ကဝးမိအာဲသြန် ကဵုလဝ်ယၟု “ပၟိက်အဲဗှေ်” ဂှ် ကြက်ကၠုၚ်စိုပ်ဂိတုက္ထိုန်ဏံမံက်မ္ဂး ညံၚ်ဂွံတြးပတိတ်မာန် ဂစာန်မံၚ် ဖိုဟ်ရောၚ် သာ်ဝွံ သ္ဂောံတီကေတ် နူညးမစဳဇန်ကဝး သၟာဒယှေ်ဒယှ် နဒဳ ဟီုလဝ်ဂှ်ရ။

ပ္ဍဲကဝး ‘ပၟိက်အဲဗှေ်’ ဝွံဂှ် ဒယှေ်ပၠောပ်လဝ်လၟိဟ်ဒွက် (၁၀) ပိုဒ်တုဲ ဒွက်တံဂှ်မ္ဂး နူကဵုအ္စာကၞေဟ် မန်ဆာန်မန်၊ ဗၠာဲမန်လွဳရတ်၊ ဝန်စဝ်၊ ပါရဂူဟံသာ၊ ဥပါဒါန်၊ Eco-တာရာ၊ ဗညာဃံၚ်သာဲ ကေုာံ ထဝ်အးတအ် ပါလုပ်ချူဇန် လဝ်ကဵုလဝ်ရ။

‘စဳဇန်လဝ်ကဝးဂှ်တှေ် သှေ်မံၚ်ဆ ပိုဲမၚ်မံၚ်ပံၚ်ရမျာၚ်ရ။ ပံၚ်ရမျာၚ်ဟွံတုဲဒှ်ဏီတှေ် ဟိုတ်ဂှ်ရ ဟွံဂွံပတိတ်ဏီကဝးဂှ် ချိၚ်လဝ်တှေ် ပတိတ်ဂိတုဝှ်လ္ပာ်အိုတ် ဆ္ဂးကာလဍေံဟွံတုဲတှေ် ကထိုန်မံက်တေံပၠန်လေဝ်’ သာ်ဝွံ နဒဳ ဟီုရ။

ကဝးဝွံ ဂွံဒှ်အထံက်အရီု သွက်သၟတ်ဍောတ်တ်မွဲကီု၊ အာဲသြန်ဂှ် ဒှ်မံၚ်ဗီုကွးမွဲကီုတုဲ ညံၚ်ဂွံပတိတ်အာ ကဝးပူဂဵု မွဲကဝးမာန်ကီုဂှ် မ္ဒးစဳဇန်ကၠောန်ပ္တိတ်ကဵုကဝးဝွံရောၚ် ညးဆက်ဟီုရ။

“အခက်ခုဲဂှ် ဂၠိုၚ်ဂၠိုၚ်ဟွံသေၚ်ပုဟ်လေဝ် အခက်အခုဲပ္ဍဲကဵုအာဲသြန်ရဂၠိုၚ်၊ ခက်ခုဲပ္ဍဲကဵုဒွက်ရ၊ စၟဳစလဝ်ဂှ်တှေ် ကဝးဏံ တိတ်တှေ် မိက်ဂွံကဵု မံက်ဂတဝ်အာ ပ္ဍဲကဵုပရိသာတ်တအ်ရ” သာ်ဝွံ ညးတၠရမျာၚ်ကဝး ‘ပၟိက်အဲဗှေ်’ အာဲသြန် လဴ ထ္ၜးရ။

သၟာဒယှေ်ဒွက်သၟတ်ဝုတ်မန် အာဲသြန်ဝွံ မဒှ်ဇာတိရဲကွာန်တံၚ်ဖလုတ်၊ ပွိုၚ်ဍုၚ်ဇြပ်ဗုတုဲ ပပ္တံနူကဵုသၞာံ (၂၀၀၈) တေံ စလုပ်ကၠုၚ် ဗွိုၚ်ဂဳတကၠာလေဝ် စိုပ်သၞာံ ၂၀၁၆ ဏံမှ သ္ဂောံဒှ်ပတိတ်ကဝး ညးမွဲဓဝ် နဒဒှ်အလန်ပထမရောၚ် ဂွံတီ ကေတ်ရ။

ပ္ဍဲကဵုဗွိုၚ်ကောန်ဂကူမန်ဂှ် ဂကောံဂဳတမန်၊ ဂကောံဇြဟတ်ဂဳတ (Power Music)၊ ရမျာၚ်ၜိုပ် (The Sheldrake)၊ Mon Music Band( MMB)၊ ဂဳတအနာဂတ်တံ နွံမံၚ်ကဵုဂကောံတုဲ သၟာဂဳတလ္ၚဵုဂှ် ဗွိုၚ်ညးကဵုညးကဵုဒှ် နဒဒှ်ပရေၚ်ပူဂဵုဒှ်ဒှ် ဒယှေ်မံၚ်ရောၚ် ဂွံတီကတ်ရ။