ပ္ဍဲဍုင်ၜင်ကံက်၊ ကၟိန်ဍုင်သေံဂှ် သၟာကမၠောန်ကောန်ဍုင်ဗၟာ ကၠောန်ဒၟံင်ကမၠောန်ပရေင်သၟးဇ္ၚးမြံင်ဍာ်ပိုက် (၂) တၠ ဟိုတ်နူယှတ်ပၟတ်ဓါတ်လလဳတုဲ ဒးဒုင်ချိုတ်အာနွံရောင်ဂှ် ဂွံတီကေတ်ရ။
ဂိတုမာတ် စၟတ်တ္ၚဲ (၂၄)၊ နူတနေံဏံ အခိင်ဗ္တံ (၁၁) နာဍဳပြင် ပ္ဍဲကဵုဍုင်ၜင်ကံက်၊ ဒၞါဲဒေသၜင်သူဂှ် ကောန်ဍုင်ဗၟာ (၂) တၠ အခိင်မစှေ်အာကၠောန်ဒၟံင် မြံင်ဍာ်ပိုက်သၟဝ်တိတေံဂှ် ဟိုတ်နူယှတ်ပၟတ်ဓါတ်လလဳတုဲ သၟာကမၠောန်ကောန်ဍုင်ဗၟာ (ကိုလင်းနိုင်) အာယုက် (၃၅) သၞာံ ကဵု (ကိုမင်းလွင်ဝင်း) အာယုက် (၃၀) သၞာံတံညးၜါတၠ လမျီုဒးအိုတ်ချိုတ်အာ သၟဝ်မြံင်ဍာ်ပိုက်ဂှ်ရ။
ကောန်ဍုင်ဗၟာ (၂) တၠဏံဂှ် စှေ်အာသၟးဇ္ၚးမြံင်ဍာ်ပိုက်သၟဝ်တိတေံ လလအ်အခိင်ၜိုတ် (၅) မိနေစ်ဂှ် ပၟတ်ဓါတ်လလဳယှတ်အာတုဲ မိင်ရမျာင်ကညာင်ကော်တုဲဂှ် ဗက်စှေ်အာ ဂွံဆဵုကေတ် တိက်ဒေါမ်ဒၟံင်သီုၜါတၠရောင် ဂးရ။
ပ္ဍဲအခိင်ဂှ်ရ ဇွကောန်ဍုင်ဗၟာၜါတၠဏံဂှ် နူကဵုညးတာလျိုင်ဂကောံဟံင်ပြာ်မၞိဟ်သေံတံ ဟံင်ပြာ်ပတိတ်နင်နူကဵုမြံင်ဍာ်ပိုက်တုဲ သွက်ဂွံကၠောန်သ္ပပရေင်စၟဳစၟတ်ဂှ် ပလံင်ဏာ ရုင်ဂဥုဲဇၞော် ဍုင်ၜင်ကံက်တေံရောင် ဂွံတီကေတ်ရ။
အပ္ဍဲကဵုစၟဳစၟတ် ကောန်ဍုင်ဗၟာချိုတ်အာ (၂) တၠဏံဂှ်ဝွံ မွဲတၠဂှ် ဒှ်ညးလုပ်ကၠုင်ကဵု တၞးလိက် MOU တုဲ သှေ်မွဲတၠဂှ် ကၠုင်စိုပ်ကၠောန်ဒၟံင် ပ္ဍဲကဵုဍုင်သေံဏံ တၟာလအ်ယျရောင် ဂးရ။
ဂိတုမာတ် စၟတ်တ္ၚဲ (၁၅) တုဲကၠုင်ဏံဂှ်လေဝ် ပ္ဍဲဍုင်ၜင်ကံက် ဟိုတ်နူဂၠံင်ကွဳပၟတ်ဒမြိပ်သ္ၚောဲ သရိုဟ်လာ်စှေ်ဂှ် ကောန်ဍုင်ဗၟာ (၄) တၠ ကဵု ကောန်ဍုင်သေံ (၂) တၠ ဒးချိုတ်ကၠုင်လဝ်တုဲ နူကဵုကုမ္ပဏဳတံ ကဵုၚုဟ်သြန်လဴ သွက်ကောန်ဍုင်သေံၜါတၠဂှ်ကီုလေဝ် သွက်ကောန်ဍုင်ဗၟာ (၄) တၠဂှ် ဟွံကဵုလဝ်ၚုဟ်သြန်လဴဏီဖိုဟ်ရောင် ညးကဵုဒၟံင်အရီုဗင်သၟာကမၠောန်ကောန်ဍုင်ဗၟာမွဲတၠ ဟီုဂးလဝ်နွံဂှ် ဂွံတီကေတ်ရ။
