ပ္ဍဲတွဵုရးဍုၚ်ကရေၚ်၊ အကြာဂၠံၚ်ကွဳစက်တက်ကၠောံအာကၠုၚ် မြဝတဳ ကဵု ဍုၚ်ကအ်ကြိက် ပ္ဍဲဗဒိုပ်လ္တူဒဵုဒေါန ဒၞာဲဇူဒီု(အလယ်ဗိုလ်တဲ) ၜိုတ်နူ ဂယး ၜိုတ် ၁၁ နာဍဳ၊ လွဟ်ဇၞော်မဝ်တာ ၈၁ မဳလိမဳတာ ပန်နၚ်နူသ္ၚောဲမွဲမ ဒတုံခတိုဟ်အာဂှ် မၞိဟ်ချိုတ်အာ ၄ တၠ၊ ၁၂ တၠ ဒးဒုၚ်ဘဲဝပ်ရ သာ်ဝွံ ဂွံတီကေတ် နူသၞာဲဒဴရုၚ်ဂဥုဲကအ်ကြိက် မွဲတၠရ။
“ပ္ဍဲပွဳပွူဂှ် ဟွံမိၚ်ရမျာၚ်ပေဲါဗတိုက်ပုဟ်၊ လွဟ်မဇၞော်ပန်နၚ်နူသ္ၚောဲသ္ၚောဲမွဲမ စှေ်အာဒၞာဲတာဲဖျာဟတိုဟ်အာဒၞာဲဂှ်တုဲ ကၟုဲပလုၚ်ဇူဒီုမံၚ်တံဒးအာ ဘဲ ချိုတ်အာပ္ဍဲဒၞာဲဂှ် ၃ တၠ၊ စိုပ်ရုၚ်ဂဥုဲတုဲ ကလေၚ်ချိုတ်အာမွဲတၠပၠန်ရ＂ သာ်ဝွံ ညးဟီုရ။
တုဲပၠန် မၞိဟ်ဒးလဝ်ဘဲဝပ်သ္ကာတ်မြဟ်တံဂှ် ဆက်ပလံၚ်ဏာရုၚ်ဂဥုဲဍုၚ်ဘာအၚ်တေံ သာ်ဝွံ ညးဆက်ဟီုရ။
“အေမလွဟ်ဗတိုဟ်အာဂှ် ၈၁ mm ဂးလဝ်ရ၊ နူဒၞာဲပိုယ်မံၚ်ဒၟံၚ်ဏံ ပန်ဏာလေဝ် စိုပ်ဟွံမာန်ပုဟ်၊ ပ္ဍဲတွဵုရးဍုၚ်ကရေၚ်ဏံ ဂကောံရပ်လွဟ်တံ ဂၠိုၚ်မံၚ်ဏောၚ်၊ ဂကောံလဵုပန်ဏာဂှ် သွက်ဂွံတီဟွံ လောဲပုဟ်＂ သာ်ဝွံ ဒပ် DKBA သ္ကိုပ်ဗျူဟာပၞာန် ကလဵုထူဗဝ် သ္ကိုပ်ဗိုလ်ဇၞော် သဝ်သာန် အံၚ် ဟီုရ။
ပ္ဍဲအရာ ပန်ဏာလွဟ်ဇၞော်ဏံဂှ် ဂကောံ DKBA ပိုယ်ဟွံသေၚ်ပုဟ် သ္ကိုပ်ဗိုလ်ဇၞော် သဝ်သာန်အံၚ် ဟီုဂလာန်တးပဲါ ဟီုကဵု ဌာန်ပရိုၚ်ဗၠးၜး မန် IMNA ရ။
ပ္ဍဲတ္ၚဲဂှ်ပၠန် လ္ပာ်အခိၚ်နူဂယးဂှ် ပ္ဍဲကွာန်ကာန်ညဳနံၚ် ပွိုၚ်ဍုၚ်လာၚ်ဗၠဲ(လှိုင်းဘွဲ့) ဂှ် အကြာဒပ်အလဵုအသဳကဵု DKBA တံ ဒှ်ပေဲါဗတိုက် ပန် စုတ်လွဟ်ဇၞော်ဂှ် ကွာန်တူတုဲ ညးဒေသတံ ဒးဂြိပ်ဒဴတိတ်အာအိုတ် ဂွံတီကေတ်ရ။
သၟာၚ်နူဂှ်ပၠန် ပ္ဍဲဂိတုအံက်တဵုဗာ ၁၀ ပၠန် ဗ္ဒာဲဍုၚ်ကအ်ကြိက်ဂှ် ဒပ်အလဵုအသဳကဵု ဂကောံဒပ် DKBA အဃောဒှ်ဒၟံၚ်ပေဲါဗတိုက်ဂှ်ကီု ပ္ဍဲပွိုၚ်ဍုၚ် လာၚ်ဗၠဲ၊ ဒေသမဲသဝဝ်တေံဂှ်လေဝ် ဂကောံ DKBA ကဵု ဒပ်အလဵုအသဳတံ ဒှ်ပေဲါဗတိုက် ၃ ဒၞာဲကီုရောၚ် ညးမၞုံက္ဆံၚ် DKBA မွဲတၠ ဂးရ။
ပ္ဍဲဂိတုတုဲကၠုၚ်စၟတ်တ္ၚဲ ၂၇ အခိၚ်နူဂယးတေံပၠန် တွဵုရးကရေၚ်ကဵု ပယျဵုဒၞက်ဆက်စပ်ဒၟံၚ် တွဵုရးဍုၚ်မန် ပ္ဍဲပွိုၚ်ဍုၚ်ကျာ်မြဟ် ဗ္ဒာဲကွာန် ယှိုဲဝါချံၚ်ဂှ်လေဝ်ကီု၊ ပ္ဍဲစၟတ်တ္ၚဲ ၂၆ ဂှ် ဂကောံကွာန်ကလိုၚ်ကနာၚ် ပ္ဍဲကွာန်ကယေန်တဝ် ဂှ်လေဝ်ကီု ဂကောံ DKBA ကဵု ဂကောံဒပ်ပၞာန် အလဵုအသဳဗၟာတံ စဒှ်ကၠုၚ်လဝ်ပေဲါဗတိုက်ရ။
