ကြက်ကၠုၚ်စိုပ်တ္ၚဲကောန်ဂကူမန် မရနူက်ကဵု (၆၉) ဝါသၞာံဏံဝွံ ပွိုၚ်ဍုၚ်ညးကုညး၊ ကွာန်ညးကုညး သွက်ဂွံကၠောန် ဗဒှ်ဒၞဲါဒေသကွာန်ဇဳဇဳမာန် ပလေဝ်ပလေတ်ဒၟံၚ်ဗီုပြၚ်ညးကုညးအိုတ်တုဲ ဒၞဲါလ္ၚဵု အပ္ဍဲမွဲကွာန်ဓဝ် သွက်ဂွံကၠောန်ဗဒှ် အာ တ္ၚဲကောန်ဂကူဂှ် ၜါစၚ်လေဝ်နွံရ။

ပြဟ်ဟ်ဏံ အပ္ဍဲပွိုၚ်ဍုၚ်မုဟ်ဍုၚ် ဂတမုက်ကွာန်မယာန် ဗၟံက်ဂၠံၚ်ကွဳစက်မတ်မလီု-ရေဝ်ဂှ် ပ္တိုန်လဝ်ဂတဵုမုက်ပစူတိ တ္ၚဲကောန်ဂကူၜါ နွံဒၟံၚ်မွဲရေၚ်တုပ်တုပ်ဂှ် ဂွံဆဵုကေတ်တုဲ ဒဒှ်ဏံဝွံ အပ္ဍဲပရေၚ်ကောန်ဂကူမန် လက်သဏ်ခိုဟ်မွဲဟွံ သေၚ်ရောၚ် ညးချဳဒရာၚ် စပ်ကဵုတ္ၚဲကောန်ဂကူမန် ပ္ဍဲဒေသတအ် ဟီုအိုတ်ရ။

ညးချဳဒရာၚ်မွဲတၠ နာဲထာဝရ ဍုၚ်မုဟ်ဍုၚ်ဂှ် “တ္ၚဲကောန်ဂကူမန် ကၠောန်ၜါစၚ် ပ္ဍဲမယာန်ဂှ် စနူသၞာံအာဏံ၊ အရိုဟ်ဟ် လန်တှေ် အခိုက်ကွာန်ဂှ်တှေ် ညးတံကၠောန်မံၚ် ပ္ဍဲကဵုဖဠာတ်လ္ဒောဝ်ကွာန်တေံ မွဲဒၞဲါဓဝ်ရ၊ လၟုဟ် မ္ၚးကွာန်ဂှ် ဒှ်တိုန် မွဲစၚ်ပၠန်” သာ်ဝွံ ညးဟီုရ။

ပ္ဍဲမွဲကွာန်ဓဝ် ကိစ္စစၚ်တ္ၚဲကောန်ဂကူဒှ်ကၠုၚ်ၜါဗီုဏံဂှ် ဟိုတ်နူအသိၚ်ဗော်ပရေၚ်ဍုၚ်ကွာန်မန် ဒှ်ကၠုၚ်ၜါဗော်ဂှ်လေဝ် ပါဒၟံၚ်မွဲသာ်ကီုရောၚ် နာဲထာဝရဂှ် ဟီုပ္တိတ်လညာတ်ညးရ။

“ရဲဗော်ကောန်ဂကူတှေ် အာလ္ပာ်တေံ၊ ရဲဗော်ဒေသတှေ် ကၠုၚ်လ္ပာ်ဏံ လၟုဟ်အေဍေံဒှ် ကၠုၚ်ဗီုဂှ်” သာ်ဝွံ ညးဆက် ဟီုရ။

သ်အာၚ်နူကွာန်မယာန်ဂှ်ပၠန်မ္ဂး ပ္ဍဲကဵုကွာန်တာ၊ ကအ်ခပုၚ်တံလေဝ် စၚ်တ္ၚဲကောန်ဂကူမန် သွက်ဂွံကၠောန်ပ္တိုန်ၜါစၚ်နွံ ကီုရောၚ် နာဲကောန်ဆာန် ဟီုရ။

“ဒးဟီုကိစ္စဏံတှေ် လျိုၚ်ကောန်ဂကူဖ်အိုတ်ရ၊ စိုတ်ဂွံပါ်ဒ္ကးကၠုၚ်ဗီုဏံဂှ် ညးမွဲကဵုညးမွဲ စွံစိုတ်ဟွံတုပ်လေဝ်ပါမံၚ်၊ ဟီု အိုတ်တ်တှေ် မွဲကွာန်ဓဝ် ကၠောန်ၜါစၚ်၊ ၜါဒၞဲါဏံဂှ် ဍေံဒှ်ဟွံထေက်ရောၚ်” သာ်ဝွံ ညးဟီုရ။

တ္ၚဲကောန်ဂကူမန် မရနူက်ကဵု (၆၉) ဝါသၞာံဏံဝွံ က္ဆံၚ်ဗဟဵုဂှ် ကၠောန်အာပ္ဍဲဒေသတ္ကအ်ခၟိုၚ် ကွာန်ကလအ်တုဲ ပွိုၚ် ဍုၚ်မုဟ်ဍုၚ် နဒဒှ်က္ဆံၚ်ပွိုၚ်ဍုၚ်ဂှ် ကၠောန်အာပ္ဍဲကွာန်ဝၚ်ဒုန်ရောၚ် ဂွံတီကေတ်ရ။