-
- ကမ္မတဳဗဟဵု ဗော်ကောန်ဂကူမန်(MNP)
မူအပြောံချူဓဇက်ဏံဂှ် ပ္ဍဲကဵုဂိတုမာတ် ၁၇ ကာလကၠောန်သ္ပကောံဓရီု ကမ္မတီဗဟဵုတေံမ္ဂး ပ္တိန်ထ္ၜးတုဲ ရုဲစှ်အာ ညးစၞးအလံၚ်အမာတ်တံရောၚ် ညးအုပ်ကာနာနာ ဗော်ကောန်ဂကူမန် နာဲလျးတၟးဟီုရ။
“ပြဟ်ဟ်ဏံမူအပြောံဂှ် ကေၚ်ကာဗဟဵုတံ ပံက်လဝ်ဂကောံတုဲ ချူမံၚ်ဖိုဟ်၊ ကေၚ်ကာဗဟဵုတံ ချူခၞံမူအပြောံတုဲတှေ် ပ္ဍဲကဵုစၟတ်တ္ၚဲ(၁၇) တေံ အတိုၚ်ကမ္မတဳဗဟဵုသ္ပဒတန်ဂှ် ကေတ်တုဲ ဖျေံအာသ္ဂုတ်သွာတ်ဏောၚ်၊ ညးလဵုလုပ်ပြိုၚ်ဒၞာဲပွိုၚ်ဍုၚ်လဵု၊ ညးစၞးမူစိ သွဟ်တိက်ကၠုၚ်ဏောၚ်” သာ်ဏံ နာဲလျးတၟးဟီုရ။
ပ္ဍဲကဵုဂိတုဖေဖဝ်ဝါရီ ၂၈ ဂှ် ကေၚ်ကာဗဟဵု ဗော်ကောန်ဂကူမန်တံ သ္ပကောံဓရီု ဒၞာဲဌာန်ဂအုပ်ဗဟဵု ပ္ဍဲဍုၚ်မတ်မလီု အရာပ်မျိုၚ်သာယာတုဲ ဖျေံလဝ်သ္ဂုတ်သွာတ်ဏံ ဂွံတီရ။
ပ္ဍဲကဵုရုဲစှ် သ္ပဒတန်ဍာ်ဒကေဝ် ညးဒုၚ်ရုဲစှ်မာဲတံဂှ် ဍာ်ဒကေဝ်ပရေၚ်အာက္ဍိုပ် စိုတ်ဓါတ်ပရေၚ်ဍုၚ်ကွာန်နွံနွံ၊ ကၠောန်ကမၠောန် ချိုတ်တ်ပၠိုတ်တ်လေပ်တုဲ ပူဂဵုဖျေံသ္ကုတ်သွာတ်ဍာံဍာံမာန်တံ ဒးတံပါလုပ်ထေက်ရောၚ် ညးကဵုမံၚ်ဘာပရေၚ်ဍုၚ်ကွာန် ကိုမေန်ထောန်နံၚ် ဟီုရ။
ကိုမေန်ထောန်နံၚ် ဂှ် “လေပ်ပညာတှေ် ဒှ်က္ဍိုပ်သ္ကိုပ်မာန်ဟီုလေဝ် မၞိဟ်အာက္ဍိုပ်ပရေၚ်ဍုၚ်ကွာန်ဟီုဂှ် ဒးကၠောန်ပရေၚ်ဍုၚ်ကွာန်လေပ်ရောၚ်၊ ပရေၚ်ဍုၚ်ကွာန်ဒှ်မံၚ်လၟုဟ် ပရေၚ်ဍုၚ်ကွာန်အဌာန်ဂတတေံ ဒးသ္ၚဳဂၠိပ်လေပ်ရောၚ်၊ စိုပ်စၠတ်ထဝ်တှေ်တုဲ သ္ပဗီုဂှ် ဟွံဂွံပုဟ်၊ ဒးဖျေံပဝ်လသဳ ပရေၚ်ဍုၚ်ကွာန်မွဲမွဲမာန်ဏောၚ်၊ သွက်ညးဍုၚ်ကွာန်တံ ဒးကၠောန်ကမၠောန်မာန်ဏောၚ်အဲညာတ်ကေတ်ဗီုဏံ၊ အဓိကဂှ် ညးဒတူလိုၚ် လ္ပာ်ညးဍုၚ်ကွာန်တံမာန် ထေက်ကဵုဒးဒှ်ရောၚ်” ဟီုရ။
ၜိုန်ဂှ်လေဝ် ဒၞာဲအလုံတွဵုရးဍုၚ်မန်မွဲ ဗော်ကောန်ဂကူမန်ရန်လဝ် သွက်ဂွံလုပ်ပြိုၚ်ပေါဲရုဲစှ်မာဲသၟးဟွံက ဒၞာဲရးဒေသဇၞော်လ္ဂုၚ်၊ ဗဂေါ၊ တွဵုရးကရေၚ် မပတံပွိုၚ်ဍုၚ် ကံကြိက်၊ ရးဒေသဇၞော် တနၚ်သြဳ မပ္တံပွိုၚ်ဍုၚ် ဍာ်ဗု၊ ထဝါဲ၊ ကံသံၚ်တံဂှ် လုပ်ပြိုၚ်အာရောၚ် ပရိုၚ်တိတ်မံၚ် ကီုလေဝ် သ္ပဒတန်ဟွံဂွံဏီရ။
နူကဵုပေါဲရုဲမာဲ ၁၉၉၀ တေံ နကဵုယၟု ဗော်ဒဳမဝ်ကရေသဳကောန်ဂကူမန် MNDF ဒုၚ်ရုဲလဝ်မာဲ အပ္ဍဲကဵုညးစၞး ၁၉ တၠဂှ် ဂွံဇၞးအမာတ် ၅ ဒၞာဲ၊ ဗွဲကြဴဏံ နကဵုယၟုဗော်ဒဳမဝ်ကရေသဳမန် MDP၊ လၟုဟ် ဗော်ကောန်ဂကူမန် MNP တန်တဴကၠုၚ်ရ။
ပ္ဍဲကဵုပေါဲရုဲမာဲသၞာံ ၂၀၁၀ ဂှ် ဗော်ဒဳမဝ်ကရေသဳကောန်ဂကူမန် MNDF ဟွံဒုၚ်ရုဲလဝ်ကီုလေဝ် စိုပ်သၞာံ ၂၀၁၅ သဘၚ်သဳကၠဳဗော်ကောန်ဂကူမန် အလန်ပထမ ပ္ဍဲဂိတုဂျာန်နဝါရဳအိုတ်ဂှ် ဖျေံကၠုၚ်သ္ကုတ်သွာတ် သွက်ဂွံလုပ်ဒုၚ်ရုဲမာဲဏံရ။
တုပ်ကဵုသာ်ဂှ်ကီု ဗော်ဒီမဵုကရေဇြဳအလုံရးမန် AMDP ဂှ်လေဝ် သွက်ဂွံဒုၚ်ရုဲမာဲ သၞာံ ၂၀၁၅ ဏံဂှ် ကံက်မံၚ်စရၚ် အလံၚ်အမာတ်လုပ်ဒုၚ်ရုဲမာဲတံ ကီု ဂွံတီကေတ်ရ။
