ကမ္မတဳကမၠောန်ဓမံက်ရုပ်ရဴကမၠောန် ပရေၚ်ၜိုဟ်လလမ်ကၟိန်ဍုၚ် (UPWC) ကဵု ဂကောံပ္ညဳပ္ညပ်ဒေံါပန်ပှော် အလုံကၟိန်ဍုၚ် NCCT တံဝွံ ပ္ဍဲဂိတုမာတ် (၃၁) လောန်ကၠုၚ်ဏံဂှ် ချူဓဇက်လိက်ကသုက်မူအပြောံ ပရေၚ်ဒေံါပန်ပှော်အလုံကၟိန်ဍုၚ် (NCA) တုဲဒှ်အာတုဲ ကၠောန်ဗဒှ်ဏာ ပေဲါထ္ပက်စၟတ်တဲ ပ္ဍဲဌာန်ဒတန်ၜိုဟ်လလမ်ဗၟာ၊ ပ္ဍဲဍုၚ်လ္ဂုၚ်ဂှ်ရ။

ပ္ဍဲကဵုထ္ပက်စၟတ်တဲ လိက်ကသုက်မူအပြောံ ပရေၚ်ဒေံါပန်ပှော်ဂှ် လ္ပာ်အလဵုအသဳတံ ဒုၚ်တဲပေၚ်ၚ်နွံကီုလေဝ် ဒးပ္တိုန်ထ္ၜးဒၟံၚ်ကဵု ပ္ဍဲပေဲါကောံဓရီုဇၞော်(ကဆံၚ်သၠုၚ်) ဂကောံရပ်လွဟ် ကောန်ဂကူကောန်ဍုၚ်အရၚ်တံဏီရောၚ် က္ဍိုပ်သ္ကိုပ် NCCT ဂမၠိုၚ်တံ ဟီုဂးအိုတ်ရ။

က္ဍိုပ်သ္ကိုပ်ဂကောံ NCCT နာဲဟံသာဂှ် “မွဲလ္ပာ်ဂှ်လေဝ် ဒးပ္တိုန်လ္တူတေံဏောၚ်။ လ္ပာ်ပိုဲဂှ်လေဝ် ပ္တိုန်ထ္ၜးလ္တူတေံဏောၚ်။ လ္တူထ္ပက်လဝ်စၟတ်တဲဏံဂှ် မွဲမွဲလ္ပာ်ဂှ် ပလီုပလာ်ဏာတှေ် ၜိုတ်ပရေၚ်ၜိုဟ်လလမ်လီုဟေၚ် နွံရ။ ပ္ဍဲကဵုပေဲါကောံဓရီုဇၞော်ဂှ်လေဝ် အယောၚ်အလာ သွက်ဂွံပလေဝ်မူအပြောံဂှ် နွံမာန်ရ။ တၚ်နၚ်အလဵုရောဂှ် ဟီုဟွံမာန်ဏီရ” သာ်ဝွံ ဟီုရ။

တုဲပၠန် ပ္ဍဲပေဲါကောံဓရီုဇၞော် NCCT ဂှ် သၟာၚ်နူကောန်ဂကောံ (၁၂) ဂကောံတုဲ ဂကောံရပ်လွဟ် ကောန်ဂကူကောန်ဍုၚ်အရၚ် (၁၀) ဂကောံတၞဟ်ဟ်တံဂှ်လေဝ် သွက်ဂွံတိုန်စိုပ်ဂှ် ကော်ဘိက်အာတုဲ ညံၚ်ဂွံပါလုပ် ပ္ဍဲကဵုထ္ပက်စၟတ်တဲ (NCA) ဂှ်လေဝ် ဂစာန်အာရောၚ် နာဲဟံသာ ဆက်ဟီုရ။

ၜိုန်ဂှ်လေဝ် ဂကောံ UPWC ဥူအံၚ်မေန် က္ဍိုက်က္ဍိုပ်ဂှ်ဝွံ ညးတံထ္ပက်အာစၟတ်တဲ ကုကောန်ဂကောံ NCCT (၁၂) ဂကောံ သဳကၠဳဒၟံၚ်ညးသ္ကံဂှ်ကဵု ဂကောံတၞဟ်သၟာၚ် (၄) ဂကောံတံ ဗွဲမပြဟ်ရောၚ်ဂှ် က္ဍိုပ်သ္ကိုပ် UPWC ဥူအံၚ်မေန် ဟီုရ။

