မရာပ်ဗာ rubber ၚုဟ်ခိုဟ်တုဲ ညးဂၠာဲကပှ်သွံဂၠိုၚ်

by | Jul 8, 2025 | ပရိုၚ် | 0 comments

အခိၚ်လဒေါဝ်ကသီု ကမၠောန်ကၟိတ်အောန်မံၚ်တ္ၚဲဏံဂှ် မရာပ်ဗာၚုဟ်ခိုဟ်တုဲ မၞိဟ်ဂၠာဲကပှ်သွံ မရာပ်ဗာလ္ၚဵု ဒှ်မံၚ်ကမၠောန်ကဵု ပရေၚ်ကပှ်မရာပ်ဗာဂှ်ရောၚ် မၞိဟ်ရေၚ်တၠုၚ်သွံရာန် မရာပ်ဗာ နူဍုၚ်ဇြပ်ဗုမွဲတၠ ဟီုရ။

မရာပ်ဗာမွဲကဠတ်မ္ဂး (၂၀၀၀) ဒ္ကေဝ် ၚုဟ်နွံမံၚ်တုဲ ပၠုပ်ဒၞာဲသွံရာန်ဂလိုၚ်ဂှ်မ္ဂး မွဲကဠတ် (၂၅၀၀) ဒ္ကေဝ်ရ။ မၞိဟ်လ္ၚဵုဂှ် မွဲမွဲတ္ၚဲ ကပှ်ဂွံ (၁) န ၊ (၂) န နွံတုဲ မွဲနမ္ဂး ဩန်ဗဒဲါကဵုကိုဋ် ဂွံမံၚ်ရောၚ် သ္ဂးရ။

“ပိုဲရာန်မံၚ်ပ္ဍဲညးကပှ်တအ်ဂှ်တှေ် မွဲကဠတ် (၂၀၀၀) ၊ ပိုဲထပ်ပလံၚ်ကဵု မၞိဟ်ကေတ် မရာပ်ဗာတေံမွဲအဆံၚ်ပၠန်ဂှ်တှေ် ဍေံကဵု (၂၅၀၀) ၊ ပိုဲဒးပလံၚ်ကဵုဍေံ ပ္ဍဲမွဲကဠတ်ဂှ်တှေ် စရိတ်ပိုဲပလံၚ်ဂှ် ဂွံ ၅၀၀ ၊ မၞိဟ်လ္ၚဵုဂှ်တှေ် ကပှ်ဂွံမံၚ် (၁) နနွံ (၂) နနွံ၊ ဂွံဩန်ဗဒဲါ မွဲကိုဋ်နွံမံၚ်၊ တော်ကဵုကမၠောန်တ္ၚဲလၟုဟ်ဏံတှေ် တော်ကိတ်မံၚ်” သာ်ဝွံ မၞိဟ်ရေၚ်တၠုၚ် သွံရာန် မရာပ်ဗာ ဂှ် ဟီုရ။

အခိၚ်မရာပ်ဗာတိတ်လၟုဟ်ဏံဂှ် တၠဓနကၠအ်တအ်ကီု၊ ရဲကၠောန်ပရေၚ်ပိုန်ဒြပ် တဵုပလောမ် မဆက်မတ် နူဒေသနာနာတအ်ကီု ဗ္ကန်ရာန်ဒၟံၚ် မရာပ်ဗာ နူဍုၚ်မန်အိုတ်ရ။

“မရာပ်ဗာ နူပိုဲဏံဂှ် ၜိုတ်တိတ် ၜိုတ်ရာန်ဂွံတှေ် ဍေံကေတ်ဖအိုတ်၊ ပြဟ်ပြဟ်ဏံဂှ်တှေ် နူပိုဲဏံ သွက်ဂွံပလံၚ်ကဵု လ္ပာ်ဍုၚ်ကျာ်ထဝ် (၁၀၀) န၊ နူဒေသတၞဟ်တၞဟ်တေံလေဝ် ဗ္ကန်လဝ်နွံမံၚ်၊ ရာန်ဟွံဂွံဒှ်အာ ရဲဗ္ကန်မံၚ်ပေၚ်ထာတ်ရ” သာ်ဝွံ ညးသွံရာန် မရာပ်ဗာတၞဟ်မွဲတၠပၠန်ဂှ် ဟီုရ။

မရာပ်ဗာဂှ် ဗွဲမဂၠိုၚ်မ္ဂး တဵုပလောမ် ဒှ်တၞံတုဲ ပေၚ်ဗၞတ်ၜိုတ်မွဲသၞာံ စိုပ်အယျဲဆက်မတ်ဂွံမ္ဂး ဆက်မတ်ရ။ ဒှ်တၞံဆက်မတ်တုဲ တၞံတိုန်ဂွံသမၠုၚ် ၜိုတ် (၁) ပေ၊ (၁) ပေပြၚ်ဂှ် မွဲတၞံ (၂၀၀၀) ပြၚ်ပြၚ် ဂွံမံၚ်ၚုဟ်ရ။

