ခတဵုမုက်ဗ္စူတိ ဗီုရုပ်လိက်တၟအ်ကျာ်ပရပထုမ် စၟတ်သမ္တီတ္ၚဲကောန်ဂကူမန် ဗဟဵု မရနုက်ကဵု (၆၉) ဝါဂှ် စဗ္စူ ဏာ ပ္ဍဲဌာနကၠောန်ဗဒှ်ကဆံၚ်ဗဟဵုကၠာတုဲ ကဆံၚ်ၚ်ဂှ် ဆက်ပစူဏာ လၟေၚ်ၚ်ရောၚ် ဂွံတီကေတ်ရ။
ခတဵုမုက် တ္ၚဲကောန်ဂကူမန် ဗဟဵု(GS)
“လိက်တၟအ်ဆဵုလဝ် ပ္ဍဲကျာ်ပရပထုမ် ပ္ဍဲကဵုဍုၚ်သေံတေံရ။ ပိုဲရန်တၟအ်ဂှ်တှေ် အခိၚ်တေံ မန်ပိုဲပတန်ကၠုၚ်လဝ် ဍုၚ် ပ္ဍဲကဵုဍုၚ်သေံတေံ ဍုၚ်ဒွါရဝတဳ၊ ဍုၚ်ဟရိဘုဥ္ဇတံ နွံမံၚ်ဏောၚ်။ အခိၚ်ကာလတ္ၚဲဏံဂှ် ပ္ဍဲဍုၚ်သေံဂှ်တှေ် ကွာန်ဟီု အရေဝ်မန်၊ မၞိဟ်ဟီုအရေဝ်မန်လေဝ်အောန်စှေ်အာယျ။ ပိုဲဂွံကလေၚ်ဗှ်သၞာတုဲတှေ် ပ္ဍဲဍုၚ်ပိုဲလေဝ် ဗီုအတေံ ညံၚ် ဂွိုအ်ကၠေံအာ ဗီုလဵုဂွံထိၚ်အာဂကူပိုဲဂှ်တှေ် ညးဍုၚ်ကွာန်ပိုဲ မိက်ဂွံကဵုတီကီုရ” သာ်ဝွံ နာဲတၠညး ဒု-ဥက္ကဋ္ဌ ကမ္မတဳ ကၠောန်ဗဒှ်တ္ၚဲကောန်ဂကူမန် ဗဟဵု ဟီုရ။
လောန်ကၠုၚ် (AD-၂) ဗွဝ်ကၠံတေံ ဍုၚ်သေံလၟုဟ် နူဍုၚ်က္ၜၚ်ကံက် ဗွဲဒိုဟ်နေရတိ အခြာ (၃၀) တိုၚ် ဂကူမန်တံ ကေၚ်ပတန်ကၠုၚ်လဝ် ဍုၚ်ဒွါရဝတဳ ဒက်ပတန်လဝ်ကျာ်စေတဳ ဗွဲမဂၠိုၚ်ရ။ ပ္ဍဲဍုၚ်နခမ်ပထုမ်ဂှ် ပ္တန်လဝ်ကျာ်စေတဳ ပရပထုမ်တုဲ ချူကှေ်လဝ်လိက်တၟအ်လေဝ် နွံမံၚ်ကီုရ။ ဂွံဆဵုကေတ် လိက်တၟအ်ၜါသ္ကုတ်ဝွံ ဒှ်လိက်စၟတ်သမ္တီကဵု ဒါန်ရောၚ် ချူထမံက်လဝ် ပ္ဍဲခတဵုမုက်ဗ္စူတိရ။
စနူကဵုဂိတုဂျာန္နဝါရဳ (၁၄) ဂှ် စပ္တံဗ္စူဏာ ခတဵုဗုက်ဗစူတိကဆံၚ်ကဟဵု ပ္ဍဲကဵုကွာန်ကလအ် ပွိုၚ်ဍုၚ်ၜါသွာၚ် ဒေ သတကအ်ခၟိုၚ်ကၠာအိုတ်တုဲ ဗွဲလၟေၚ်ကဆံၚ်ဗဟဵုဂှ် ဗ္စူအာဒစာံဒၞာဲရ၊ ပ္ဍဲကဵုဒေသတကအ်ခၟိုၚ်ဂှ် မွဲကွာန်မ္ဂး ခတဵုမုက်ဗဟဵုမွဲတၞး နူကဵုဗဟဵုညံၚ်ဂွံကဵုဏာတုဲ ညးဍုၚ်ကွာန်တံ ဂွံဗစူအာမာန်ဂှ် ဖျေံလဝ်သ္ဂုတ်သွာတ်နွံရ။
စပ်ကဵုခတဵုမုက်ဗ္စူတိ ပရောပရာလိက်တၟအ်ကျာ်ပရပထုမ်တုဲ ညးအုပ်ကာ ဂကောံသုတေသနဝၚ်မန် နာဲဗညာ ဂုဏ်ဂှ် “ပရောပရာကဵုဒါန်ကျာ်၊ အရှာံကျာ်ပါဏောၚ်။ ခေတ်ဂှ် တှေ် သက္ကရာဇ်ခရေတ် ၜိုတ် (အေဒဳ-၅) ကၠံဗွဝ် ဍေံကော်ဟဂှ်ဏောၚ်” သာ်ဝွံ ညးဟီုရ။
ပ္ဍဲလိက်တၟအ်ကျာ်ပရပထုံဂှ် နကဵုဘာသာအက္ခရ်လိက်မန်ဟေၚ် ချူစၟတ်သမ္တီလဝ် ပရောကဵုဒါန်လဝ် ကျာ်၊ အရှာံကျာ်ဝိဟာရ ကဵုလဝ်ဒါန်တၞံသတ်ဗြဴတံ ပါလုပ်မံၚ်ဂှ်ဂွံဆဵုကေတ်ရောၚ် ညးဆက်ဟီုရ။
ဒၞာဲဒးစကာ ပရောပရာလိက်တၟအ် မနွံမံၚ်ဍုၚ်သၟာၚ်ဂှ် စပ်ကဵုၜံက်ခဲါမံၚ်ဒေသသုဝဏ္ဏဘုံတံ ကပေါတ်သက်သဳ ဝၚ်မန် နွံမံၚ်တၟာဟလိုၚ် ထေက်ကဵုဒးကဵုဖျုန်ထမံက်ပတိုန်ရုပ်ရဴရောၚ် ညးစိုတ်လုပ်စကဵုဝၚ်မန်တံ ဟီုရ။
စနူကဵုတ္ၚဲကောန်ဂကူမန် မရနုက်ကဵု (၄၉) ဝါတေံ စဒက်ပတန်ကၠုၚ်ကမ္မတဳဗဟဵု ညံၚ်ဂွံဗဒှ်ခတဵုမုက်ဗ္စူတိ မွဲဗီု ဓဝ်ဖျေံကၠုၚ်ဗီုပြၚ်တုဲ ပတိုန်ထ္ၜးကၠုၚ်ဗီုရုပ် ဝၚ်မနုဿဳဟ၊ ဝၚ်လိက်တၟအ်သီကလျာဏဳ၊ ဝၚ်ကျာ်သၟိၚ်မနူဟဝ်၊ ဝၚ်ခၞိၚ်သၟိၚ်ဓမ္မစေတဳ၊ မပ္တံသာ်ဝွံ ပရေၚ်ဝၚ်အာဲကၟာဲမန်နွံကၠုၚ်အဆက်က်ဂှ် ထမံက်ကၠုၚ်လဝ်ရ။
