သမ္မတကၟိန်ဍုၚ်ကော်ဘိက်လဝ် သွက်ဂွံထ္ပက်စၟတ်တဲ ဒေါံပန်ပှော်အလုံဍုၚ် NCA ဂှ် နကဵုဗော်ဍုၚ်မန်တၟိ ဒတူလိုၚ်အာအတိုၚ်က္ဍိုပ်သ္ကိုပ် ဂကောံဒပ်ပံၚ်ကောံ UNFC ဖျေံလဝ်သ္ကုတ်သွာတ်ဏောၚ် ဥက္ကဌဗော်ဍုၚ်မန်တၟိ နာဲထဝ်မန်

ဟီုလဴကဵု ဌာန်ပရိုၚ်ဗၠးၜးမန် IMNA ရ။

နာဲထဝ်မန်ဂှ် “ နကဵုတၚ်(၁) ထပက်စၟတ်တဲ NCA ဏောၚ်ဟီုတှေ် ဂကောံရပ်လွဟ် ကောန်ဍုၚ်အရေၚ်တံ ညံၚ်ဂွံပါလုပ်သီုဖအိုတ်၊ မွဲပၠန်ဂှ်တှေ် နကဵု UNFC ဒတူလို်ၚ်အာ ဏောၚ်ဟီုတှေ်အတိုၚ်ကောန်ဂကူဂမၠိုၚ် ဖျေံလဝ်သ္ကုတ်သွာတ် ဒတူလိုၚ်အာခိုၚ်ခိုၚ််ဗိုန်ဗိုန်ဏောၚ်၊ တၚ် ၃ ဂှ်တှေ် ဒတူလိုၚ်အာအတိုၚ်ဂှ် ဒှ်ဟွံမာန်ပုဟ်၊ ဒှ်အာ ပရေၚ်တာဒၞာသွက်ပရေၚ်ၜိုဟ်လလမ်ဏောၚ်တှေ် အတိုၚ် ဂကောံ UNFC ဖျေံလဝ်သ္ကုတ်သွာတ်ဂှ် ဗော်ပိုဲဒတူလိုၚ်အာဏောၚ်” ဟီုရ။

ဂကောံရပ်လွဟ်ကောန်ဂကူကောန်ဍုၚ်အရၚ်ဂမၠိုၚ် မပ္တံကု ဂကောံဗော်ဍုၚ်မန်တၟိ MNSP၊ ဂကောံဗၠးၜးကောန်ဂကူကချေၚ် KIO ၊ (ဗော်သွးကောန်ဂကူကရေၚ်) KNU ၊ (ဗော်တဴတက်ကောန်ဂကူကရေၚ်ဍာဲ) KNPP ၊ (ဗော်ပၠတရဴချေန်) CNF ၊ (ဒပ်ပၞန်စန်ပကောံညဳသာဍုၚ်ဝ) UWSA ၊ (ဗော်ဍုၚ်သေံ(သျှာန်) တဴတက်) SSPP/ SSA၊ (ကံၚ်သဳကလေၚ်ဒက်ပ္တန်ဍုၚ်သေံ-သျှာန်) RCSS/SSA၊ (ကံၚ်သဳပရေၚ်ၜိုဟ်လလမ်ကရေၚ်) KNU/KNLA-PC၊ (ဒပ်ပၞာန်ကရေၚ် ရေၚ်တၠုၚ်ဖဵုဒဳမဝ်ကရေသဳ) DKBA၊ (ဒပ်ပၞာန်ညဳသာကောန်ဂကူ-ဂကောံမိုၚ်ဠာ) NDAA၊ (ဒပ်ပၞာန်ကွးဘာအလုံဍုၚ်ဗၟာ) ABSDF၊ (ဗော်ဗၠးၜးရခေၚ်)ALP၊ (ဂကောံဗၠးၜးကောန်ဂကူပအိုဝ်)PNLO၊ (ကံၚ်သဳသဵုယှေဝ်လေတ်ဂကူနာဂ- ကပ်ပလန်)NSCN-K တံအပံၚ် ၁၅ ဂကောံ ပ္ဍဲကဵုဂိတုအဝ်ဂေတ် ၁၁ ဂှ် သမ္မတကၟိန်ဍုၚ် ဥူသိန်းစိန်ကော်ဘိက်လဝ်ရ။

