အခိၚ်ရာသဳထ္ၜိုတ်တိတ်ဂိတုကထိုန်ဏံ ဍုၚ်မန်ဂှ် ဒှ်အခိၚ်ထ္ၜိုတ်တိတ်တုဲ ညးဍုၚ်မန်တအ် ဒှ်အခိၚ်ဩန်လုပ်ထတ် မွဲအခိၚ်ရောၚ် တၠကၠအ်ထ္ၜိုတ်ပိုၚ်ပြဳလဝ်တၞံထ္ၜိုတ် (၃၀၀၀) ပြၚ် နူဍုၚ်ဇြပ်ဗုမွဲတၠ ဟီုရ။
ညးဍုၚ်မန်တအ်ဗွဲမဂၠိုၚ်ဂှ် အောန်ကဵုဂၠိုၚ် ပိုၚ်ပြဳလဝ်ကၠအ်ထ္ၜိုတ်နွံဂၠိုၚ်တုဲ အောန်မ္ဂး မွဲတ္ၚဲ ဗၞတ်အကြာ (၁) ကိုဋ်၊ ဂၠိုၚ်မ္ဂး မွဲတ္ၚဲဒဵုကဵု (၅) ကိုဋ် (၇) ကိုဋ် ဩန်လုပ်မံၚ်အရိုဟ်တ္ၚဲတုဲ အခိၚ်ဏံဂှ် ဒှ်အခိၚ်ဩန်ထတ်မွဲအခိၚ်ရောၚ် သ္ဂးရ။
“ညးဍုၚ်ကွာန်ပိုဲ ဂၠိုၚ်ဂှ် ကၠအ်ထ္ၜိုတ်နွံဂၠိုၚ်ကွေံကွေံမွဲတဲ မွဲတၠတှ်ေ အောန်အိုတ်ဂှ် တၞံထ္ၜိုတ် (၄၀၀၊ ၅၀၀) ပိုၚ်ပြဳလဝ် ကၠအ်ထ္ၜိုတ်နွံမံၚ်၊ ရဲညးသ္ပမာန်ဂှ်တှ်ေ ဒဵုကဵု တၞံ (၃၀၀၀) ပြၚ် (၄၀၀၀) ပြၚ် နွံမံၚ်ဟွံအောန်ပုဟ်၊ ယဝ်ဟီုသရောပ်ထောံတှ်ေ မၞိဟ်ပိုၚ်ပြဳလဝ်ကၠအ်ဍောတ်ဍောတ်တှ်ေ မွဲတ္ၚဲ ဩန်လုပ်မံၚ် တဲအောန်အိုတ် ဗဒါဲကိုဋ်၊ ရဲကၠအ်ဂၠိုၚ်ဂၠိုၚ်တှ်ေ မွဲတ္ၚဲဒဵုကဵု (၅) ကိုဋ် (၇) ကိုဋ် နွံမံၚ်ကၠးကၠး” သာ်ဝွံ ညးပိုၚ်ပြဳလဝ်တၞံထ္ၜိုတ် (၃၀၀၀) ပြၚ် နာဲသဵုထောန် ဟီုရ။
ၚုဟ်ထ္ၜိုတ်သၞာံဏံဂှ် ၚုဟ်အောန်စှေ်အာနူသၞာံတေံကၠုၚ်တေံကီုလေဝ် ထ္ၜိုတ်ဆက်မတ်ဂှ် ထ္ပက်လုပ်စၞး တၞံထ္ၜိုတ်မအရိုၚ် ဇၟာပ်ဒေသပွိုၚ်ဍုၚ်တုဲ မွဲသၞာံကဵုမွဲသၞာံ ထ္ၜိုတ်တိတ်ဂၠိုၚ်ကၠုၚ်မံၚ်ရောၚ်ဂှ်လေဝ် သၞာဲဒဴပရေၚ်တဵုလွဳတၞံထ္ၜိုတ်မွဲတၠ ဟီုရ။
