အကာဲအရာၚုဟ်ထ္ၜိုတ်ပရေံတုဲ ဗ္ဂေတ်ဩန်ကမၠောန်ဟွံမာန်ဂှ်ရ ဆေၚ်ရာန်ဍာ်ထ္ၜိုတ်လ္ၚဵု ဒးဒေါံဇူကၟာတ်လဝ်ဆေၚ်နွံရောၚ် တၠကမၠောန်ရုၚ်စက်ထ္ၜိုတ်မွဲတၠ ဟီုလဴထ္ၜးရ။

ဗွဝ်ဖျာၚုဟ်ထ္ၜိုတ်သၞာံဏံဂှ် အသိၚ်ပရေၚ်ပိုန်ဒြပ်ဂၠးတိကီု၊ အသိၚ်ဗွဝ်ဖျာ ဍုၚ်ဆက်စပ်ဂှ်ကီုတုဲ အကာဲအရာ ပရေံမံၚ်ဂှ်ရ တၠရုၚ်စက်ဗုတ်ထ္ၜိုတ်လ္ၚဵုတံ ဟွံဂံၚ်ဆက်ကေတ်ဍာ်ထ္ၜိုတ်တုဲ ဒးဒေါံကၟာတ်လဝ်ဆေၚ်ရာန်ဍာ်ထ္ၜိုတ်နွံရောၚ် တၠရုၚ်စက် ဗုတ်ထ္ၜိုတ်နူဇြပ်ဗုမွဲတၠ ဟီုထ္ၜးသာ်ဝွံရ။

“ၚုဟ်ထ္ၜိုတ်သၞာံဏံဂှ် ဒဵုလၟုဟ် ဟွံပံက်ချိုတ်တ်ပၠိုတ်တ်ဏီပုဟ်၊ ရဲရာန်မံၚ်ထ္ၜိုတ်လၟုဟ်ဂှ် ထိၚ်တုဲရာန်လဝ်ရ၊ အကာဲအရာၚုဟ်ထ္ၜိုတ်ဂၠးတိဂှ် ပရေံမံၚ်၊ ရဲရာန်မံၚ်နွံညိညိဂှ် ဍဵုလဝ်ၚုဟ်တုဲ ဒးရာန်မံၚ်၊ ဩန်ဗွဝ်ဖျာထ္ၜိုတ်ဂှ် ဟွံဂေတ်ပုဟ်၊ ဟိုတ်နူဂှ်ရ ဆေၚ်ရာန်ထ္ၜိုတ် ဆေၚ်ရာန်ဍာ်ထ္ၜိုတ်ဗွဲမဂၠိုၚ်ဂှ် ဒးဒေါံဇူကၟာတ်ဆေၚ်နွံမံၚ်” သာ်ဝွံ တၠကမၠောန်ရုၚ်စက်ဗုတ်ထ္ၜိုတ်ဂတှ်ေ လတူဍုၚ်ဇြပ်ဗုမွဲတၠ ဟီုထ္ၜးရ။

အကာဲအရာၚုဟ်ထ္ၜိုတ် ပရေံဒၟံၚ်ကွေံကွေံဂှ်တုဲ ဆေၚ်ရာန်မံၚ်ထ္ၜိုတ်ဂတှ်ေတအ်လေဝ် ဍဵုဖျဝ်လဝ်ၚုဟ် ရာန်မံၚ် နကဵုၚုဟ်အောန်အောန်ဂှ်တုဲ တၠကၠအ်ထ္ၜိုတ်လ္ၚဵုတအ်ကီု၊ တၠရုၚ်စက်ဗုတ်ထ္ၜိုတ်ဂတှ်ေလ္ၚဵုတအ်ကီု ထိၚ်လဝ်ထ္ၜိုတ် ဟွံဂွံသွံထ္ၜိုတ်ဂှ်ရ ဩန်ဂွံဗ္ဂေတ်ကမၠောန် သွံရာန်ထ္ၜိုတ်ဂှ် ဒေါံဒေၚ်အာနွံရ။

“အကာဲအရာဗွဝ်ဖျာထ္ၜိုတ်ဂှ် ပရေံမံၚ်ကွေံကွေံဟဂှ်ရ ရုၚ်စက်ဗုတ်ထ္ၜိုတ်တအ် ဒှ်အာဒဒိုက်ကွေံကွေံရ၊ ဩန်ဟွံဂေတ်ရ၊ ပ္ဍဲကဵုဒေၚ်ရာန်မံၚ်ထ္ၜိုတ်တအ်လေဝ် ရာန်မံၚ်ၚုဟ်အောန်မံၚ်ကွေံကွေံ၊ လ္ၚဵုဂှ်တှ်ေ ချိၚ်တုဲသွံမံၚ်ကီုလေဝ် ဂွံဗ္ဂေတ်ကမၠောန်ဂွံ၊ လ္ၚဵုညးသ္ပမာန်တှ်ေ ညးထိၚ်လဝ်၊ ထိၚ်လဝ်လအ်ပၠန် ဩန်ဂွံဗ္ဂေတ်ကမၠောန်ဂှ် ခက်ခုဲပၠန်” သာ်ဝွံ တၠရုၚ်စက်ဗုတ်ထ္ၜိုတ်ဂှ် ဆက်ဟီုရ။

ၚုဟ်ထ္ၜိုတ်သၞာံဏံ စပံက်တၟိဂှ် ထ္ၜိုတ်အဆံၚ်သၠုၚ်အိုတ် RSS 1 မုက်ဂၞန် (၁) ဂှ် မွဲပံၚ် အကြာ (၃၀၀၀) ၊ RSS 3 မုက်ဂၞန် (၃) ဂှ် နွံအကြာ (၂၈၅၀) ၊ USS 3 စဲတ္ၚဲဂှ် နွံအကြာ (၂၇၀၀) ၊ RSS 5 မုက်ဂၞန် (၅) ဂှ် ၚုဟ်အကြာ (၂၆၈၀) ၊ USS 5 ဍုက်က်ဂှ် အကြာ (၂၂၉၀) ကဵု (၂၄၂၀) ၚုဟ်နွံကၠုၚ်ဂှ် လၟုဟ်ဏံ ၚုဟ်ထပ်သဝ်စှ်ေအာပၠန်တုဲ ၚုဟ်ဍာ်ထ္ၜိုတ်လေဝ် နူကဵုမွဲပံၚ် (၂၆၅၀) ဂှ် လၟုဟ်သှ်ေမံၚ် မွဲပံၚ် (၁၃၅၀) ဓဝ်ရောၚ် ဂွံတီကေတ်ရ။