ဌာန်ပရိုၚ်ဗၠးၜးမန် – သ္ဂောံဒက်ပ္တန်အာ ပရေၚ်ဓရ်ၜိုဟ်လလောံမာန်ဂှ် အလုံဍုၚ်မွဲဒေါအ်ထောံပန်ပှော်တုဲ အလဵုအသဳတၟိဂှ် ညံၚ်ဂွံတက်ကျာကဵုဂကောံမဟာမိတ်ကောန်ဍုၚ်အရၚ်တံ ဒးဖန်ဇန်အာထေက် သာ်ဝွံ ကံၚ်ဇြဳဖိတ်ဒရေဝ်ညဳသၟဟ်ကောန်ဍုၚ်အရၚ် UNFC အာတ်မိက်လဝ်ရ။

ဒပ်ပၞာန်ကရေၚ်၊အဃောထ္ၜးဒၟံၚ်ဒြဟတ် ( ဗီု- KIC)

နကဵုအလဵုအသဳတၟိလၟုဟ်ဏံ မိက်ဂွံဒက်ပ္တန်ပရေၚ်ၜိုဟ်လလောံနွံဟီုကၠုၚ်ကီုလေဝ် ပဝ်လသဳပါ်ဆီလ္တူကောန်ဍုၚ်အရၚ်တံ နွံမံၚ်ရောၚ်ဂှ် ဂကောံ UNFC ဂွိၚ်ဂွါဲဒၟံၚ်ဖိုအ်ရ။

နကဵုဒုဥက္ကဌ UNFC ဗဒိုဒေဗေတ်တာကပဝ်ဂှ် “ မိက်ဂွံတက်ကျာ နကဵုဗီုပြၚ်ဂကောံမဟာမိတ်ပိုဲရ၊ အလုံမွဲဍုၚ်တက်ကျာမာန်မှ ဂွံပရေၚ်ၜိုဟ်လလောံမာန်၊ ဗီုညးတံ (အလဵုအသဳ) ဟီုဂးလဝ် တွဵုရးညးကဵုညးရတက်ကျာဟီုဂှ် ဒုၚ်တဲဟွံမာန်ပုဟ်” သာ်ဝွံ ဟီုရ။

ပရေၚ်ဍုၚ်ကွာန်ဟွံညိၚ်ဝပ်တုဲ ဟိုတ်နူပၟတ်ပၞာန်ဍုၚ် ဂဵုသၠာန်ကၠုၚ်ပွိုၚ် ၆၀ သၞာံပြၚ်ဂှ်ရ ဍုၚ်ဗၟာသယံဇာတဂၠိုၚ်ဟီုဒၟံၚ်ဂှ်လေဝ် ပရေၚ်ပိုန်ဒြပ်ယုတ်သဝ်စှေ်အာရောၚ်၊ ဟိုတ်ဂှ်တုဲ ပြသၞာပရေၚ်ဍုၚ်ကွာန်ဂှ် နနဲပရေၚ်ဍုၚ်ကွာန်ညံၚ်ဂွံသောၚ်ကလးအာညးသ္ကံ သာ်ဝွံ ဂကောံမဟာမိတ် UNFC ချူဗစိုပ်လိခ်ကုဇရေၚ်သမ္မတ ဥူတိၚ်သိၚ် ပ္ဍဲကဵုဂိတုအဝ်ဂါတ် ၁၅ လောန်ကၠုၚ်ဏံ ဂွံတီရ။

အပ္ဍဲလိခ်ချူဗစိုပ်လဝ်ကု သမ္မတဂှ် “အလဵုအသဳဗၟာဂွံကၠုၚ်လဝ်အဝဵုဍုၚ်အဆက်က်တံဂှ် နနဲပရေၚ်ဍုၚ်ကွာန် ဟိုတ်နူဟွံသောၚ်ကလးကၠုၚ် ပရေၚ်ကောန်ဍုၚ်အရၚ်တံတုဲ ပွိုၚ် ၆၀ သၞာံပြၚ် ပ္ဍဲအပ္ဍဲဍုၚ်က္တဵုဒှ်ကၠုၚ်ရ။ ဟိုတ်ဂှ်တုဲ ၜိုန်ရဒှ်ဍုၚ်သယံဇာတဂၠိုၚ်ဟီုကီုလေဝ် လၟုဟ်မ္ဂးပ္ဍဲဂၠးတိဏံ လုပ်အာအဝေါၚ်ဍုၚ်ဒိုက်ဂတ်အိုတ်မွဲတုဲ ဒှ်အာကောန်ဍုၚ်လဇုဲလလုဲအိုတ်ရ၊ ကုကောန်ဂကူမွဲကဵုမွဲလေဝ် ပရေၚ်ညဳသၟဟ်လီုလာ်ဒၟံၚ်တုဲ ပေါက်ဗတိုက်ဂမၠိုၚ်က္တဵုဒှ် အကာဲအရာယှုက်ထုဲဒၟံၚ်ဗွဲမလောန်”။

