ကျာ်ပိတြေံ ကၠာဟွံဗၠိုက်ဍာ်
အာကာ
ဟိုတ်နူဍာ်ဇတ်ကှ် အခိၚ်က္ညၚ် ဟွံတုပ်သၟဟ်ကဵု သၞာံတုဲကၠုၚ်တေံဂှ်ရ ကျာ်ပိတြေံ ဗၠိုက်မံၚ်သၟဝ်ဍာ် မၞုံဇရေၚ်ကွာန်ဝၚ်္က ဍုၚ်သေံကီု ကွာန်ဝၚ်္ကတြေံကီု ဘာတြေံ သီတြေံတံကီု ကလေၚ်မံက်တိုန်ကၠုၚ်ဂှ် ဂွံဆဵုကေတ်ရ။
လောန်ကၠုၚ် ၜိုတ် ၂ ဂိတုတေံဟေၚ် မပ္တံကဵု ကျာ်ပိတြေံ မဒှ်အာဲကၟာဲတြေံတံ ကလေၚ်မံက်တိုန်ကၠုၚ်တုဲ ကၟုဲထဳ ကၠုၚ်ဗဵုလ္ၚတ် နူဍုၚ်သေံတံလေဝ် မွဲတ္ၚဲကဵု မွဲတ္ၚဲ ဂၠိုၚ်ကၠုၚ်မံၚ်ဂှ် ဂွံဆဵုကေတ်ရ။
လောန်ကၠုၚ် ၜိုတ် ၂၅၀ သၞာံ အခိၚ်ဍုၚ်မန် ရာဇဌာနဳ ဟံသာဝတဳလီုတေံဟေၚ် ကောန်ဂကူမန် ဒဴလုပ်ဍုၚ်သေံတံ ဒက်ပတန်လဝ် ကျာ်စေတဳဝွံရောၚ်ဂှ် ကျာ်ဇၞော်အာစာ ဟံသာရာဇာ မသ္ပဒတဴဒၟံၚ် ပ္ဍဲဍုၚ်ကျာ်ပိ ဟီုမြော်တဴ ပ္ဍဲသဘၚ်ကၞာ တ္ၚဲဍုၚ်မန် ဟံသာဝတဳလီု ပေၚ် ၂၅၃ သၞာံဏံရ။
လောန်ကၠုၚ် ၜိုတ် ၂၇ သၞာံတေံဂှ် အလဵုအသဳဍုၚ်သေံတံ သိုၚ်ခၞံကၠုၚ် ကၟိုန်ဍာ် ထံၚ်ခၞောန်တုဲ အလုံကွာန်တြေံဝၚ်္ကမွဲ ဗၠိုက်စှေ်အာ သၟဝ်ဍာ်တုဲ ကျာ်ပိတြေံဂှ်လေဝ် စိုပ်အာသၟဝ်ဍာ်ပေၚ်ပေၚ်ရ။
ရုၚ်စက်ပတိတ်ဇြဟတ်ပၟတ် နကဵုဇြဟတ်ဍာ် မၞုံပ္ဍဲထံၚ်ခၞောန် ခရိုၚ်ကမ္မရဳဂှ် ဒးပဓာန်မံၚ်ကဵု ဍာ်မၞုံအပ္ဍဲၜဳကြုၚ် ဒေသဂှ်ရ။
ပ္ဍဲဒၞာဲ ကြုၚ်သၚ်ဂလာ၊ ကြုၚ်ကၚ် ကော် ၜဳခဳ၊ ကြုၚ်လာန်တဳ ပိကြုၚ်တံ ပံၚ်ကောံဂှ် ကျာ်ပိတြေံ မၞုံတန်တဴမံၚ်ရ။
ကြုၚ်ပိသွာၚ်ဂှ် ပံၚ်ကောံတုဲ ကတဵုဒှ်ကၠုၚ် ကၞာၚ်ၜဳခွေအ် ဍောတ်မွဲရ။ ဍာ်ဇွောဝ်စှေ် နူကၞာၚ်ၜဳခွေအ်တံဂှ် ထိၚ်ဒဝ်လဝ်ဍာ် နကဵုကၟိုန်ဍာ် ထံၚ်ခၞောန်တုဲ ပ္တိတ်မံၚ်ဇြဟတ်ပၟတ် နကဵုဇြဟတ်ဍာ်တံဂှ်ရ။
