ပေဲါရုဲမာဲ ကံၚ်သဳပၞာန်တအ် ရန်လဝ် သွက်ဂွံကၠောန်ဗဒှ်အာ ကၠာသၞာံ (၂၀၂၅) ဟွံအိုတ်ဏံဂှ် သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ကၟိန်ဍုၚ်ဗၟာ ဟွံသေၚ်ရောၚ် သၟာပရေၚ်ဍုၚ်ကွာန်မန် ဗွိုၚ်မ္ၚးဗော်မွဲတၠ ဟီုရ။
“ပေဲါရုဲမာဲ ကံၚ်သဳပၞာန်တအ် ရန်လဝ် သွက်ဂွံကၠောန်ဗဒှ်အာ ပ္ဍဲဒဳဇြေမ်ဗာဏံဟီုဂှ် ဒှ်သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ကၟိန်ဍုၚ်ဗၟာမွဲ ဟွံသေၚ်ပုဟ်၊ ဒှ်ပၞော်တိတ် သွက်တၠအဝဵုကံၚ်သဳပၞာန်တအ်ဟေၚ် ဒှ်မာန်၊ ပေဲါရုဲမာဲ ၜိုန်ရဒှ်ကၠောန်တုဲအာကီုလေဝ် ပဋိပက္ခ ပရေၚ်ဍုၚ်ကွာန် ပရေၚ်ပၞာန်ဂှ် ဆက်တုဲဂဵုထၞာန်မံၚ်ဂှ်ရဏောၚ်” သာ်ဝွံ သၟာပရေၚ်ဍုၚ်ကွာန် ဗွိုၚ်မ္ၚးဗော် ဟွံမိက်ဓမံက်ယၟုမွဲတၠဂှ် ဟီုရ။
သွက်ဂွံပတဝ်အာ ဂၠံၚ်တရဴ သၞောဝ်ဒဳမဵုကရေဇြဳ မဒုၚ်သဇိုၚ်ဖေဝ်ဒရေဝ်ဂးတုဲ တၠအဝဵုကံၚ်သဳပၞာန်တအ် ရေၚ်တၠုၚ်ဖန်ဇန်ဒၟံၚ် သွက်ဂွံကၠောန်ဗဒှ်အာ ပေဲါရုဲမာဲနွံကီုလေဝ် ပေဲါရုဲမာဲကံၚ်သဳပၞာန်တအ် ဖန်ဇန်ပြုပြေၚ်ဒၟံၚ်တ္ၚဲဏံဂှ် နကဵုအဝဵုအာဏာစက် ဒပ်ပၞာန်ဗၟာတအ် သွက်ဂွံဆက်အုပ်ဓုပ်အာ အတိုၚ်သၞောဝ်ဒက်ပ္တန်ဍုၚ် (၂၀၀၈) ဂှ်ပၠန်ရောၚ် သ္ဂးရ။
“ပရေၚ်အုပ်ဓုပ်ဍုၚ်ဂှ် အတိုၚ်သၞောဝ်ဥပဒေ ဒက်ပ္တန်ဍုၚ် (၂၀၀၈) ဂှ်ရ မၞိဟ်ဒပ်ပၞာန်တအ် ၜးကယျိုၚ်နွံ၊ မၞိဟ်နူဗော်ကျဖောအ် ဇြဟတ်ဒပ်ပၞာန်တအ်နွံ၊ ၜိုတ်ဆကြဳစုတ်လ္ၚဴကဵု ညးစၞးကောန်ဂကူတအ် ပါစၜိုတ်ဆအယာံမာတ်ညိညိတုဲတှေ် ဆက်အုပ်ဓုပ်ပကၚ်ရၚ်အာ ကၟိန်ဍုၚ် အတိုၚ်တြေံပၠန်ရ၊ ဒုၚ်ယၟု အလဵုအသဳအရာပ် စက်ယန်အုပ်ဓုပ်ဍုၚ်ဂှ် ကၠုၚ်နူစက်ယန် ဒပ်ပၞာန် (ဗၟာ) ဖအိုတ်ဂှ်ပၠန်ရ” သာ်ဝွံ ညးဆက်ဟီုရ။
ပေဲါရုဲမာဲဒှ်ဍာံမ္ဂး ပ္ဍဲတွဵုရးဍုၚ်မန်ဂှ် နကဵုဗော်ညဳသၟဟ်မန် လုပ်ပြိုၚ် ဟွံလုပ်ပြိုၚ်ဂှ် ၜိုန်ရဟွံဟီုဓမံက်လဝ်ကီုလေဝ် အတိုၚ်သၞောဝ်ဥပဒေ ဗော်ပရေၚ်ဍုၚ်ကွာန်မ္ဂး ဒးတတ်ပေဲါရုဲမာဲဟေၚ်တုဲ သာ်လဵုတတ်ထပါ်အာ ပေဲါရုဲမာဲဏံရောဂှ် ဗော်ပ ရေၚ်ဍုၚ်ကွာန်တအ် မဒးဆဵုဂဗဒၟံၚ် တၚ်ကော်ဆဴနွံရ။
လ္ပာ်ဂကောံဗော်ဒစဵုဒစး ပၠန်ဂတးတအ်လေဝ် ပေဲါရုဲမာဲကံၚ်သဳပၞာန်တအ်ကၠောန်ဂှ် ညးဍုၚ်ကွာန်တအ် ညံၚ်ဟွံဂွံဘိုၚ်ပါလုပ်ဂှ် ဖျေံလဝ်အစဳဇန်တုဲ သွက်ဂွံဗတိုက်ပလီု အာရောၚ်ဂှ်လေဝ် ဟီုဓမံက်လဝ်နွံရ။
အကြာကံၚ်သဳပၞာန်တအ်ကဵု ဂကောံပၠန်ဂတးဂမၠိုၚ်တအ် အခိၚ်ကာလ ပေဲါပၞာန် ထတ်သ္ကာတ်ဒၟံၚ်ဏံ ယဝ်ကံၚ်သဳပၞာန်တအ် ကၠောန်အာပေဲါရုဲမာဲတွဵုမ္ဂး ပဋိပက္ခ ပရေၚ်ဍုၚ်ကွာန် ဆက်စပ်ကဵုပေဲါပၞာန်ဂှ် သာတုဲ ထုဲထံၚ် သ္ကာတ်မြဟ်ကၠုၚ်ရောၚ်ဂှ်လေဝ် သၟာသ္ၚဳဂၠိပ် ပရေၚ်ဍုၚ်ကွာန်လ္ၚဵုတံ သ္ၚဳဂၠိပ်လဝ်နွံဂှ် ဂွံတီကေတ်ရ။
