အပ္ဍဲကဵုမဟာၛာဲ ကၟိန်ဍုၚ်သေံဂှ် ဆေၚ်ဖျာဗၟာ (အာစီနန်းတော်) HAPPY BAR KTV & Club တအ် ဒဒုၚ်စၟဳစၟတ် ကဵုညးတာလျိုၚ်ဗၠာဲသၟိၚ်သေံတအ်တုဲ သီုကဵုရပ်သီဂွံလွဟ်ဂဥုဲၜူမာဲတအ်နွံကီုရောၚ် ဂွံပရိုၚ်ရ။

နူတနေံဏံ ဂိတုအေဗြဴ စၟတ်တ္ၚဲ (၂၈) အခိၚ်သဝ်တ္ၚဲဂှ် ပ္ဍဲကဵုမဟာၛာဲ ကၟိန်ဍုၚ်သေံ ဆေၚ်ဖျာဗၟာ (အာစီနန်းတော်) နကဵုယၟု HAPPY BAR KTV & Club ဂှ် နူကဵုညးအုပ်ဓုတွဵုရးမဟာၛာဲ၊ ဌာနဝန်ဇၞော်သၟာကမၠောန်သေံ၊ ပၞာန်သေံတအ် ကဵုညးတာလျိုၚ်ဗၠာဲသၟိၚ်သေံတအ် ပံၚ်တောဲလုပ်စၟဳစၟတ်တုဲ ရပ်သီဂွံလွဟ်ဂဥုဲၜူမာဲတအ်နွံရဂှ် ဂွံဆဵုကေတ်ရ။

အပ္ဍဲကဵုဆေၚ်ဖျာဗၟာ HAPPY BAR KTV & Club ဂှ်တှ်ေ ဂွံဆဵုကေတ်ကောန်ဍုၚ်ဗၟာ လၟိဟ် (၁၅၀) တၠပြၚ်တုဲ ဟိုတ်နူပရေၚ်ဟွံလုပ်ကဵုသၞောဝ်ကၟိန်သေံ မပ္တံကဵု လွဟ်၊ မကမ် ကဵု ဂဥုဲၜူမာဲတအ်ပါလုပ်မံၚ်ဂှ်ရ ရပ်သီကၟာတ်ထောံတုဲ စၟဳစၟတ်ကေတ်အာအရေဝ်မာန်ရ။

အပ္ဍဲကဵုမဟာၛာဲ ကၟိန်ဍုၚ်သေံ ဆေၚ်ဖျာဗၟာ (အာစီနန်းတော်) HAPPY BAR KTV & Club ဏံဂှ် ရန်ကဵုသွက်ကောန်ဍုၚ်ဗၟာတအ်ဂမၠိုၚ် ဖံက်ကၠုၚ်လဝ်တုဲ အပ္ဍဲဂှ်တှ်ေ မပ္တံကဵု ဗာ၊ ကာရာအိုဝ်ကေ၊ ဒယှ်ေလဟိၚ်ဒွက် ကဵု ဝိုၚ်ဝေၚ်တအ်နွံမံၚ်တုဲ ပွိုၚ် (၁) နာဍဳမ္ဂး ဒးကဵုၚုဟ်လုပ် (၂၅၀)ၝာတ်၊ လုပ်ဝေၚ်ပွိုၚ် (၂) နာဍဳဆက်က်တှ်ေ ကဵုအခိၚ်ပဵုမးမး (၁) နာဍဳမာန်ရောၚ် ဂွံတီကေတ်ရ။

ဒှ်သာ်ဂှ်ရ ဟိုတ်နူကဵုဖံက်လဝ်ဆေၚ်ဖျာ ကၠောန်သ္ပဒၟံၚ်ပရေၚ်ဟွံလုပ်ကဵုသၞောဝ်ကၟိန်ဍုၚ်သေံသာ်ဏံတုဲ ကောန်ဍုၚ်ဗၟာညးဖံက်လဝ်ဆေၚ်တအ်ဂှ် ရပ်ထိၚ်ကေတ်အရေဝ် ကဵုအာဒုဟ်ဒဏ်တုဲ ကပေါတ်လွဟ် ကဵု ဂဥုဲၜူမာဲ မရပ်သီဂွံလဝ်တအ်ဂှ် နကဵုတၞးလိက်သက်သဳမွဲမွဲ ကေတ်အရေဝ်ပံက်အာဂဗုတ်မာန်ရောၚ် ဂွံတီကေတ်ရ။