ဝဏ္ဏမာန်၊ ဂိတုဂျာန္နဝါရဳ ၁၀၊ ၂၀၂၀

ညးစၞးဗော် NLD တံ ရန်လဝ် သွက်ဂွံဆဵုဂဗသဳကၠဳ ကုညးစၞးဗော်ညဳသၟဟ်မန် (MUP) ဂှ် စဵုတ္ၚဲဏံ (ဂျာန္နဝါရဳ ၁၀) ဂှ် လ္ပာ် (NLD) တံ ဟွံကေတ်ကၠုၚ်အဆက်ဏီတုဲ ဂတဏံ ဒှ်ဆဵုမံၚ်ဏီဟာဂှ် ဟွံချိုတ်ပၠိုတ်ဏီရောၚ် ဖက်ဆောညးအုပ်ကာ ဗော်ညဳသၟဟ်မန် ဟီုရ။
“ယဝ်ရလ္ပာ် NLD တံ ကော်ဘိက်ကၠုၚ် သွက်ဂွံဆဵုဂဗတက်ကျာ ပ္ဍဲကဵုဒၞာဲတတိယ (ဒၞာဲအကြာ) မွဲဒၞာဲတှေ် ပိုဲဂှ် အခိၚ် ဟွံရုဲ သွက်ဂွံဆဵု ပိုဲဒုၚ်တၠုၚ်မံၚ်လၟိုန်ရ၊ အာဂတဏံ ဒှ်ဆဵုဟာ ဟွံဒှ်ဆဵုဟာဂှ် ဗီုလဵုဒှ်မာန်ဂှ် ပိုဲလေဝ် ဟီုဟွံမာန်ပုဟ်၊ ဒှ် ဆဵုဟာ ဟွံဒှ်ဆဵုဟာဂှ် တန်တဴကဵု ဗော် NLD ရ” နာဲလျးတၟး ဟီုရ။
တုဲကၠုၚ်ဂိတုဂျာန္နဝါရဳ (၄) ဂှ် နူလ္ပာ်ညးစၞးဗော် NLD ဒံက်တာအံၚ်မဵုညဵု ဍိုက်ဍိုပ် ညးတံ (၃) တၠ သွက်ဂွံဆဵုဂဗသဳကၠဳ ကုညးစၞးဗော်ညဳသၟဟ်မန် ပ္ဍဲရုၚ် (NLD) လတူဍုၚ်မတ်မလီု ဂးတုဲ ကော်ဘိက်ကၠုၚ် ညးစၞးဗော်ညဳသၟဟ်မန်ဂှ်ဝွံ လ္ပာ်ဗော်ညဳသၟဟ်မန်တံ ပတိုန်ထ္ၜးဆဝ်မ္ၚုဟ် သွက်ဂွံဆဵုဂဗ ဒၞာဲတတိယ (ဒၞာဲအကြာ) မွဲဒၞာဲဂှ် လ္ပာ်ညးစၞးဗော် NLD တံ ဟွံကလေၚ်ပရိုၚ်မွဲသာ် အစဳဇန်ပေဲါဆဵုဂဗဂှ် လီုအာရ။
ဟိုတ်နူအစဳဇန်ပေဲါဆဵုဂဗ အကြာညးစၞးဗော် NLD တံကဵု ညးစၞးဗော်ညဳသၟဟ်မန် (MUP) တံ အစဳဇန်ပေဲါဆဵုဂဗ လီုအာတုဲ အကြာဗော်ပရေၚ်ဍုၚ်ကွာန် ကောန်ဍုၚ်အရၚ်ဂမၠိုၚ်ကီု၊ အကြာသၟာသ္ၚဳဂၠိပ်ပါ်ပဲါ စပ်ကဵုပရေၚ်ဍုၚ်ကွာန်ဂှ် ကီု ရမျှာၚ်ဟီုဂးပါ်ပဲါကၠုၚ် ဇၞော်ကဵုဇြဟတ်ရ။
