သၟဟ်သၟန် – ၚုဟ်ထၜိုတ်တွဵုရးဍုၚ်မန်ဂှ် ဟွံဆက်စပ်ကဵု ၚုဟ်ထၜိုတ်ဂၠးကဝ်မွဲသာ် အတိုၚ်ကမ္ပဏဳကြုက် တံ ထပိုတ်ကဵုၚုဟ်မးဂှ်ဟေၚ် ဒးသွံရာန်မံၚ်ရောၚ်ဂှ် ဥက္ကဋ္ဌ ဂကောံသၟာကၠအ်ထ္ၜိုတ် တွဵုရးဍုၚ်မန် နာဲကျာန်ယျေတ် ဟီုရ။

ပ္ဍဲတွဵုရးဍုၚ်မန် ကမၠောန်မဒှ်ပိုန်ဒြပ်ဂၠိုၚ်အိုတ် ကမၠောန်ကၠအ်ထၜိုတ်ဝွံ ပရေၚ်သြန်လုပ်ဂှ် တန်တဴမံၚ်ကဵု ၚုဟ် ထၜိုတ်တိုက်ရိုက်ရ။

“ဗွဝ်ဖျာဂၠးကဝ်ဂှ် ပိုဲတံဟွံတီဟဂှ်ရ။ ပ္ဍဲဍုၚ်ပိုဲဏံ သွံရာန်မံၚ်ညးသ္ကအ်ဂှ် ၚုဟ်ဖျာဂၠးတိ မွဲမှလေဝ်ဟွံမွဲပုဟ်။ အတိုၚ် ၚုဟ်ဖျာကြုက် သီုဖအိုတ်ရ” သာ်ဝွံ နာဲကျာန်ယျေတ် ဟီုရ။

ၚုဟ်ထၜိုတ် ကာလလၟုဟ်ဝွံ ထၜိုတ်တီုတီု စဲလဝ်မွဲၜါတ္ၚဲဂှ်မ္ဂး ကလိဂွံၚုဟ်မး မွဲပံၚ် (၅၀၀) ဒ္ကေဝ်ဓဝ်တုဲ ထၜိုတ်ကြဳ ကြဳ (လွတ်) တံဂှ် မွဲပံၚ် (၆၅၀) ဒ္ကေဝ်ရ။ ယဝ်ရကၠောန်စဵုကဵုစိုပ် လိုၚ်ဒၞပ် (ဖိနပ်လိုၚ်း) မ္ဂး မွဲပံၚ် (၈၀၀) ဒ္ကေဝ် ကလိ ဂွံမာန်ရ။

နူကဵုပွိုၚ်ဍုၚ်မုဟ်ဍုၚ် ကွာန်လေံတက် တၠကၠအ်ထၜိုတ် မိခေန်သဵုနဲဂှ် “ၚုဟ်ထၜိုတ် တ္ၚဲကှ်ဂှ်သွံဂှ် မွဲပံၚ်ဂွံၜိုတ် (၈၀၀) ဒ္ကေဝ်မှ ပြေပြံၚ် သီုကောန်ရဲ သီုတၠကၠအ်မာန်ဏောၚ်။ ဗီုလၟုဟ်ဂှ် ပါ်ပရအ်တုပ် ပိုဲကဵုမံၚ်ကောန်ရဲဂှ် ကောန်ရဲ လေဝ် ဂွံဆစရိတ်ပုၚ်ရ၊ ပိုဲလေဝ်စအိုတ်အာ စုတ်ဝဲါလေဝ်ဟွံမာန်ရပုဟ်” သာ်ဝွံ ညးဟီုကဵု သၞံၚ်တိုၚ်ရ။