မရာပ်ဗာ (တၞံထ္ၜိုတ်) ဆက်မတ်ဂှ် ပ္ဍဲပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု ကၠောန်ပရေၚ်ပိုန်ဒြပ်တဵု ပလောမ်ဂၠိုၚ်တုဲ ဒေသတၞဟ်တအ်လေဝ် ဗီုညးကဵုညး ကၠောန်ပရေၚ်ပိုန်ဒြပ် တဵုပလောမ်ဒၟံၚ်နွံကီုရ။

ပ္ဍဲဍုၚ်မန်ဝွံ စပ်ကဵုပရေၚ်တဵုလွဳမ္ဂး ပရေၚ်ပိုန်ဒြပ်ထ္ၜိုတ်ဂှ် ဒှ်ကမၠောန်ပရေၚ်ပိုန်ဒြပ် ဇၞော်ဇၞော်မွဲတုဲ အခိၚ် မရာပ်ဗာတိတ်ဏံလေဝ် ဒှ်ပၞော်ပရေၚ်ပိုန်ဒြပ် ပၞော်ခိုဟ်ခိုဟ်မွဲရ။

ပ္ဍဲဍုၚ်မန်ဂှ် ကၠအ်ရာပ်ဗာ (ကၠအ်ထ္ၜိုတ်) (၅) ကိုဋ်ဨကပြၚ်နွံတုဲ အပ္ဍဲဂှ်မ္ဂး ပ္ဍဲပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် ၅ လက်ဨကပြၚ်နွံရ။ တော်ကဵုအလုံမွဲကၟိန်ဍုၚ်ဗၟာမ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) တုဲ ဒှ်လၟိဟ်ဂၠိုၚ်အိုတ်ရောၚ် တၚ်ဂၞၚ်နူကဵု Copilot (https://copilot.microsoft.com) ဂှ် ဓမံက်ထ္ၜးလဝ်ရ။

Written by

Related Posts

အစဳဇန် ရပ်သီ ကွဳစက်၊ ကွဳလိုန်ဓာတ် အပ္ဍဲသ္ၚိ ဟွံမွဲဏီဂး

အစဳဇန် ရပ်သီ ကွဳစက်၊ ကွဳလိုန်ဓာတ် အပ္ဍဲသ္ၚိ ဟွံမွဲဏီဂး

ကိုန်စဳဇန် ရပ်သီကွဳစက်၊ ကွဳလိုန်ဓာတ်တ္ၚဲဏံဂှ် အစဳဇန် ရပ်သီအပ္ဍဲသ္ၚိ ဟွံမွဲဏီရောၚ် ညးတာလျိုၚ်သကိုပ်ဗၠာဲသၟိၚ်ဍုၚ်မန်မွဲတၠ ဟီုဂးလဝ်ဂှ် ညးတာလျိုၚ် ဗော်ပရေၚ်ဍုၚ်ကွာန်မန်မွဲတၠ ဟီုလဴထ္ၜးရ။

ကွးဘာကောန်ဂကူမန် ပြံၚ်ကၠောံအာ ပ္ဍဲဘာတန်အလဵုအသဳလ္ၚဵု ဒုၚ်လဝ်တဲဆယာယဳနွံ

ကွးဘာကောန်ဂကူမန် ပြံၚ်ကၠောံအာ ပ္ဍဲဘာတန်အလဵုအသဳလ္ၚဵု ဒုၚ်လဝ်တဲဆယာယဳနွံ

ဒၟာနူဟိုတ်မွဲမွဲသာ်တုဲ ကွးဘာနူဘာကောန်ဂကူမန်လ္ၚဵု ပြံၚ်ကၠောံအာ ပ္ဍဲဘာတန်အလဵုအသဳဂှ် ညးတာလျိုၚ်တအ် ဒုၚ်လဝ်တဲဆယာယဳနွံဂှ် အ္စာဘာကောန်ဂကူမွဲတၠ ဟီုလဴထ္ၜးရ။

သ္ၚိဟွံကဵုဩန် သွက်လိၚ်မၞိဟ်ယိုက်ဂၠေၚ်ပၞာန်(ဗၟာ)လ္ၚဵု ဒးကံက်မာဲလုပ်ပၞာန်

သ္ၚိဟွံကဵုဩန် သွက်လိၚ်မၞိဟ်ယိုက်ဂၠေၚ်ပၞာန်(ဗၟာ)လ္ၚဵု ဒးကံက်မာဲလုပ်ပၞာန်

သ္ၚိညးဟွံကဵုဩန် သွက်ဂွံလိၚ်စုတ်မၞိဟ်စၞးယိုက်ဂၠေၚ်သ္ပကောန်ပၞာန်ဗၟာ ပ္ဍဲဒေသလ္ၚဵုဂှ်ဝွံ ဒးကံက်မာဲလုပ်ပၞာန်ဂှ် စဒှ်ကၠုၚ်ယျရောၚ် ဂကောံအုပ်ဓုပ်အရာပ် ဒးဖန်ဇန်မွဲတၠဂှ် ဟီုလဴထ္ၜးရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.