“လ္ပာ်ပိုဲဂှ် ဒုၚ်မံၚ်တဲ သီုဖအိုတ်ရ။ မွဲလ္ပာ်ဂှ်လေဝ် ဒုၚ်တဲသီုဖအိုတ်ဏောၚ် စၟဳလဝ်ရ။ ဒုၚ်တဲဗီုဏံတှေ် မၚ်မံၚ်တ္ၚဲသ္ဂုတ်စၟတ် ထ္ပက်စၟတ်တဲဟေၚ်ရ။ နကဵုကဆံၚ်ပထမဂှ်တှေ် ပိုဲတံထ္ပက်စၟတ်တဲကဵု (၁၆) ဂကောံဟေၚ်ရ။ ဂကောံတၞဟ်တံပဵုကၠုၚ် ပိုဲတံထပ်သဳကၠဳတှေ် လက်ထက်အလဵုအသဳဏံ ဟွံဂတာပ်ပုဟ်။ ဟိုတ်ဂှ်ရ ပိုဲတံ ကဵု(၁၆)ဂကောံဟေၚ် သွက်ဂွံထ္ပက်စၟတ်တဲဂှ် ကၠောန်အာဏောၚ်” သာ်ဝွံ ဥူအံၚ်မေန် ဟီုရ။

လိက်ကသုက်မူအပြောံ ပရေၚ်ဒေံါပန်ပှော် အလုံကၟိန်ဍုၚ် NCCT ဂှ်ဝွံ ဂကောံဥူအံၚ်မေန်က္ဍိုက်က္ဍိုပ် မၞိဟ်မသုန်တၠ (ဥူတုၚ်ဇြဝ်၊ ဒုသ္ကိုပ်ပၞာန်ဇၞော်မျေအ်သိုဝ်၊ ဒုသ္ကိုပ်ပၞာန်ဇၞော်တိတ်နာၚ်ဝေန်၊ ညးစၞးကၠတ်ထဝ် ဥူခက်ထုၚ်နာန်) ကဵု ဂကောံ NCCT နာဲဟံသာ က္ဍိုက်က္ဍိုပ် မၞိဟ်မသုန်တၠ (ပဒိုဝ်ကွေဝ်ထူဝေန်၊ သ္ကိုပ်ပၞာန်ဂေါန်မဝ်၊ ဒံက်တာသလိုၚ်လျာန်မှုၚ်သာခံၚ်၊ သ္ကိုပ်ဗဵုဇၞော်ဃောန်ဥက္ကာ) တံ ထ္ပက်လဝ်စၟတ်တဲရ။

လိက်ကသုက်မူအပြောံ ပရေၚ်ဒေံါပန်ပှော်အလုံကၟိန်ဍုၚ် မၞုံအခန် (၇) ခန်၊ ပိုဒ် (၃၃) ပိုဒ်၊ ပိုဒ်ဍောတ် (၈၆) ပိုဒ်ဂှ်ဝွံ ပ္ဍဲဂိတုမာတ် (၃၁) ဂှ် ထ္ပက်ဏာစၟတ်တဲတုပ်စိုတ်တုဲ အပ္ဍဲဂှ်မ္ဂး တၚ်နၚ်ပ္ညဳပ္ညပ်ဟွံဂွံဂမၠိုၚ် သွက်ဂွံသ္ဂုတ်သွာတ်အာ ပ္ဍဲပေဲါသဳကၠဳဂတတေံဂှ် ချူဓမံက်စုတ်လဝ်ရ။

လိက်ကသုက်မူအပြောံ ပရေၚ်ဒေံါပန်ပှော် အလုံကၟိန်ဍုၚ်ဏံဂှ် ကလေၚ်ပ္တိုန်ထ္ၜးကဵု က္ဍိုပ်သ္ကိုပ်သီုၜါလ္ပာ်ရောၚ် ဂွံတီကေတ်တုဲ ပ္ဍဲကဵုအကာဲအရာ တုပ်စိုတ်သီုဖအိုတ်ဂှ်မ္ဂး ထ္ပက်စၟတ်တဲကဵု လိက်ကသုက် NCA ရ။ လက္ကရဴဂှ်မ္ဂး ဆက်ဓမံက်အာရုပ်ရဴ ပေဲါသဳကၠဳပရေၚ်ဍုၚ်ကွာန်ဂမၠိုၚ်ရောၚ်။