ကၠာသၞာံ ၂၀၂၅ ဟွံအိုတ်ဏံ ယဝ်ရပေါဲရုဲမာဲဒှ်ဍာံမ္ဂး ညးစၞးအလံင်အမာတ် ဗော်ညဳသၟဟ်မန် ဂၠာဲဝါတ်ညိရောင် ကမ္မတဳ ကေင်ကာဗဟဵုလ္ၚဵု အခါတ်အကာဲရ။

သွက်ပေါဲမာဲဂှ် နကဵုဗော်ညဳသၟဟ်မန် ဟွံဂွံချပ်လဝ်ဏီရောင် ညးအုပ်ကာဗဟဵု ဟီုဓမံက်လဝ်ကီုလေဝ် ပေါဲရုဲမာဲဒှ်ဍာံမ္ဂး ဗော်ညဳသၟဟ်မန် ဒးတတ်ပေါဲရုဲမာဲတွဵုတုဲ ညးစၞးအလံင်အမာတ်သွက်ဂွံလုပ်ပြိင်တအ် ဂၠာဲဝါတ်ညိရောင် သ္ဂးရ။

“ပေါဲရုဲမာဲကံင်သဳပၞာန်တအ်ကၠောန်အလန်ဏံဂှ်တှ်ေ ဗီုတုဲတုဲကၠုင်တေံဟွံသေင်ရ ညးစၞးအလံင်အမာတ် ဂွံလုပ်ပြိုင်မာဲ ဂှ် ဂၠာဲဝါတ်ညိဏောင် ဗီုတုဲတုဲတေံ မၞိဟ်လုပ်ဂၠိုင်ဂှ် အလန်ဏံ မၞိဟ်လုပ်ကြပ်ဟွံမွဲ ဒှ်မာန်မံင်ဏောင်” ကမ္မတဳကေင်ကာ ဗဟဵု မွဲတၠ ဟီုရ။

သၞာံ ၂၀၂၅ ဂိတုဒဳဇြေမ်ဗာဏံ ကံင်သဳပၞာန်တအ်ကၠောန်ပေါဲရုဲမာဲဒှ်ဍာံမ္ဂး နကဵုဗော်ညဳသၟဟ်မန်ဂှ် ၜိုန်ရဟွံဒးစိုတ်ကီုလေဝ် သွက်ဗော် ဂွံဆက်ဒတူလိုင်အာမာန်ဂှ် အောန်အိုတ် ညးစၞး ၃ ဒၞာဲ ဒးလုပ်ပြိုင်ပေါဲရုဲမာဲရောင် လၟေင်ကမၠောန်သၞောဝ်ပေါဲရုဲမာဲတုဲကၠုင်တေံ ဓမံက်ထ္ၜးလဝ်ရ။

“အခါတ်အကာဲကေတ်တှ်ေ နကဵုဗော်ညဳသၟဟ်မန် ဗီုလဵုဟီုဟီုရ ဗော်ဂွံဂျိုင်ဂှ် ပေါဲရုဲမာဲဂှ် ဒးတတ်တွဵုဏောင်၊ ဗီုသၞောဝ် ပေါဲရုဲမာဲတုဲတုဲတေံတှ်ေ အောန်အိုတ် ၃ ဒၞာဲ ဒးလုပ်ဏောင်၊ အဵုမၞိဟ်ဂွံလုပ်ဂှ်ရ ဗီုလဵုကေတ် ရံင်ကဵုအကာဲအရာတ္ၚဲဏံ တှ်ေ မၞိဟ်ဂွံလုပ်ပေါဲရုဲမာဲဂှ် ခက်ခုဲမာန်” ညးဆက်ဟီုရ။

လ္ပာ်ကံင်သဳပၞာန်တအ်ဂှ် ဟွံဒှ်ညံင်ဒှ် နဲကၠောန်ဂွံကၠောန်အာပေါဲမာဲရောင်ဂှ်တုဲ လ္ပာ်ရဲဒစဵုဒစးပၠန်ဂတးဂမၠိုင်တအ်လေဝ် ပေါဲရုဲမာဲကံင်သဳပၞာန်တအ်ရန်လဝ်သွက်ဂွံကၠောန်ဂှ် ပေါဲရုဲမာဲဓဝ်ယာဟွံသေင်တုဲ ဒစဵုဒစး ဗတိုက်ပလီုအာရောင် ဂှ်လေဝ် ဟီုဓမံက်လဝ်ရ။

အတိုင်ကံင်သဳပၞာန်တအ်ဟီုဓမံက်လဝ် ဂိတုဒဳဇြေမ်ဗာဏံ စကၠောန်အာပေါဲရုဲမာဲဟီုဂှ် တၟော်ကဵုအခိင်လၟုဟ်မ္ဂး သှ်ေမံင် ပွိုင် ၆ ဂိတုရတုဲ ယဝ်ဒှ်ကၠောန်ဍာံမ္ဂး တ္ၚဲဟွံလအ်ဏံ နကဵုကမ္မယှေန်ပေါဲရုဲမာဲကံင်သဳပၞာန်ခါန်ကၞက်လဝ်တအ် သွက်ဂွံ လလေင်ပ္တိတ် လၟေင်ကမၠောန်သၞောဝ်ပေါဲရုဲမာဲနွံတုဲ ကိစ္စရုဲစှ်ရန်ပလေဝ်ပလေတ် ညးစၞးအလံင်အမာတ် ဗော်ညးကုညး ဂှ်လေဝ် ဒးဖန်ဇန်ပလေဝ်ပလေတ်နွံရ။

ဆဂးဂှ် စပ်ကဵုကိစ္စပေါဲရုဲမာဲတုဲ နကဵုဗော်ညဳသၟဟ်မန်ဂှ် မုလေဝ် ချပ်လဝ်ဟွံမွဲဏီရောင် ညးအုပ်ကာနာနာ နာဲသာန် တေန် ဟီုဓမံက်လဝ်ကဵုဌာန်ပရိုင်ဂမၠိုင်နွံရ။