ပ္ဍဲဘာတန်အလဵုအသဳလ္ၚဵုဂှ်မ္ဂး ကွးဘာစွံဂျူယှေန်ကဵု ကွးဘာဟွံစွံဂျူယှေန်ဂှ် အ္စာဘာတအ် ဆက်ဆောံဒၠောံဗ္တောန် ပါ်ခြာနွံမံၚ်ရောၚ် ကွးဘာတန်သၠုၚ် နူပွိုၚ်ဍုၚ်မုဟ်ဍုၚ် တိုန်ဘာတန်သၠုၚ်ဇြပ်ဗုမွဲတၠဂှ် ဟီုထ္ၜးရ။
ကွးဘာပ္ဍဲဘာတန်အလဵုအသဳ ဗွဲမဂၠိုၚ်ဂှ် ကွးဘာတအ်ဂွံဂွံလိက်ဂးတုဲ မ္ၚးနူအခိၚ်ဘာတုဲ တိုန်မံၚ်ဂျူယှေန် (မ္ၚးဘာ) နွံဂၠိုၚ်ရ။ ဆဂး ကွးဘာလ္ၚဵုဂှ် ဟိုတ်နူခက်ခုဲကဵုစရိတ်တုဲ မံၚ်ဂျူယှေန်ဟွံမာန်ဂှ်ရ ဗီုဇကုကဵုဇကု ဗှ်မံၚ်လိက်ပ္ဍဲသ္ၚိလေဝ်နွံရ။
ဟိုတ်နူဟွံတိုန်ဂျူယှန်တုဲ ဗှ်မံၚ်လိက်ပ္ဍဲသ္ၚိသၟးဂှ် အ္စာဘာဗ္တောန်လိက်လ္ၚဵု ပရေၚ်ဆက်ဆောံ လတူကွးဘာဂမၠိုၚ်တအ်ကီု ပရေၚ်သှ်ကလးလိက်ကီု ပါ်ခြာမံၚ်နွံရောၚ် ကွးဘာတန်သၠုၚ်ဂှ် ဟီုရ။
“ပ္ဍဲဘာဂှ်တှ်ေ ကွးဘာဗွဲမဂၠိုၚ်ဂှ် တိုန်မံၚ်ဂျူယှေန်ဖအိုတ်နွံဂၠိုၚ်၊ ကွးဘာလ္ၚဵု ခက်ခုဲကဵု ပရေၚ်ပ္ဍဲသ္ၚိ ဟွံပြေပြံၚ်ဂှ်နွံမံၚ်၊ ကွးဘာမံၚ်ဂျူယှေန်တအ်ရ အ္စာတအ် လဴကလးကဵုလိက်၊ ကွးဘာဟွံမံၚ်ဂျူယှေန်လ္ၚဵုဂှ်တှ်ေ အရေဝ်လေဝ်ဟီုအောန်မံၚ်၊ ပရေၚ်လဴသှ်ကလးလိက်လေဝ် ကွးဘာဟွံမံၚ်ဂျူယှေန်တအ်ဂှ်တှ်ေ ညး(အ္စာ)ဟွံကလးကဵုပုဟ်” သာ်ဝွံ ကွးဘာဂှ် ဟီုရ။
ဘာတန်အလဵုအသဳဗွဲမဂၠိုၚ်ဂှ် ပါဲနူအခိၚ်ဘာတုဲ အ္စာတအ် ပံက်လဝ်ဗဒမ်ဗ္တောန်လိက်မ္ၚး ဂျူယှေန်သၟးဂၠိုၚ်တုဲ ကွးဘာဗွဲမဂၠိုၚ်ဂှ် တိုန်ဘာတုဲ ဒးအာတိုန်ဗဒမ်ဂျူယှေန် နကဵုစရိတ်တၞဟ်ခြာရ။
“ဗ္တောန်လိက်ပ္ဍဲဘာဂှ် အ္စာတအ်ဗ္တောန်ထောံ ညိညိဓဝ်ရ၊ လိက်ဗ္တောန်လဝ်ပ္ဍဲဘာဂှ်ရ ဒးကလေၚ်ဗှ် ချူ ပ္ဍဲဂျူယှေန်တေံ၊ ဂျူ ယှေန်ဂှ် ဒှ်အာဘာ၊ ဘာဂှ် ဒှ်အာ ဒၞာဲဓမ္မတာ၊ ဠတုဲတှေ် ကွးဘာမံၚ်ဂျူယှေန်ပ္ဍဲအ္စာတအ်ဂှ် တုပ်မံၚ်ဒးကဵုလှုဲကဵု အ္စာတအ်ဏောၚ်တှေ် ကွးဘာဂွံလှုဲဂှ် အ္စာတအ် ဆက်ဆောံမွဲဗီု၊ ကွးဘာ အ္စာတအ်ဟွံဂွံသၠဲဂှ်တှေ် ဆက်ဆောံမွဲဗီု အဵုဒှ်ဗီုဂှ်” သာ်ဝွံ ကွးဘာတန်သၠုၚ်ဂှ် ဆက်ဟီုထ္ၜးရ။
ဗ္တောန်လိက်အခိၚ်မ္ၚးဘာ ဂျူယှေန်ဂှ် နူဌာနပရေၚ်ပညာအလဵုအသဳတအ် ပလေဝ်ပတိတ်ကၠုၚ်သၞောတ်သၞောဝ် လၟေၚ်လၟေၚ်သၞာံနွံကီုလေဝ် အ္စာပံက်ဂျူယှေန် ဂမၠိုၚ်တအ် ကေတ်လဝ်ဓဝ်ပလိုဟ်ကဵု ညးတာလျိုၚ်အဆံၚ်လတူဇကုတုဲ ကလိဂွံဒုၚ်စသိုၚ် ဩန်ဂိတုအ္စာဂှ်မွဲသွာၚ်၊ ဩန်ဂိတုပံက်ဗ္တောန်လိက်မ္ၚးဘာဂျူယှေန်ဂှ်မွဲသွာၚ်နွံရောၚ် ဂွံတီကေတ်ရ။