“နူကဵုကွာန်တြေံ ဗၠိုက်အာဍာ်တုဲ ဍာ်ဇတ်ဗီုဏံဂှ် သီုလၟုဟ်တှေ် ဂွံဆဵုကေတ် ပန်အလန်ရ။ ၜိုတ်ထပှ်သၞာံတှေ် မွဲဝါ ဍာ်ဇတ်ဗီုဏံရ” သာ်ဝွံ နာဲချေတ်ၚိုဲ ညးမဂယိုၚ်လမျီု နကဵုကမၠောန် လိၚ်သ္ၚိဖံၚ် မၞုံဇရေၚ်ဒဒန်ဆု ကွာန်ဝၚ်္ကတၟိ ဟီုရ။
သၞာံအာတေံ အခိၚ်က္ညၚ်ဍာ်ဇတ်ဂှ် ပ္ဍဲကြုၚ်သၚ်ဂလာ ဍာ်မၞုံ ၁၂ ဟတ်ကီုလေဝ် သၞာံဏံဂှ် ဍာ်ဇတ်စှေ်အာ စဵုကဵုသှေ် ၆ ဟတ်ရောၚ်ဂှ် နာဲချေတ်ၚိုဲ ညးမလိၚ်ကၠုၚ် သ္ၚိဖံၚ် ပွိုၚ် ၂၅ သၞာံဂှ် ဟီုရ။
အတိုၚ်ပရိုၚ်သေံ ဟီုလလောၚ်ပတိတ်လဝ်ဂှ်မ္ဂး ပ္ဍဲက္ညၚ်ဍုၚ်သေံ သၞာံဏံဂှ် ကၟိုန်ဍာ် မၞုံပ္ဍဲဍုၚ်သေံ ၂၇ ကၟိုန် ဍာ်ဇတ်ကှ်အာ နူက္ညၚ်သၞာံတုဲကၠုၚ်တေံ ၅၀ တၟံကၠံတုဲ သွက်သ္ဂောံပတိတ်ဇြဟတ်ပၟတ်၊ သွက်ပရေၚ်တဵုလွဳ ပၠုပ်ဍာ်၊ သွက်ဍာ်သွုၚ် ဍာ်ရပ်စပ်တံဂှ် ဒှ်ကၠုၚ်အခက်အခုဲ ဇၞော်ကဵုဇြဟတ်ရ။
လၟုဟ် ၜိုန်လုပ်ကၠုၚ်ဥတုဗြဲကီုလေဝ် ဗြဲဟွံဂူခိုဟ်ခိုဟ်ဏီတုဲ ဍာ်ၜဳကြုၚ် မၞုံပ္ဍဲဒေသတံဂှ် သွက်ဂွံအောန်စှေ် နွံမာန်မံၚ်ဏီရ။
ကျာ်ပိတြေံ မံက်ကၠုၚ်လၟုဟ် ကေုာံ ကျာ်ပိပယျဵုလၟုဟ်တံဂှ် သ္ၚောဲခြာ ၜိုတ် ၂၀ တိုၚ်တုဲ ကျာ်ပိတြေံလၟုဟ်ဂှ် ကာလဨကရာဇ်မန်တံ မၞုံပြာကဋ်တေံဂှ် ဒှ်ကၠုၚ်ပယျဵုဒၞက် မန်-သေံရောၚ်ဂှ် ညးအာယုက်ဗျုထဴတံ ဟီုကၠုၚ်လဝ် နွံရ။
ဟိုတ်နူဍာ်ဇတ်ကှ်အာဂှ်ရ ညးဂယျိုၚ်လမျီု နကဵုကမၠောန်လိၚ်သ္ၚိဖံၚ်တံ ကၟုဲကၠုၚ်ဇူဒီုအောန်တုဲ ဒှ်အခက်အခုဲကီုလေဝ် ညးမကၠုၚ်လ္ၚတ်ကွာန်တြေံ ကေုာံ ကျာ်ပိတြေံတံ ဂၠိုၚ်ကၠုၚ်မံၚ်ဇၟာပ်ဇၟာပ်တ္ၚဲတုဲ ဒၞာဲကၟုဲဇူဒီု မၞုံပ္ဍဲဍုၚ်သၚ်ခလပူရီတံ ဂွံကၟုဲဇူဒီုဂၠိုၚ်ကၠုၚ်မံၚ်ရောၚ်။
