ဂကောံဗ္တောန်လိက်ပတ်မန်ကေုာံယေန်သၞာၚ် ဗုဒ္ဓဘာသာ ကဵု ဂကောံသၚ်၊ ခရှ် မဟာကျုလာလံၚ်ကန်တံ ပံင်ကောံတုဲ သ္ဘၚ်သၟာန်သွဟ်လိခ်အလုံဒေသရးမန် မရနုက်ကဵု ၂၆ ဝါ သၞာံဏံဂှ် သၟတ်မန်ညးမစိုပ်ဒၟံၚ်ဍုၚ်သေံတံ ဂွံပါလုပ်သွဟ်လိခ်မာန်ဂှ် ဖန်ဇန်လဝ်နွံရောၚ် ဂွံတီကေတ်ရ။

ရံၚ်အာကဵုပရေၚ်ဍုၚ်ကွာန်တ္ၚဲဏံ၊ ပရေၚ်မံၚ်စံၚ်စသုၚ်နာနာသာ်တုဲ သၟတ်မန် အဃောမကတ် လ္ၚတ်မံၚ်လိခ်မန်တန်ဝင်တံ လုပ်စိုပ်အာကၠောန်စကီု၊အာကတ်လ္ၚတ်ပညာ ဇရေၚ်ဍုၚ်သေံ ဗွဲမဂၠိုၚ်နွံဒၟံၚ်ဂှ်ရ အခေါၚ်အရာ ဂွံဆက်ကတ်ဗ္တောန်လိက်မန် သွက်ညးတံ ညံၚ်ဟွံဂွံဆောံလေၚ်အာ စွံတၚ်ရန်တၟံတုဲ ဖန်ဇန် ချပ်ဇန်ကၠုၚ် လၟေၚ်ကမၠောန်ဏံဏောၚ် ဂးရ။

ဟိုတ်ဂှ်ရ တုဲကၠုၚ်ဂိတုဖေဖဝ်ဝါရီ စၟတ်တ္ၚဲ (၁၆) ဂှ် ကၠောန်သ္ပလဝ်ကောံဓရီု စပ်ကဵုကိစ္စဂှ်တုဲ ဖျေံကၠုၚ်လဝ်သ္ဂုတ်သွာတ် မပ္တံကဵုဌာနသွဟ်လိခ်ဍုၚ်သေံဂှ် စၟတ်လဝ်ဘာသုဓမ္မဝတဳ၊ ဍုၚ်က္ၜၚ်ကံက်မွဲဟေၚ်၊ တ္ၚဲသွဟ်လိခ်ဂှ်လေဝ် ဒးဒှ်မွဲတ္ၚဲကဵုဗွိုၚ်သွဟ်လိခ်ပ္ဍဲဍုၚ်ဏံကီုတုဲ ပွမပတိက်ပုစ္ဆာ၊ ပရေၚ်ကဵုစၟတ်တံဂှ် နူကဵုကမ္မတီလိက်ပတ်မန် ဗွိုၚ်ပ္ဍဲဍုၚ်ဏံဟေၚ် က္ဍိုက်ပ်အာရောၚ်ဂှ် ဂွံလဝ်တၚ်တုပ်စိုတ်ရ။

နူကဵုဂကောံလိက်ပတ်မန်ကေုာံယေန်သၞာၚ်ဗုဒ္ဓဘာသာတံ ပံက်ကဵုလဝ်အခေါၚ်ဂှ်မ္ဂး မန်စိုပ်ဒၟံၚ်ဍုၚ်သေံ ညးလဵုဟွံရုဲ အခေါၚ်လုပ်သွဟ်လိခ်အလုံဒေသနွံဟီုကၠာလေဝ် ပြဟ်ဟ်ဏံဂှ် ကွးဘာနူမဟာကျုလာလံၚ်ကန်တံမွဲဟေၚ် ဗက်ကံက်မံင်စရၚ်နွံတုဲ အလန်ကိုပ်ကၠာဏံ ကွးဘာမ္ၚးတံ အခေါၚ်ဂွံပါလုပ်ဂှ် ရေၚ်တၠုၚ်အာကဵုမာန်ဟာ၊ ဟွံမာန်ဟာဂှ် ညးတာလျိုၚ်သၚ်နူမဟာကျုလာလံၚ်ကန်မွဲဇကုဂှ် ဟီုမြော်သောၚ်ကလးလဝ်ဗီုဏံနွံရ။

“သၟဝ်တၚ်ရန်တၟံ ဂကောံမဟာကျုလာလံၚ်ကန်ဂှ်လေဝ် တင်ရေၚ်တၠုၚ်ပတုဲဖဵုသွက်ဂကူမွဲဂှ် နွံမံၚ်ရရ။ အေဇှ်ရတှ်ေ တၚ်ရန်တၟံကၠောန်ဓဇက်လဝ်လၟုဏံကီု၊ အကာဲအရာပစ္စပန်ကၠောန်မံၚ်လၟုဏံကီုတှ်ေ နကဵုလညာတ်အဂုဏ်မွဲတှ်ေဍေံဒးကၠုၚ်မာန်ရောၚ်၊တၚ်သကုတ်သွတ်ကမ္မတီအလဵုဂှ်အဂုဏ်တံဟွံဂွံဂဇေံဖျေံဏီ၊ဆဂးအရၚ်ကွးဘာပ္ဍဲ(မဟာကျုလာလံၚ်ကန်) ဏံဂှ်တှ်ေ ဂွံလဝ်တၚ်တုပ်စိုတ်တုဲမံၚ်ရ၊ အရၚ်ကွးဘာမ္ၚးဂှ် ၜိုန်လဵုအဂုဏ်တံဍးစိုပ်မာန်ဂှ်ဟွံဂွံဂဇေံလဝ်ဝိုၚ် ချိုတ်တ်ပၠိုတ်တ်ဏီဏး” သာ်ဝွံ ဟီုမြော်လဝ်ရ။