“ပ္ဍဲဍုၚ်သေံတေံ ယဝ်ရၚုဟ်ထ္ၜိုတ်စှေ်ဏောၚ်တှေ် အလဵုအသဳဂှ် ဍေံရာန်ထိၚ်လဝ်ကဵုရ။ အခိၚ်ၚုဟ်ထၜိုတ် က လေၚ်စိုပ်ဒၞာဲမှ ဍေံကလေၚ်သွံပၠန်ရ။ ပ္ဍဲဍုၚ်ပိုဲဏံဂှ် ဂွံဃောမ်ရာန်လဝ် ဗီုဂှ်သြန်ဟွံမွဲပုဟ်” သာ်ဝွံ နာဲကျာန်ယျေတ် ထံက်ထ္ၜးကဵု လဆဵုဂဗညးရ။

ၜိုန်ရၚုဟ်ထၜိုတ်ဆက်စှေ်မံၚ်ကီုလေဝ် အခိၚ်ဗြဲစဂူဏံ ၚုဟ်ဝဲါဂှ် ပ္ဍဲဗွဝ်ဖျာတန်တဴမံၚ် အတိုၚ်ပကတိဖိုဟ်ရ။ ဗွဲ တၟေၚ်ကပေါတ်တိတ်နူကဵုပရေၚ်တဵုလွဳ သီုဖအိုတ်ဂှ် ၚုဟ်စှေ်မံၚ်ဖအိုတ်တုဲ ကပေါတ်ဒးဗပေၚ်စုတ် ပ္ဍဲပရေၚ်တဵုလွဳ ကပေါတ်ပတိတ်နူစက်တံဂှ် ၚုဟ်က္ဍၚ်မံၚ်ဖအိုတ်ရောၚ် ညးဆက်စပ်ကဵုဗွဝ်ဖျာမွဲတၠ ပါ်ပဲါလဝ်ရ။

“ဒက်ဂကောံလေဝ် ဟွံမာန်ပုဟ်၊ ကၠောန်ဗက်ဟွံမာန်ပုဟ်၊ ဂွံသၠုဲပြဟ်တှေ်တုဲ စိုတ်စရိုတ်ဇကုလေဝ် ပဠေဝ် ဟွံမာန် ပုဟ်၊ ကမၠောန်ဇကုလေဝ် ပဠေဝ်ဟွံမာန်တှေ် ဗီုကြုက်ဗ္ဂေတ်ဂှ်တှေ် ဒးဒုၚ်မံၚ် ဆဂှ်ရ” သာ်ဝွံ ညးကၠောန် ကၠအ်မွဲ တၠဟီုရ။

ၚုဟ်မးဗ္ၜိုတ် အခိၚ်ပစ္စုပ္ပန်ဏံဂှ် မွဲပံၚ်မ္ဂး နွံမံၚ် (၅၀၀ – ၆၅၀) တုဲ အပ္ဍဲဂှ် တၟော်စုတ်သီုစရိတ်ကောန်ကမၠောန်၊ သီု စရိတ် ပ္တိတ်ကပေါတ် သီုဖၟိုတ်တုဲမ္ဂး ညးမဒှ်တၠကၠအ်ထ္ၜိုတ်တံ အောန်အိုတ် ဒးကျမံၚ် (၅၀) ဒ္ကေဝ်ဏီရ။

ဟိုတ်ဂှ်ရ ပ္ဍဲကဵုအခိၚ်ၚုဟ်မးထ္ၜိုတ် မသဝ်စှေ်မံၚ်ဆက်က်ဟွံပိုတ်သ္ကုတ်ဏံ ရဲကၠောန်ထ္ၜိုတ်တံ ညံၚ်ဂွံကၠောန်ပ္တိတ် တၞးဗ္ၜိုတ် မဍိုက်ပေၚ်ဍာ်ဒ္ကေဝ်မာန်ဂှ် ပၟိက်ဇၞော်မံၚ်တုဲ တၞးထ္ၜိုတ်ဇကု နွံကဵုဍာ်ဒ္ကေဝ်မှလေဝ် ဂွံၚုဟ်မးခိုဟ်ဟ်မာန် ရောၚ် သာ်ဏံ ညးစိစောန်ဗွဝ်ဖျာတံ ထံက်ထ္ၜးအိုတ်ရ။