ပ္ဍဲဂိတုဂျောန် (၁၁) ပယာံ တ္ၚဲစေၚ် ၜိုတ်ပိနာဍဳကဝက် (၃း၃၀) ပ္ဍဲကၠအ်ထ္ၜိုတ်မွဲ သမၠုၚ်ကျာကွာန်အၜဝ် (ပွိုၚ်ဍုၚ်ရေဝ် တွဵုရးဍုၚ်မန်) ဂှ် ၚာ်ဗြဴ အဝဲ (၉) သၞာံ ကွးဘာတန်မူလ ဒးဒုၚ်ပရံကာမကဵု နာဲမေန်ဥူ (က) အဗု အယုက် (၂၄) သၞာံ ဒၟံၚ်မွဲကွာန်ရ ဂွံတီကေတ်။
ကောန်ကွာန်အၜဝ် မိ—– သွက်ဂွံဂၠာဲက ဂဗကဵု နာဲမေန်ဥူ (က) အဗု ပ္ဍဲဂၠံၚ်တုဲ အဲဗိုၚ်ဂၠာဲကဵုကကီု လီကသေအ်ဏာတုဲ စိုပ်ကၠအ်ထ္ၜိုတ် ဒၞါဲမၞိဟ်သ္ၚိတ်ဇြဂှ် ရပ်သ္ပကောန်ဗြဴ ကုကောန်ၚာ်ဂှ်ရ ရဴဝွံ ဂွံတီကေတ် အတိုၚ်စၟတ်သမ္တီ ဗၠာဲသၟိၚ်ရ။
ပ္ဍဲတ္ၚဲဒှ်ပရူဂှ်ရ ဂရိပ်ပ္တိုန်ဏာၚာ်ဗြဴ ပ္ဍဲရုၚ်ဂဥုဲဍုၚ်ရေဝ်တုဲ ဒဵုတ္ၚဲဏအ် ဒုၚ်ဝဳဒၟံၚ်ပ္ဍဲရုၚ်ဂဥုဲဂှ်ဖိုဟ် ကောန်အၜဝ်မွဲတၠ ဟီုရ။
အတိုၚ်သၞောဝ်ဥပဒေ ညံၚ်ဂွံကေတ် အရေဝ်ကဵု နာဲမေန်ဥူ (အဗု) ဂှ် ပ္ဍဲဂိတုဂျောန် ၁၂ မိကောန်ၚာ်ဗြဴ ဂှ် အာတေၚ်ကဵု ရုၚ်ဗၠာဲသၟိၚ်ဍုၚ်ရေဝ်တုဲ ရပ်ထိၚ်လဝ် အဗု ရ။
စပ်ကဵုဒဒှ်ဏအ်တုဲ ကုအဗုဂှ် နူရုၚ်ဗၠာဲသၟိၚ်ရေဝ် ပံက်လဝ်အမှု နကဵုသၞောဝ် (ပ) ၉၀/၂၀၁၆၊ၝောံပိုဒ်-၃၇၆၊ လၟေၚ်ဂၞန် ဂဗုတ်ဇၞော် (၆/၂၀၁၆) ရ ဂွံတီကေတ်။
ဒဒှ်ဗီုဏအ်ကီု ပ္ဍဲပွိုၚ်ဍုၚ်ရေဝ်သမၠုၚ်ကျာ ကွာန်ပါၚ်မ္ၚဵုတေံဂှ်လေဝ် ပ္ဍဲဂိတုမာတ် ၂၂ ပယာံသဝ်တ္ၚဲ ၜိုတ် (၇) နာဍဳဂှ် ပွပရံကာမ ကုၚာ်ဗြဴ အဝဲ (၄) သၞာံမွဲတၠ က္တဵုဒှ်ကၠုၚ်ကီုရ။
စပ်ကဵုပရေၚ်ပရံကာမတုဲ ပ္ဍဲတွဵုရးမန်ဝွံ ပ္ဍဲသၞာံ ၂၀၁၄ ဂှ် က္တဵုဒှ် ၉၀ အမှုပြၚ်၊ ပ္ဍဲသၞာံ ၂၀၁၅ ဂှ် က္တဵုဒှ် (၁၀၀) အမှုပြၚ်တုဲ အပ္ဍဲဂှ်မ္ဂး အဝဲကောန်ၚာ် ဒးဒုၚ်ပရံကာမဂှ် က္တဵုဒှ်ဂၠိုၚ်အိုတ် ဂွံတီကေတ်ရ။