“ထ္ၜိုတ်ပ္ဍဲဍုၚ်မန်ပိုဲဏံဂှ် ကၠာတေံတှ်ေ မအရိုၚ်သၟးရ တဵုဂၠိုၚ်တုဲတှေ် ဍာ်ထ္ၜိုတ်ဂှ် တိတ်မံၚ်ဆဗၞတ်ဓဝ်ရ၊ လၟုဟ်တှ်ေ စၞးမအရိုၚ်ဂှ် မဆက်မတ်ဂကူခိုဟ်ခိုဟ်တအ် ထ္ပက်လုပ်စၞးတုဲတှ်ေ ဍာ်ထ္ၜိုတ်တိတ်ဂၠိုၚ်မံၚ်၊ ရံၚ်ကေတ်ရ ထ္ၜိုတ်တၞံမအရိုၚ်တုဲကၠုၚ်တေံ တၞံ (၅၀၀) ဂှ် ဂွံဍာ်ထ္ၜိုတ်အကြာၜိုတ် (၅၀) ပံၚ်တှ်ေ လၟုဟ် တၞံမဆက်မတ် (၅၀၀) ဂှ်တှ်ေ ဂွံမံၚ် ကဵု (၁၀၀) ပံၚ် ဒှ်မံၚ်ဏောၚ်၊ ဇှ်ရ အခိၚ်ထ္ၜိုတ်တိတ်ဏံဟီုတှ်ေ ညးဍုၚ်မန်ပိုဲဏံ ညးပိုၚ်ပြဳလဝ်ကၠအ်ထ္ၜိုတ်ဂၠိုၚ်မံၚ် ဩန်လေဝ်လုပ်ထတ်မံၚ်” သာ်ဝွံ ညးဟီုရ။
အခိၚ်ဏံဂှ် ဟိုတ်နူဒှ်အခိၚ်ထ္ၜိုတ်တိတ်တုဲ ဆေၚ်သွံဖျာကပေါတ်ရပ်စပ်မၞိဟ်တအ်လေဝ် ဒှ်အခိၚ်သွံခိုဟ်မွဲတုဲ ပ္ဍဲအရာဗက်ဩန်ဒါန် ကၠောန်ကေၚ်ကာမ္ၚဵုမွဲမွဲသာ်ပၠန်လေဝ် ရုဲအခိၚ်ထ္ၜိုတ်တိတ်ဏံဂၠိုၚ်ရ။
ၚုဟ်ထ္ၜိုတ်သၞာံဏံ (နဝ်ဝေမ်ဗာ ၁၅) ဝွံ ထ္ၜိုတ်အဆံၚ်သၠုၚ်အိုတ် RSS 1 မုက်ဂၞန် (၁) ဂှ် မွဲပံၚ် ၚုဟ်နွံမံၚ် အကြာ (၃၀၀၀) ၊ RSS 3 မုက်ဂၞန် (၃) ဂှ် အကြာ (၂၈၅၀) ၊ USS 3 စဲတ္ၚဲဂှ် အကြာ (၂၇၀၀) ၊ RSS 5 မုက်ဂၞန် (၅) ဂှ် အကြာ (၂၆၈၀) ၊ USS 5 ဍုက်က်ဂှ် နွံအကြာ (၂၂၉၀) ကဵု အကြာ (၂၄၂၀) အဆံၚ်ဆံၚ်နွံတုဲ ၚုဟ်ထ္ၜိုတ်ဂှ် မွဲဒေသကဵုမွဲဒေသ ၚုဟ်တၞဟ်ခြာနွံညိညရ။
ပ္ဍဲဍုၚ်မန်ဂှ် ကၠအ်ထ္ၜိုတ်နွံ (၅) ကိုဋ်ဨကပြၚ်တုဲ အပ္ဍဲဂှ်မ္ဂး ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် (၅) လက်ဨကပြၚ်နွံရ။ တော်ကဵုအလုံမွဲကၟိန်ဍုၚ်ဗၟာမ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) လၟိဟ်ဂၠိုၚ်အိုတ်ရောၚ် ဂွံတီကေတ်ရ။
