အကြာမွဲၜါတ္ၚဲဏံ ဒေသဍုၚ်မန် ဂံက်ဂၠိုၚ် ထ္ၜိုတ်တိတ်ပဵုဂၠိုၚ်လောန်အာတုဲ ရုၚ်စက်ဗုတ်ထ္ၜိုတ်တအ် ဒးဒေါံဇူလဝ်ရာန်ဍာ်ထ္ၜိုတ်ရောၚ် ရဲသွံဍာ်ထ္ၜိုတ်မုဟ်ဍုၚ် ဇြပ်ဗုတအ် ဟီုရ။

အခိၚ်ဂံက်ဏံဂှ် ထ္ၜိုတ်တိတ်ပဵုဂၠိုၚ်တုဲ တၠရုၚ်စက်ဗုတ်ထ္ၜိုတ်တအ် ကၠောန်ဗက်ဟွံဂတာပ်တုဲ ဒးဒေါံဇူလဝ် ပရေၚ်ရာန်ဍာ်ထ္ၜိုတ်ဂှ်တုဲ ရဲသွံဍာ်ထ္ၜိုတ်တအ် ဒှ်ကၠုၚ်ခက်ခုဲနွံရ။

“မွဲၜါတ္ၚဲဏံဂှ် ဇၟာပ်ကၠအ်ရ ထ္ၜိုတ်ပဵုမံၚ် ကြပ်ကဝက်ဒှ်မံၚ်၊ ရုၚ်စက်ကေတ်ဍာ် ထ္ၜိုတ်တအ်လေဝ် ဍာ်ထ္ၜိုတ်ရာန်လဝ်တ္ၚဲဏံဂှ် ကၠောန်ဟွံအိုတ် ကၠောန်ဗက်ဟွံဂတာပ်တုဲတှ်ေ ရုၚ်စက်ဗွဲမဂၠိုၚ်ဂှ် ဒေါံဇူလဝ်ရာန်ဍာ်ထ္ၜိုတ်တှ်ေ ရဲသွံဍာ် ထ္ၜိုတ်တအ် ဒှ်ခက်ခုဲ ဒၞာဲသွံဟွံမွဲ ဒှ်ကၠုၚ်” သာ်ဝွံ နာဲမေဝ် နူမုဟ်ဍုၚ်ဂှ် ဟီုရ။

ရုၚ်စက်ကၠောန်ထ္ၜိုတ်အဆံၚ်သၠုၚ် (အရည်အသွေးမြၚ့်ရာဘာပြားထုတ်လုပ်စက်ရုံ) ပ္ဍဲဍုၚ်မန်ဂှ် နွံလၟိဟ်ဟွံဂၠိုၚ်ဏီတုဲ အခိၚ်ဂံက်ထ္ၜိုတ်တိတ်ဂၠိုၚ်ဏံဂှ် ရုၚ်စက်ဗုတ်ထ္ၜိုတ်တအ် ကေတ်ဟွံအိုတ် ကၠောန်ဗက်ဟွံဂတာပ်တုဲ ရုၚ်ထ္ၜိုတ်လ္ၚဵုဂှ် ဒးဒေါံဇူလဝ် ပရေၚ်ရာန်ဍာ်ထ္ၜိုတ် နွံကၠုၚ်မွဲဏှေအ်မွဲဏှေအ်ရ။

“ပ္ဍဲဍုၚ်မန်ပိုဲဏံ ရုၚ်စက်ကၠောန်ထ္ၜိုတ်ကဆံၚ်သၠုၚ်ဂှ် နွံအောန်မံၚ်ဏီ ကၠအ်ထ္ၜိုတ်ဂှ် နွံမံၚ်ဇၟာပ်ပွိုၚ်ဍုၚ်ဏောၚ်၊ လၟုဟ်ပၠန်ဂှ် နူတၞံမအရိုၚ်ဂှ် ဒှ်အာတၞံမဆက်မတ်အိုတ်ရ၊ ယဝ်ရတၞံမဆက်မတ် ဂကူ (၂၄) တှ်ေ အခိၚ်ဂံက်ဏံ ထ္ၜိုတ်တိတ်ပဵုတိုန် (၂) ဆဒှ်မံၚ်၊ အခိၚ်ထ္ၜိုတ်တိတ်ဂၠိုၚ်ဏံ ရဲရာန်ဍာ်ထ္ၜိုတ်တအ် ဒေါံဇူထောံတှ်ေ ယဝ်စွံလဝ်စက်ဗုတ်ထ္ၜိုတ်ဟွံမွဲပုဟ်တှ်ေ ခက်ရ၊ ဒးကၠောန်အိက်ခေါ်ရ” သာ်ဝွံ နာဲတာဥူ နူဇြပ်ဗုဂှ် ထပ်ဟီုရ။

ရုၚ်စက်ဗုတ်ထ္ၜိုတ်ဂတှ်ေ အဆံၚ်သၠုၚ်လ္ၚဵုဂှ် ရာန်လဝ်ဍာ်ထ္ၜိုတ်ပ္ဍဲပွိုၚ်မွဲတ္ၚဲဂှ် ဂၠိုၚ်လောန်အာတုဲ ကၠောန်ထ္ၜိုတ်ဂတှ်ေ မွဲတ္ၚဲကဵု မွဲဗတမ်လေဝ် ကၠောန်ဟွံအိုတ်တုဲ ဍာ်ထ္ၜိုတ်ရာန်စွံလဝ်ဂှ် ဒိုပ်ကလောံအာလေဝ်နွံရ။

ဟိုတ်နူဍာ်ထ္ၜိုတ်ရာန်စွံလဝ်ဂှ် ဒိုပ်ကလောံအာတုဲ တၠရုၚ်စက်ဗုတ်ထ္ၜိုတ်ဂတှေ် အဆံၚ်သၠုၚ်တအ် ဒှ်ဆောံလေၚ်တုဲ ဂွံဆက်ရာန်စွံလဝ်ဍာ်ထ္ၜိုတ်တ္ၚဲလအ်လအ်ဂှ် ဟွံဂံၚ်ရာန်စွံလဝ်ဂှ်ရ ဒးဒေါံဇူလဝ် ရာန်ဍာ်ထ္ၜိုတ်ဂှ်အိုတ်ရ။

ပ္ဍဲဍုၚ်မန်ဂှ် ကၠအ်ထ္ၜိုတ်နွံ (၅) ကိုဋ်ဨကပြၚ်တုဲ အပ္ဍဲဂှ်မ္ဂး ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် (၅) လက်ဨကပြၚ်နွံရ။ တော်ကဵုအလုံမွဲကၟိန်ဍုၚ်ဗၟာမ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) ဒှ်လၟိဟ်ဂၠိုၚ်အိုတ်ဒှ်တုဲ လၟုဟ်မ္ဂး နူကဵုတၞံထ္ၜိုတ်မအရိုၚ် ဂှ် ပြံၚ်တဵုကၠုၚ် တၞံမဆက်မတ်ဂၠိုၚ်ကၠုၚ်ဂှ်တုဲ ဍာ်ထ္ၜိုတ်လေဝ် တိတ်ဂၠိုၚ်ကၠုၚ်မံၚ် လၟေၚ်လၟေၚ်သၞာံရောၚ် ဂွံတီကေတ်ရ။