ပ္ဍဲသၞာံ (၂၀၂၅) စနူဂိတုဂျောန်စၟတ်တ္ၚဲ (၁) နူတနေံဏံတုဲ ပ္ဍဲကၟိန်ဍုင်သေံ ညးဒဳကွဳလိုန်ဓါတ်ဟွံစုတ်ခၟော်တအ် ဒးဒုင်တပ်ဒဏ်ဩန် (၂၀၀၀) ၝာတ်ရောင် ညးတာလျိုင်ဗၠာဲသၟိင်သေံတအ် လလောင်ကၠုင်လဝ်ဂှ် ဂွံတီကေတ်ရ။

အလုံမွဲကၟိန်ဍုင်သေံ အတိုင်စေဝ်ပၞောန် သၞောဝ်အလဵုအသဳသေံတအ် မဖျေံလဝ်ဂှ်မ္ဂး ရန်ကဵုညးဍုင်ကွာန်တအ် သ္ဂောံဗၠးနူဘဲ လတူဂၠံင်ဍာန် စပ်ကဵုအန္တရာဲကွဳစက်၊ ကွဳလိုန်ဓါတ်တအ်မာန်တုဲ ပတေင်ကၠုင်လဝ်သၞောဝ်ဏံရောင် ဂးရ။

အတိုင်မဖျေံလဝ်စေဝ်ပၞောန်သၞောဝ်ဂမၠိုင်ဂှ်မ္ဂး သွက်ညးဒဳကွဳလိုန်ဓါတ် ဍိုက်မံင်မၞိဟ်ၜါတအ်ဂှ် သီုညးဒဳကီု ညးဍိုက်ဍုတ်ကီုဂှ် ယဝ်ဟွံစုတ်လဝ်ခၟော် သီုမၞိဟ်ၜါမ္ဂး ဒးဒုင်တပ်ဒဏ်ဩန် (၂) ဆ၊ ဗၞတ် (၄၀၀၀) ၝာတ်တုဲ အတိုင်မစၟတ်လဝ်အသိင် သၞောတ်ဒဳကွဳစက်၊ ကွဳလိုန်ဓါတ် ယဝ်အသိင်လောန်ၜက်အာ နူမစၟတ်လဝ်ဂှ်မ္ဂး ဒးဒုင်တပ်ဒဏ်ဩန် ဗၞတ် (၄၀၀၀) ၝာတ်ကီု၊ အခိင်ထ္ၜးလဝ်ပၟတ်ဍာဲ ပ္ဍဲကဵုဂၠံင် (၄) သွာင်ဂှ် ယဝ်တတ်အာမ္ဂး ဒးဒုင်တပ်ဒဏ်ဩန် (၄၀၀၀) ၝာတ်မာန်ရ။

တုဲပၠန် ဒၞာဲကွက်လဝ်လိက် ကွဳစက်၊ ကွဳလိုန်ဓါတ်ဒေါံဟွံဂွံ၊ စွံဟွံဂွံဂှ် ယဝ်ဒေါံဒး၊ စွံဒးမ္ဂး ဒးဒုင်တပ်ဒဏ်ဩန် ဗၞတ် (၂၀၀၀) ၝာတ်ကီု၊ ယဝ်ဒဳကွဳစက်၊ ကွဳလိုန်ဓါတ် ဂၠံင်ဗၠေတ်မှာ ဂတးအာမ္ဂး ဒဏ်ဩန် (၂၀၀၀) ၝာတ်၊ ညးဒဳကွဳစက် ဟွံစုတ်လဝ်ဇုက်ဂရတ်ဂၞိင်မ္ဂး ဒးဒုင်တပ်ဒဏ်ဩန် ဗၞတ် (၂၀၀၀) ၝာတ်ကီုရ။

ဒှ်သာ်ဂှ်ရ ရံင်ကဵုစေဝ်ပၞောန်သၞောဝ် အလဵုအသဳသေံတအ် မဖျေံလဝ်ဂှ်တုဲ သွက်သၟာကမၠောန် ကောန်ဍုင်မန်ဗၟာပိုဲတအ်လေဝ် အာကၠုင်မ္ဂး စုတ်ကဵုခၟော် ဒ္ဂေတ်ဗက်ကဵုအတိုင်သၞောဝ်ဂှ်တုဲ အာကၠုင်ညိဂှ်လေဝ် မ္ဒးကဵုဏာသတိ ကုသၟာကမၠောန်ကောန်ဍုင်ပိုဲတအ်ကီုရ။