ဆဂး ဂကောံရပ်လွဟ် ကိုဝ်ကန် MND-AA ၊ ဒပ်ပၞာန်ဂကူတအောၚ် (ပလံၚ်) TNLA၊ ဒပ်ပၞာန်ရခေၚ် AA၊ ဂကောံကောန်ဂကူဝ WNO၊ ဂကောံပံၚ်ကောံဒဳမဝ်ကရေက်တေတ်ဠာဟူ LDU ကဵု ကံၚ်သဳကောန်ဂကူရခေၚ် ANC ၆ ဂကောံတံ သွက်ဂွံထ္ပက်စၟတ်တဲဂှ် အလဵုအသဳ ဟွံကော်ဘိက်ဏီရ။

“မူ NCA ဏံတုဲဒှ်အာခိုဟ်ဟ်ဂှ် မိပ်မံၚ်စိုတ်ရ၊ ဆဂး ခက်မံၚ်ကဵု ဟွံကော်ဘိက်ဂကောံရပ်လွဟ်သီုဖအိုတ်ဂှ် မွဲသာ်ဓဝ်ရ၊ ဆေၚ်စပ်ကဵုပရူဏံလေဝ် ဂကောံဒပ်ပံၚ်ကောံပိုဲ သဳကၠဳ ပ္ညဳပ္ညပ်အာဏောၚ်” နာဲထဝ်မန်ဆက်ဟီုရ။

ကောံဓရီု ညးစၞးဂကောံဒေါံပန်ပှော်အလုံဍုၚ် ကဆံၚ်သၠုၚ် (SD) ဂှ် ပ္ဍဲကဵုဂိတုအဝ်ဂေါတ်စၟတ်တ္ၚဲ ၂၁ စဵုကဵုစိုပ်၂၃ ကၠောန်ဗဒှ် ပွိုၚ် ၃ တ္ၚဲ ပ္ဍဲဍုၚ်သေံ ဒၞာဲဍုၚ်ဇံၚ်မာဲ ဂွံတီရ။

ဂကောံ KNU ၊ DKBA ၊ RCSS ၊ ABSDF ၊ တံထပက်စၟတ်တဲ NCA ရောၚ်လလောၚ်တြး လဝ်တုဲရ။

တုပ်သာ်ဂှ်ကီု ပ္ဍဲကဵု ထပက်စၟတ်တဲ ဒေါံပန်ပှော် အလုံဍုၚ် NCA ဂှ် ဂကောံရပ်လွဟ်ကောန်ဂကူကောန်ဍုၚ်အရၚ် သီုဖအိုတ် ညံၚ်ဂွံပါလုပ်ဂှ် ဂကောံမပါလုပ် ပ္ဍဲကမ္မတဳ ဂကောံပညဳပညပ် မဟာဇန် ၂၆၀ ဂကောံတံ ပ္ဍဲကဵုဂိတု အဝ်ဂေတ် ၁ရ ဂှ် ပတိတ်လိက်လလောၚ်တြးတုဲ အာတ်မိက်အလဵုအသဳနွံရ။

အတိုၚ်လဟီု ညးကဵုကသပ် နူကဵုဌာနဗဟဵု ပရေၚ်ၜိုပ်လလမ်ဍုၚ်ဗၟာ MPC ဂှ်မဂး ပရေၚ်ထပက်စၟတ်တဲ ဒေါံပန်ပှော်အလုံဍုၚ် NCA ဏံဂှ် သမ္မတ ဦးသိန်းစိန်၊ ဂအုပ်သ္ကိုပ်က္ဍိုက်ပ်ပၞာန် သ္ကိုပ်ဗိုလ်ပၞာန်ဇၞော် မေန်အံၚ်လှိုၚ် ကဵု က္ဍိုပ်သ္ကိုပ်ဂကောံရပ်လွဟ်ကောန်ဍုၚ်အရၚ် ၅ တၠ၊ က္ဍိုပ်သ္ကိုပ် SD ၃ တၠ တံပ္ဍဲကဵုဂိတု အဝ်ဂေတ် ၂၅ တေံ သွက်ဆဵုဂဗညးဂဗတက်ကျာ ပ္ဍဲနေဝ်ပျဳတဝ်ရောၚ်ဂွံတီကေတ်ရ။