တုဲပၠန် ဂကောံသၟတ်မန် မၞုံဍုၚ်သေံ၊ ဂကောံသၚ်၊ ဂကောံကွးဘာတံ အာဂတပၠတရဴတုဲ ပံက်ဗ္တောန်မံၚ် ဘာဥတုကညၚ် ပ္ဍဲဍုၚ်သေံမပ္တံကဵု ဒေသပြဇောပ်၊ ဒေသဖာၚာ၊ ဒေသဇြူရာတ်၊ ဒေသဖူကေက် ကွာန်မန်ဝၚ်က စတမ်တံဂှ် သၞာံဏံမ္ဂး လၟိဟ်ကွးဘာကီု၊ ပရေၚ်မိမတံ ပါလုပ်ပံၚ်တောဲကီုဂှ် အသိၚ်သၠုၚ်တိုန်ကၠုၚ်မံၚ်ဏောၚ်ဂှ် ညးဆက်ဟီုလဝ်ရ။

လ္တူဂကောံလိခ်ပတ်မန် ကေုာံ ယန်သၞောၚ်မန်ဗုဒ္ဓဘာသာ ဗွိုၚ်ပ္ဍဲဍုၚ်ကဵု ဍုၚ်သေံတံ ပံၚ်ကောံချဳဒရိုၚ်ကၠုၚ်မာန်ဗီုဏံဂှ် နဒဒှ်ကောန်ဂကူမွဲတၠ ထေက်ကဵုဒးမိက်စိုတ်တုဲ သ္အာၚ်နူဍုၚ်သေံ ဍုၚ်တၞဟ်ဟ်တံလေဝ် ယဝ်ခါရမၞိဟ်ကေတ်တာလျိုၚ်ချိုတ်ချိုတ်ပၠိုတ်ပၠိုတ်နွံမ္ဂး သွက်ဂွံပံက်ကဵုအခေါၚ်နွံပၠန်ရောၚ်ဂှ် ညးမတိုန်စိုပ် ကောံဓရီုမွဲတၠဂှ် ဟီုလဴထ္ၜးလဝ်ဗီုဏံနွံရ။

“ဗီုဂကောံဍုၚ်သေံပံက်လဝ်ဏံ ညးကေတ်လျိုၚ်မာန်ကီု နူကဵုဍုၚ်တၞဟ်ဟ်ညးမကေပ်ကာဲကွးနွံ ဒုၚ်သဇိုၚ်ဌာနနွံကီုတှ်ေ နူကဵုလုံဒေသဏံပံက်ကဵုအခေါၚ်သွဟ်လိခ်နွံရ။ အေဇှ်ရညးးအဲအဲ မၞုံတန်တဴဒၟံၚ်ဍုၚ်သအောၚ် ပါဲနူဍုၚ်သေံတံဂှ်တှ်ေ ညံၚ်ဂွံဒှ်ကတ်လ္ၚတ်လိက်ပတ်မန် ညံၚ်ဂွံဒှ်လုပ်သွဟ်အခေါၚ်အလုံဒေသမန်မာန်ဂှ် ဂစာန်ကဵုညိဂှ် ပိုဲမိက်ဂွံဆောဝ်ဗၚုဟ်ဏာရ” ဂးရ။

ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဂှ် ဘာသာအဘိဓရ်၊ တန်ဝၚ်ဍုၚ်ဟံသာဝတဳ၊ တန်ဝၚ်ဍုၚ်မုဟ်တၟံ၊ တန်ဝၚ်ဍုၚ်သုဝဏ္ဏဘုံ၊ တန်ဝၚ်လိက်ပတ်မန် ကေုာံ တန်အခိုက်ကၞာမန်တံ ဒးသွဟ်အာလၟေၚ်ၚ်တုဲ ကွးဘာအံၚ်ဇၞးအာ (၆) တန်ဂှ်တုဲမ္ဂး ဇိုန်ကဵုတဆိပ်ကြာ တန်ဝၚ်အာစိုပ်ဒတုဲရောၚ် ဂွံတီကေတ်ရ။

သ္ဘင်သၟာန်သွဟ်လိက်ဝင်မန် မရနုက်ကဵု ၂၆ ဝါ အလုံဒေသရးမန် ပ္ဍဲသၞာံဏအ်ဂှ် ဂိတုပသာ် ၁၁ စွေက် (22-5-2025) တေံမ္ဂး ကၠောန်ဗဒှ်အာတုဲ ပံက်လဝ်ဌာန်သွဟ်လိခ် ဌာန ဍုင်ဗဂေါ၊ ဌာန ဍုင်မတ်မလီု၊ ဌာန ဍုင်ဇြပ်ဗု၊ ဌာန ဍုင်ရေဝ်၊ ဌာနရးတၞၚ်သဳ ကွာန်ဒဵုတၟံ ပါ်လဝ် (၅) ဌာနရောၚ် ဂွံတီကေတ်ရအဴ။