နဒဳမန် – ဂကောံကဵုပညာသၟတ်မန် (Mon Youth Educator Center) တံ စပံက်ရုၚ် ပ္ဍဲကဵုစၟတ်တ္ၚဲ (၇) ဂိတုဂျောန်တုဲ သ္ဘၚ်ကၞာပံက်ရုၚ်ဂှ် ကၠောန်သ္ပကၠုၚ် ဒၞာဲပတန်ရုၚ် ပ္ဍဲကဵုဂၞန်သ္ၚိ (၃၀၅)၊ မြိုၚ်သာယာ၊ ဂၠံၚ် ၂၁၊ ဍုၚ်မတ်မလီုရောၚ် သ္ဂောံတီကေတ် နူကဵုဂကောံဂှ်ရ။

ဂကောံဂှ်ဝွံ စဒက်ပတန်ကၠုၚ် နူသၞာံ (၂၀၁၁) ဂိတု နဝ်ဝေမ်ပါ ၂၅ တုဲ လၟုဟ်မှ သ္ဂောံစပံက်ရုၚ်ရ။ သွက်သၟတ်မန်တံ လညာတ်ပညာ ညံၚ်သ္ဂောံကေက်သ္ကာအာကီု ပ္ဍဲအရာပရေၚ်ဍုၚ်ကွာန်ပၠန်လေဝ် ညံၚ်သ္ဂောံကၠိုဟ်အာနာနာသာ်ကီု ရန်လဝ်သာ်ဏံတုဲ မ္ဒးဒက်လဝ် ဂကောံဏံရောၚ် ညးကေတ်ဒၟံၚ်တာလျိုၚ် မာန်နေဂျာ ‘နာဲစိစောန်’ လဴထ္ၜးစကၠုၚ်ရ။

“ပ္ဍဲကဵု သၟတ်မန်ပိုဲတှေ် ပိုဲရန်လဝ် ဆေၚ်စပ်ကဵု ပရေၚ်မၞိဟ်၊ ပရေၚ်ဍုၚ်ကွာန်၊ ပရေၚ်ပိုန်ဒြပ် လညာတ်နာနာတံဂှ် ညံၚ်သ္ဂောံသၠုၚ်တိုန်အာရောၚ်＂ နာဲစိစောန် ဟီုထ္ၜးကဵု ဌာန်ပရိုၚ်ဗၠးၜးဂကူမန်ရ။

တၚ်ရန်တၟအ်ဂကောံတၞဟ်ဟ်တအ်ဝွံ သၟတ်မန်တအ် စိုတ်ဓါတ်ဆာန်ဂကူဂှ် ညံၚ်သ္ဂောံသၠုၚ်တိုန်၊ သွက်ဂွံဆက်စၠောံ ကုဂကောံသၟတ် ကောန်ဍုၚ်အရေၚ်ဂမၠိုၚ်တံတုဲ ညံၚ်သ္ဂောံပံၚ်ဗစပ်အာမာန်၊ သၟတ်မန်တံ ညံၚ်သ္ဂောံဒတုဲဖဵုဍုၚ်ကွာန်မာန်၊ ညံၚ်သ္ဂောံယိုက်ဂၠေၚ်အာ တာလျိုၚ်အခေါၚ်အရာကောန်ဂကူ ဍိုက်ဍိုက်ပေၚ်ပေၚ် အကြာညးဍုၚ်ကွာန်တံမာန်ရောၚ် ဟီုဂးဏာရ။

＂အခိၚ်မွဲတ္ၚဲတှေ် ညံၚ်သ္ဂောံဒှ်အာ ဂကောံသၟတ်အလုံမွဲဍုၚ်ရာမညမွဲမာန်၊ တၚ်ရန်တၟံပိုဲ တၚ်အဓိကဂှ် ပိုဲဖျေံလဝ် ၜိုတ်ဏံရ” သာ်ဝွံ နာဲစိစောန် လဴထ္ၜး တၚ်ရန်တၟံ ညးတံရ။

လၟုဟ်မ္ဂး လၟိုဟ်ညးမပါလုပ် ပ္ဍဲဂကောံ နွံၜိုတ် (၆၀) တၠတုဲ ကဵုဒၟံၚ်ဘာ အခေါၚ်အရာမၞိဟ် ကေုာံ ဘာဆေၚ်စပ်ကဵု သၞောဝ်ဥပဒေဒက်ပတန်ဍုၚ် ကီုရ။ ညးနွံပၟိက်ဝါသၞာမိက်ဂ္ဂံပါလုပ် ပ္ဍဲဂကောံဏံမ္ဂး ပါလုပ်မာန်တုဲ ညးစၞးပွိုၚ်ဍုၚ်တံဂှ်လေဝ် သွက်သ္ဂောံဆက်စှေ်အာ ပရေၚ်စန်ဒက်နွံရောၚ် နာဲစိစောန် ဟီုရ။