေၚ်ကီု ဗ္ၜတ်သူဟွံပေၚ်ကီုတံဂှ် အတိုၚ်သၞောဝ်ဥပဒေ သွက်ဂွံရပ်စပ်အာနွံရောၚ် ညးတာလျိုၚ်ပရေၚ်သွံရာန်ကၠေၚ်ဍေန် (တွဵုရးမန်+ကရေၚ်) ဥုမံၚ်ၚ်သိုဝ် ဂးရ။
“လၟုဟ် ၂၀၂၀ ဏံ အခိၚ်အာစၟဳစၟတ် ရပ်ဂွံဂွံတှေ် ကေတ်အရေဝ်ဂှ် ချိုတ်ပၠိုတ်မံၚ်ရ။ အာပံက်အမှု ပ္ဍဲကဵုဗဒို်ပ်ဗၠာဲသၟိၚ် နကဵုသၞောဝ်ဥပဒေကၠေၚ်ဍေန် ၃၉ တုဲ ဆေၚ်တံဏံဂှ် ပ္ဍဲတ္ၚဲလဵု စၟဳစၟတ်လဝ်ဂှ် ဆဵုညာတ်လဝ်ဗီုဏံတုဲ ပံက်အာအမှုဗီုဏံ ပိုဲရေၚ်တၠုၚ်အာဏောၚ်” သာ်ဝွံ ဥုမံၚ်ၚ်သိုဝ် ဟီုရ။
ပ္ဍဲကဵုသၞာံ ၂၀၁၈-၁၉ ဂှ် အလုံတွဵုရးဍုၚ်မန်ဂှ် ကမ္မတဳထိၚ်ဒဝ်ကောပ်ကာဲ ပရေၚ်သွံရာန်ကၠေၚ်ဍေန် တွဵုရးဍုၚ်မန်တံ အာစၟဳစၟတ်လဝ် ဍာ်ဒကေဝ်ကဵု ဗ္ၜတ်သူဟွံပေၚ်တံဂှ် လၟိဟ်ဆေၚ် ၂၈ ရောၚ် ဂွံတီကေတ်ရ။
ပ္ဍဲကဵုစၟဳစၟတ်လဝ်ဂှ် ဆေၚ်ကၠေၚ်ဍေန်၊ ကၠေၚ်ဓာတ် ဍာ်ဒ္ကေဝ်ဟွံပေၚ်ဂှ် ၁၄ ဆေၚ်ကဵု ဆေၚ်ဗ္ၜတ်သူဟွံပေၚ် ၅ ဆေၚ်တံဂှ် ဒးဒုၚ်ကေတ်အရေဝ်တုဲ ဒးဒုၚ်တပ်ဒဏ်သြန် အကြာ ၅ ကိုတ်ကဵု ၁၀ ကိုတ်ရောၚ် ဂွံတီကေတ်ရ။
ဟိုတ်နူကဵုတၠဆေၚ်တံ ဟွံတီလဝ်သၞောဝ်ဥပဒေ ဆေၚ်စပ်ကဵု ပရေၚ်ကၠေၚ်ဍေန်တံ သၠဲသၠဲလးလးဂှ်ရ ၜိုတ်တပ်ဒဏ်သြန်ဟေၚ် ကေတ်လဝ်အရေဝ်ကၠာရောၚ် ဥုမံၚ်ၚ်သိုဝ် ဂးရ။
“သၞောဝ်ဥပဒေဆေၚ်စပ်ကဵု ကၠေၚ်ဍေန်ဂှ် ညးဟလိုၚ် ဟွံတီလဝ်သၠဲသၠဲလးလးကီု ကမ္ပဏဳဇၞော်တံလေဝ် ပ္ဍဲကဵုသွံတြးလဝ်ကဵုဂှ် ပရေၚ်ကေတ်လျိုၚ် ဒုၚ်လျိုၚ်အောန်မံၚ်၊ ကာလပိုဲအာစၟဳစၟတ် ပ္ဍဲဆေၚ်သွံရာန်ဂှ်တှေ် ပရေၚ်ဍာ်ဒ္ကေဝ် ကေုာံ ဗ္ၜတ်သူတံဂှ် ဆေၚ်သွံရ ဒးဒုၚ်ကေတ်မံၚ်အရေဝ်၊ ညးတြးနၚ်ကဵုလဝ်ကၠေၚ်ဍေန်ဂှ် ဗၠးမံၚ်တုဲ ရဲဒးဒုၚ်စၟတ်တံရ ဒးမံၚ်လေဝ်” သာ်ဝွံ ညးထပ်ဟီုရ။
ဟိုတ်နူကဵု ပရေၚ်ရပ်စပ်ကေတ်အရေဝ်တံ ကၠောန်ကၠုၚ်မံၚ်သာ်ဝွံဂှ် သွက်ဂွံဒးဟီုဂး တၞဟ်ခြာဟွံမွဲရောၚ် ဥုကျဳတ မာန်နေဂျာ ဆေၚ်ဖျာနဳလာယှိုဲဇြေန် ပ္ဍဲကဵုအရာပ်ဇြေဂျိုဝ် ဍုၚ်မတ်မလီု ဟီုရ။
ဥုကျဳတဂှ် “သွက်ရဲကၠုၚ်ရာန်တံတှေ် ပိုဲသွံကဵုဍာံဍာံဓဝ်ဝ်ရဏောၚ်။ ဟိုတ်နူကဵုဟွံဓဝ်ဍာံတုဲ ကၠုၚ်စၟဳစၟတ်တုဲ ဆဵုစုတ်တှေ် ပိုဲဒးဒုၚ်တပ်ဒဏ်သြန်တံ ဒးကေတ်အရေဝ်တံဏောၚ်။ ဟွံစောဲဂဗုတ်ပုဟ်၊ ဟွံတပ်ဒဏ်သြန်ပုဟ်တှေ်လေဝ် ရဲဒးဒုၚ်ဂိဂှ် ရဲကၠုၚ်ရာန်စကာတံရဏောၚ်” သာ်ဝွံ ညးဟီုရ။
စနူကဵုသၞာံ ၂၀၂၀ တုဲ ကၠေၚ်ဍေန်ဍာ်ဒ္ကေဝ်ဟွံပေၚ်၊ ဗ္ၜတ်သူဟွံပေၚ်တံဂှ် ကေတ်အရေဝ်နကဵုၝောံပိုဒ် ၃၉ ဂှ် ဒးဒုၚ်ကေတ်အရေဝ်မာန်တုဲ အောန်အိုတ်ဒဏ်သြန် ၅ ကိုတ်စဵုကဵု ၅၀ ကိုတ်ကဵုဒှ် ဒဏ်ထံၚ် ဟွံဂၠိုၚ်နူကဵု ၆ ဂိတုလေဝ် ဖျေံထံၚ်မာန်ရောၚ်။
လၟုဟ်ဝွံ အလုံတွဵုရးဍုၚ်မန်ဂှ် ဆေၚ်ကၠေၚ်လုပ်သၞောဝ် ပံက်လဝ်ကဵုလာၚ်ဇြေန် နွံမံၚ် (၁၅၀) ပြၚ်တုဲ နူကဵုသၞာံတုဲကၠုၚ်ဂှ် အဃောကၠောန်မံၚ်လာၚ်ဇြေန် နွံမံၚ် (၃၀) ဆေၚ်ပြၚ်ဏီရောၚ် ဂွံတီကေတ် နူကဵုရုၚ်ဆေၚ်စပ်ကဵု ပရေၚ်သွံရာန်ကၠေၚ်ဍေန် တွဵုရးဍုၚ်မန်ရ။