ပ္ဍဲကဵုသွဟ်ပေဲါရုဲမာဲ (၂၀၂၀) တုဲကၠုၚ်ဏံဂှ် ဗော် NLD တံ ဇၞးလဝ်မာဲ ဒဵုလာ်ပြၚ်လာ်ဒှ်တုဲ သွက်ဂွံထပ်ဒက်ပတန် အလဵုအသဳတၟိ မွဲအဆက်ပၠန်ဂှ် ဗော် NLD တံ ဗက်ဆဵုဂဗဒၟံၚ် ကုညးစၞးဇၞးမာဲ ဗော်ကောန်ဍုၚ်အရၚ်တံနွံရ။ ပ္ဍဲကဵုအစဳ ဇန် သွက်ဂွံဆဵုဂဗ ကုဗော်ကောန်ဍုၚ်အရၚ်တံဂှ် ပရေၚ်ကဵုကေတ်ညးသ္ကံ တၚ်လ္ၚဵု ဟွံပြေပြံၚ်တုဲ ပေဲါဆဵုဂဗ အကြာ NLD ကဵု ဗော်ကောန်ဍုၚ်အရၚ်တံ ဒှ်ခက်ခုဲဆိုအ်ဗကၠုၚ်ရ။
အာဂတနူဏံ အကြာဗော် NLD တံကဵု MUP တံ ယဝ်ခါရ ဒှ်ဆဵုဂဗသဳကၠဳကၠုၚ်မ္ဂး လ္ပာ်ဗော်ညဳသၟဟ်မန်တံ ပလေဝ် ပလေတ်လဝ် တၚ်နၚ်သွက်ဂွံသဳကၠဳနွံ ဖက်ဆောညးအုပ်ကာ နာဲလျးတၟး ဟီုသောၚ်ကလး သာ်ဝွံရ။
“အာဂတနူဏံ ဒှ်ဆဵုဂဗသဳကၠဳကဵု NLD တှေ် ကၟိန်ဍုၚ်ပိုဲဏံ သွက်ဂွံဒက်ပတန် ကၟိန်ဍုၚ်ဖေဝ်ဒရေဝ်ဂှ် ဒုၚ်သ္ဇိုၚ်လတူမူ လိက်ကသုက်ပေန်လုၚ် (၁၉၄၇) ဂိတုဖေဖဝ်ဝါရဳ (၁၂) ဂှ် မွဲတၚ်၊ တုဲမွဲပၠန်ဂှ် သဘၚ်သဳကၠဳ (ဖဆပလ) (ပဆပလ-ပဏာမညီလာခံ) ကၠောန်ဗဒှ်လဝ် ပ္ဍဲ (၁၉၄၇) ဂိတုမေ (၂၃-၂၄) ဂှ် သ္ပဒတန်ဖျေံလဝ်တၚ်တုပ်စိုတ် မူနွံ (၁၄) တၚ်ဂှ်ကီု၊ တုဲမွဲအဆက်ဂှ်ဓဝ် (၁၉၄၇) ဂိတုဂျောန် (၁၆) ဂှ် ကၠောန်ဗဒှ် (တိုၚ်းပြုပြည်ပြုလႊတ်တော်) ပ္ဍဲဂှ် သ္ဂုတ် သွာတ်သ္ပဝ်ဒတန် မူ (၇) တၚ်၊ အဵုဒုၚ်သ္ဇိုၚ်လတူတၚ်တံဏံတုဲတှေ် ပိုဲပြေၚ်ရေၚ်လဝ် စပ်ကဵုသ္ဇိုၚ်မူဖေဝ်ဒရေဝ် သွက်ဂွံဒက်ပတန်၊ ဂတဏံ ပိုဲဒှ်ဆဵုတှေ် ပိုဲသဳကၠဳပတိုန်ထ္ၜးဏောၚ်” ဖက်ဆောညးအုပ်ကာဂှ် ဟီုထ္ၜးရ။