နကဵုဂကောံပိက္ဍိုပ်ကၠောန်သ္ပပရေၚ်ဆဵုဂဗတက်ကျာမာန်မှ ကလေၚ်ဒက်ပ္တန်ပရေၚ်ညဳသၟဟ် အလုံဍုၚ်မွဲမာန်ရောၚ် သာ်ဝွံ ညးအုပ်ကာနာနာ UNFC နာဲဟံသာ ကဵုလဝ်ကသပ်နွံရ။
ဆဂး အပ္ဍဲလိခ် UNFC ချူဏာလဝ်အပ္ဍဲဂိတုအဝ်ဂါတ်ဏံဂှ် ကိစ္စပိက္ဍိုပ်တက်ကျာ ဟွံထမံက်ပတိတ်လဝ်ရ။ ၜိုန်ဂှ်လေဝ် ပတေဟ်ဇြဟတ်တုဲ လၟုဟ်ပရေၚ်ထပက်ဝေၚ်မံၚ်ပၞာန် အပ္ဍဲဒေသကောန်ဍုၚ်အရၚ်တံဂှ် ညံၚ်ဂွံဒေါအ်ထောံပြဟ်ဟ်တုဲ ညံၚ်ဂွံလလောၚ်ပတိတ်အာဒေါအ်ပန်ပှော်အလုံဍုၚ်မွဲကီု နကဵုအလဵုအသဳကၟိန်ဍုၚ် ညံၚ်ဂွံတက်ကျာကဵု ညးစၞးကောန်ဍုၚ်အရၚ် UNFC တံကီု သာ်ဝွံ အာတ်မိက်လဝ်နွံရ။

ပြဟ်ဟ်ဏံ ကောန်ဂကောံ UNFC မွဲဂကောံ ဗော်သၠးပွးဂကူကချေၚ် KIO ဂှ် သဳကၠဳဒၟံၚ်ကဵု အလဵုအသဳတွဵုရးဍုၚ်ကချေၚ် ဂွံတီရ။ ၜိုန်ဂှ်လေဝ် တၚ်တုပ်စိုတ်ပရေၚ်ဒေါအ်ပန်ပှော် မွဲတၚ်မှဟွံဂွံလးလးဏီဒှ်တုဲ ပေါဲဗတိုက်က္တဵုဒှ်မံၚ်ဖိုအ်ရ။

ကံၚ်ဇြဳဖိတ်ဒရေဝ်ညဳသၟဟ်ကောန်ဍုၚ်အရၚ် UNFC ဂှ် ပ္ဍဲဂိတုဖေဖဝ်ဝါရဳ ၂၀၁၁ သၞာံဏံ ဒက်ပ္တန်ကၠုၚ်လဝ်တုဲ ဗော်သွးကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ မုခ်ဒပ်ကောန်ဂကူချေန် CNF၊ ဂကောံသၠးပွးကောန်ဂကူကချေၚ် KIO၊ ဗော်တဴတက်ကောန်ဂကူကရေၚ်ဍာဲ KNPP၊ ဆက်စပ်ကဵု ဗော်တဴတက်ဍုၚ်သေံဇၞော် SSPP/SSA တုဲဂကောံကောန်ဂကူပအိုဝ်ဗၠးၜး PNLO ၊ မုခ်ဒပ်ဗၠးၜးတွဵုရးပလံၚ် PSLF၊ ကံၚ်ဇြဳကောန်ဂကူဍုၚ်ရခေၚ် ANC၊ သမဂ္ဂဒဳမဝ်ကရိတ်တေတ်ဠာဟူ LDU၊ ဂကောံကောန်ဂကူ “ဝ” WNO ကေုာံ ဂကောံကောန်ဂကူကခောၚ် KNO တံပါလုပ်ရ။