စပ်ကဵုကမၠောန်အလဵုအသဳ တွဵုရးဍုၚ်မန် ရေၚ်တၠုၚ်ကၠုၚ်လဝ်အပ္ဍဲပွိုၚ်မွဲသၞာံဂှ်တုဲ ပ္ဍဲဂိတုဂျောန် (၁) မံက် ကၠောန်သ္ပပေါဲသောၚ်က္လးလိက်ပရိုၚ် ပ္ဍဲၝောံခန်ဟံသာ၊ ရုၚ်အလဵုအသဳတွဵုရးမန်တုဲ ယဝ်ဟွံဒုၚ်တဲကဵုချးတၟံမ္ဂး ပရေၚ်ဇၞော်မောဝ် ဟွံမွဲ သ္ကိုပ်ဝန်ဇၞော်မန် သောၚ်ကၠုၚ်လဝ် သာ်ဂှ်ရ။
ရုၚ်စက်တိဗုတ်မတ်မလီု (MCL) စကာဒၟံၚ်ချးတၟံဂှ် အဇာချးတၟံဏံ အစဳဇန်သွက်ဂွံပြံၚ်စကာ ကၠေၚ်ပရက် တၞဟ်ဟ် နွံ/ဟွံမွဲ နူသၟာပရိုၚ် သၟာန်တဴသာ်ဏံတုဲ သ္ကိုပ်ဝန်ဇၞော် တွဵုရးဍုၚ်မန် သောၚ်ဏာ ဂလာန်ဂှ်ရ။
ဂိတုဂျောန် ၁ မံက်ဂှ် အလဵုအသဳတွဵုရးမန် သ္ပလဝ်ပေါဲသောၚ်က္လးလိက်ပရိုၚ် (MNA)
ဍုၚ်လဵုဟွံဟီု ဟွံစကာချးတၟံတှေ် ဟွံဇၞော်မောဝ်ပုဟ်၊ ပ္ဍဲဍုၚ်သေံလေဝ် စကာမံၚ် ချးတၟံရ၊ ပ္ဍဲဍုၚ်လောဲလောဲ အမေရိကာန်၊ ဂျပါန်တံလေဝ် ရုၚ်စက်ပ္တိတ်ဇြဟတ်ဓါတ်လလဳ နကဵုချးတၟံ နွံဗွဲမဂၠိုၚ်ဏောၚ် သ္ကိုပ်ဝန်ဇၞော် ဂးရ။
နာဲထေန်အံၚ်ဟာန် ဝန်ဇၞော်ဓါတ်လလဳကေုာံအစောံဇြဟတ် နူဂကောံအလဵုအသဳတွဵုရးမန်ဂှ်လေဝ် “ပ္ဍဲရုၚ်စက် MCL ဏံ သ္ပ Clean Coal တုဲ စကာချးတၟံမ္ဂး မုအန္တရာဲဟွံမွဲပုဟ် ပိုဲလ္ၚတ်ဂွံလဝ်ဗီုဂှ်” သာ်ဏံ ဟီုကၠုၚ်ကီုရ။
လၟုဟ်ဏံ ပ္ဍဲဍုၚ်ဗၟာ နူကဵု ဂေတ်သ် ပ္တိတ်ကေတ်လဝ် ဇြဟတ်ဓါတ်လဳ (၅၀) တၟံကၠံ နူဍာ်ဂှ် (၅၀) တၟံကၠံတုဲ အခါရစိုပ်က္ညၚ် ဟိုတ်နူဍာ်ကှ်ဇတ်စှေ်ကၠုၚ်တုဲ ဇြဟတ်ဓါတ်လလဳ ကၠုၚ်နူစက်ပၟတ် ဇြဟတ်ဍာ်ဂှ်လေဝ် စကာဟွံရုံဂပ်ရ၊ ဂေတ်သ်ပၠန်လေဝ် စိုပ်သၞာံ ၂၀၂၁ တေံမ္ဂး နူကဵုဗၞတ်ဗ္ၜတ် ကၠောန်မံၚ်လၟုဟ်ဏံ ဂွံစကာ ဆ ၂၀ တၟံကၠံဟေၚ်ရဏောၚ် နာဲထေန်အံၚ်ဟာန် ဂးရ။
လၟုဟ်ပ္ဍဲတွဵုရးမန်ဏံ ရုၚ်စက်တိဗုတ်မတ်မလီု (MCL) ဗဂေတ်ဒၟံၚ်နကဵုဓါတ်လလဳ နူကဵုချးတၟံဂှ်(၄၀) မဂ္ဂါဝတ်ရ။ ဆ္ဂး ပ္ဍဲလက်ထက်အလဵုအသဳ သမ္မတတိၚ်သိၚ်တေံ အလဵုအသဳကၟိန်ဍုၚ် ကဵု ကမ္ပဏဳ Toyo-thai တံ ထ္ပက်စၟတ်တဲ ပရေၚ်တုပ်စိုတ် (အဆံၚ် MOA) ပ္ဍဲသၞာံ ၂၀၁၅၊ ဂိတုအေဗရဴ (၉) ဂှ် ဂးလဝ်သွက်ဂွံပ္တိတ်ဇြဟတ်ဓါတ်လလဳ ဗၞတ် (၁၂၈၀) မဂ္ဂါဝတ်ကီုလေဝ် ဟိုတ်နူကေါန်ဒေသတံ ဒ္စဵုဒ္စးဒၟံၚ်ဖိုဟ်တုဲ ဟွံဒှ်စကာပေၚ်ၚ်ဏီရ။
