အလံၚ်အမာတ်လုပ်ပြိုၚ်ပေါဲရုဲမာဲ သၞာံ (၂၀၂၅) ဏံဂှ် စှ်ေချဳဒရာၚ်စန်ဒက်မာဲ ပ္ဍဲဗလးတိ ဟွံမွဲဏီရောၚ် ညးပူဗိုၚ် အလံၚ်အမာတ်ဗော်ညဳသၟဟ်မန်မွဲတၠ ဟီုရ။
ပရေၚ်ချဳဒရာၚ်စန်ဒက်မာဲဂှ် အလံၚ်အမာတ်ဂမၠိုၚ် ဟိုတ်နူ ဒှ်ဂဝိၚ်ကဵု ပရေၚ်ဂီုကၠီု ဇကုဇကုတုဲ ချဳဒရာၚ်မံၚ် လတူသဵုယှေဝ်မဳဒဳယာ Social media သၟးဂၠိုၚ်ရောၚ် သ္ဂးရ။
“ဟိုတ်နူအကာဲအရာတုဲတှေ် အလံၚ်အမာတ်လုပ်ဒုၚ်ရုဲမာဲဗွဲမဂၠိုၚ်ဂှ် ဂွံစှ်ေချဳဒရာၚ်စန်ဒက်မာဲ အကြာညးဍုၚ်ကွာန်တအ် ပ္ဍဲမုက်ဗလးတိဂှ် ဟွံမွဲဏီပုဟ်၊ ကိုပ်ကၠာဏံတှ်ေ သ္ပအဓိကကဵု ချဳဒရာၚ်ဟီုတွံအာ လတူသဵုယှေဝ်မဳဒဳယာ Social media ရဏောၚ်၊ အဵုနူဂှ်တုဲမှ မၚ်ရံၚ်အကာဲအရာတုဲတှ်ေ ဒၞာဲစှ်ေချဳဒရာၚ်ဂွံဂှ် ဆက်ချပ်တုဲတှ်ေ ဗၟံက်အာရုပ်ရဴပၠန်ဏောၚ်” သာ်ဝွံ ညးပူဗိုၚ်အလံၚ်အမာတ်ဂှ် ဟီုရ။
ပ္ဍဲပ္ၚံက်ပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ်ကၠောန်ဂှ် ညးပါလုပ်တအ်ကီု၊ ညးပူဗိုၚ်ဘိုၚ်ရေၚ်တၠုၚ်တအ်ကီု ဒှ်ညးထံက်ဂလာန်ကဵုဇြဟတ် ကုကမ္မယှေန်တအ်တုဲ ကေတ်အာအရေဝ်ပိုတ်ပိုတ်ရောၚ်ဂှ် လ္ပာ်ဂကောံပၠန်ဂတးဂမၠိုၚ်တအ် ပ္တိတ် လဝ်ပရိုၚ်နွံရ။
ဟိုတ်နူလ္ပာ်ဂကောံပၠန်ဂတးဂမၠိုၚ် ပတိတ်လဝ်ပရိုၚ်သာ်ဂှ်တုဲ ညးစၞးအလံၚ်အမာတ်လုပ်ဒုၚ်ရုဲမာဲတအ်ကီု၊ ညးဘိုၚ်ပူဗိုၚ်ရေၚ်တၠုၚ်တအ်ကီု ချဳဒရာၚ်မံၚ်ပရေၚ်စန်ဒက်မာဲ နဲညးကဵုညး သ္ၚိတ်တ်ဇြဇြအိုတ်ရ။
“ရံၚ်ကဵုပေါဲရုဲမာဲတုဲတုဲတေံတှ်ေ အခိၚ်စန်ဒက်မာဲဗီုလၟုဟ်ဏံတှ်ေ တိချဳမံၚ်သ္ဇက်ဟီုဟွံမွဲရ၊ အလံၚ်အမာတ်တအ် ချဳဂေတ်ဟီုတွံမံၚ် ပေၚ်ဍုၚ် ပေၚ်ကွာန်ရ၊ ပေါဲရုဲမာဲ (၂၀၂၅) ဏံဂှ် ဍုၚ်အဃောဒှ်မံၚ်ပၞာန်ဏောၚ်တှ်ေ ဠတုဲတှ်ေ မွဲလ္ပာ်တေံပၠန်လေဝ် ဟီုပတိတ်လဝ်ကၠးကၠးရ၊ ဟိုတ်နူဂှ်ရ အလံၚ်အမာတ် လုပ်ဒုၚ်ရုဲမာဲတအ် ဂွံစှ်ေထ္ၜးမုက်အကြာဍုၚ်ကွာန်/အရာပ်ဂှ် ဟွံဆဵုဟဂှ်” သာ်ဝွံ ညးမၚ်ရံၚ်အခါတ်အကာဲ ပေါဲရုဲမာဲလတူဍုၚ်မုဟ်ဍုၚ်မွဲတၠ ဟီုရ။
ပ္ဍဲတွဵုရးဍုၚ်မန်ဂှ် ဗော်ပရေၚ်ဍုၚ်ကွာန် (၉) ဗော် သွက်ဂွံလုပ်ပြိုၚ်နွံတုဲ အပ္ဍဲဂှ်မ္ဂး ကၠတ်ထဝ်ညးဍုၚ် (ပြည်သူ့လွှတ်တော်)၊ ကၠတ်ထဝ်ကောန်ဂကူ (အမျိုးသား လွှတ်တော်)၊ ရး ကေုာံ တွဵုရး ကဵု အလံၚ်အမာတ်ကောန်ဍုၚ်အရၚ် သီုဖအိုတ် (၂၅၄) တၠ သွက်ဂွံလုပ်ပြိုၚ်နွံရောၚ် ဂွံတီကေတ်ရ။
