ပ္ဍဲဒေသမန် ပေဲါဗ္တိုက်ညိၚ်ဝတ်တုဲ ပရေၚ်ဂစိုတ်မၞိဟ် ပၠံၚ်ၜးကေတ်ဏာကွဳလိုန်ဓာတ် က္တဵူဒှ်ကၠုၚ်နွံရောၚ် ဂွံပရိုၚ်ရ။

ပရေၚ်ဒဒှ်ဝွံ ဂိတုအေဗရဴ စၟတ်တ္ၚဲ (၂၃) တုဲကၠုၚ်ဏံ ပ္ဍဲပွိုၚ်ဍုၚ်ဇြပ်ဗု ဗၟံက်ကွာန်ဝၚ်ပတုက်ဂှ် ညးလိၚ်ဏာ ကွဳလိုန်ဓာတ်လိၚ် တြုံကဵု ဗြဴ ၜါတၠဂှ် ဂစိုတ်လဝ်တၠကွဳတုဲ ပၠံၚ်ၜးကေတ်ဏာ ကွဳလိုန်ဓာတ်ရောၚ် ညးဒေသမွဲတၠ ဟီုလဴထ္ၜးရ။

ညးလိၚ်ဏာကွဳလိုန်ဓာတ် တြုံကဵု ဗြဴ ၜါတၠ သၟာကမၠောန်ဆုဲပြံၚ်ဂကူဗၟာၜါတၠဂှ် ကော်လိၚ်ဏာ ကွဳလိုန်ဓာတ်နူဍုၚ်ဇြပ်ဗုတုဲ ကဵုအာပလံၚ် ပ္ဍဲကွာန်ဝၚ်ပတုက်ဂှ် ဂစိုတ်လဝ်တၠကွဳတုဲ ကေတ်ဏာကွဳလိုန်ဓာတ်ဂှ်ရောၚ် သ္ဂးရ။

“ညးလိၚ်ဏာလွဳလိုန်ဓာတ်နူဇြပ်ဗု တြုံကဵုဗြဴ ကောန်ကမၠောန်ဗၟာ (သၟာကမၠောန်ဆုဲပြံၚ်) ကဵုအာပလံၚ် လ္ပာ်ကွာန်ဝၚ်ပတုက်ဂှ်တှေ် လုပ်ပါၚ်ကွာန်ဝၚ်ပတုက် နူကၠာဟွံစိုပ်ကွာန်က္ဍၚ် ပ္ဍဲကၠအ်ရာဗာ ဒၞာဲမၞိဟ်သောၚ်မွဲဒၞာဲဂှ် တြုံကဵု ဗြဴဂှ် ရေက်လဝ်ကအ်တၠကွဳဂှ်တုဲ ကွဳဂှ် ဍေံကေတ်ဏာ” သာ်ဝွံ နာဲလေဝ် (ဗလေတ်လဝ်ယၟု) ဂှ် ဟီုထ္ၜးရ။

ပ္ဍဲဒေသဍုၚ်မန် ပရေၚ်ပၠံၚ်ၜးကွဳလိုန်ဓာတ်ဂှ် ဒေသနာနာ က္တဵူဒှ်ကၠုၚ်နွံကၠုၚ်ကီုလေဝ် ဂစိုတ်ဏာ သီုတၠကွဳလိုန်ဓာတ်တုဲ ကေတ်ဏာကွဳလိုန်ဓာတ်ဂှ်မ္ဂး ပ္ဍဲသၞာံ (၂၀၂၅) ဏံ ဂွံမိၚ်အလန်ကၠာအိုတ်ရ။

“ပၠံၚ်ကွဳလိုန်ဓာတ်ဂှ် အတေံ ဟွံသေၚ် အဏံ ဂွံမိၚ်မံၚ်တွဵုရ၊ ဆဂး ဂစိုတ်သီုမၞိဟ် ကေတ်ဏာကွဳလိုန်ဓာတ်ဗီုဏံဂှ် ဒှ်အောန်မံၚ်၊ သ္ပဗီုဏံဂှ်တှေ် ဓဇန်ကွေံကွေံဏောၚ်၊ ပ္ဍဲဒေသမန်ပိုဲဗီုဏံလေဝ် က္တဵူဒှ်နွံမံၚ်ဏောၚ်ဂှ် ထေက်ကဵုဒးဂွံသတိတုဲ ဒးစွံသတိ အာကၠုၚ်ဇၞော်ဇၞော်မွဲဏောၚ်” ဂှ် ညးဒေသ နူကွာန်ကြုက်ပိမွဲတၠ ထပ်ဟီုရ။

ပ္ဍဲကာလကံၚ်ဇြဳပၞာန်တံ သီလဝ်အဝဵုဏံဂှ် ရဲအာတရဴ နကဵုကွဳလိုန်ဓာတ်တံ ဒးဒုၚ်ပၠံၚ်ၜး ကပေါတ်ထဝ်ဩန်ကီု၊ လီဠာန်တုဲ ပၠံၚ်ကေတ်ဏာကွဳလိုန်ဓာတ်ကီုဂှ် ဟွံလအ်ဟွံလအ် က္တဵုဒှ်ကၠုၚ်မံၚ်နွံရ။

ရဲပၠံၚ်ၜးကပေါတ်၊ ရဲပၠံၚ်ကေတ်ဏာကွဳလိုန်ဓာတ်တံဝွံ ဒေသလ္ၚဵုဂှ် နကဵုအစဳဇန် ပရေၚ်ကမၠောန် ကၠောန်သ္ပပရေၚ်ပိုန်ဒြပ်တုဲ ကၠောန်သ္ပမံၚ်လေဝ်နွံရောၚ် ညးဒေသတံ ဟီုရ။

စပ်ကဵုပရေၚ်ပၠံၚ်ၜး ကပေါတ်ထဝ်ဩန်ကီု ပၠံၚ်ကေတ်ကွဳလိုန်ဓာတ်ကီုဂှ် ဗွဲမဂၠိုၚ် ရဲသၟာကမၠောန်ဆုဲပြံၚ် ဂကူဗၟာတံ ကၠောန်သ္ပဂၠိုၚ်ရဂှ်လေဝ် ဟီုဂးမံၚ်ဂှ် ဂွံတီကေတ်ရ။