လိက်ဒုၚ်စဳရေၚ် ဒုတိယတြဴဂိတု သွက်သၞာံ ၂၀၁၆-၂၀၁၇ အလဵုအသဳတွဵုရးဍုၚ်မန် ပ္တိုန်ထ္ၜးလဝ် အကာဲအရာ နူဂိတုအံက်တဝ်ဗာ ဒဵုစိုပ်ဂိတုမာတ်ဂှ် ကေုာံအကာဲအရာဗလးတိဂှ်လေဝ် ဗၠေၚ်ဒၟံၚ်၊ ရံၚ်ကဵုဥပဒေအုပ်ဓုပ်ဍုၚ်ပၠန်လေဝ် အရာဟွံဗဗွဲ နွံတၟာဂလိုၚ်တုဲ ချူလိက်ဒုၚ်စဳရေၚ်မ္ဂး ချူညံၚ်ဂွံဇပ်ဍပ် ဇိပ်ဂၠိပ်ညိ ဒဝ်တန်အိ ဥက္ကဌကၠတ်ထဝ် တွဵုရးဍုၚ်မန် ဟီုကဵုသတိ ကုဂကောံအလဵုအသဳ တွဵုရးဍုၚ်မန်ရ။
“ပၟိက်အဲတှေ် ဂတနူဏံ လိက်ဒုၚ်စဳရေၚ် ဂကောံအလဵုအသဳ တွဵုရးဍုၚ်မန်ဂှ် အတိုၚ်ဒဒှ်ဍာံဍာံ မက္တဵုဒှ်ဒၟံၚ်ပ္ဍဲဗလးတိဂှ်ရ ဓမံက်ထ္ၜး ချိုတ်တ်ပၠိုတ်တ် ဇပ်ပ်ဍပ်ပ် သဗ္ဗအိုဿီုတုဲ လ္ပပသှေ် လ္ပကဵုယောၚ် ဒးပ္တိုန်ထ္ၜးပေၚ်ၚ်ဏောၚ်” သာ်ဏံ ဥက္ကဌ ကၠတ်ထဝ် တွဵုရးဍုၚ်မန် ဟီုရ။
ကောံဓရီုလၟေၚ်ဆဋ္ဌမ ကၠတ်ထဝ်တွဵုရးဍုၚ်မန်ု (ကၠတ်ထဝ်တွဵုရးမန်)
“ပ္ဍဲလိက်ဒုၚ်စဳရေၚ် ဒုတိယတြဴဂိတု သွက်သၞာံ ၂၀၁၆-၁၇ အလဵုအသဳတွဵုရးဍုၚ်မန် ပ္ဍဲကဏ္ဍဝါဗ္ၚဂှ် သြောံကသီု မွဲဨက သြောံတိတ် (၆၆) န ဓမံက်ထ္ၜးလဝ်သာ်ဂှ်တုဲ လၟိဟ်ဍေံတိတ်ဍာံဍာံဂှ် မွဲဨကတှေ် နွံအကြာ ၃၀ ကဵု ၅၀ နဏောၚ်” သာ်ဝွံ ညးစၞးတံ ထံက်ထ္ၜးကၠုၚ်ရ။
“ကိစ္စဏံ ကွေံကွေံဂှ် ဍေံဗၠေတ်ယောၚ်ကၠုၚ် ပ္ဍဲလၟိဟ်မဂၞန်ရ၊ ပိုဲသ္ၚဳဂၠိပ်ဂှ် အတိုၚ်ကဏ္ဍဝါဗ္ၚ အလုံမွဲတွဵုရး ဏောၚ်၊ ကဏ္ဍဝါဗ္ၚ ၃ ဂှ် ပိုဲက္လေၚ်ပံၚ်ထောံမ္ဂး လၟိဟ်မဂၞန်တံဂှ်ဗၠေတ်မံၚ်။ လၟိဟ်ကိုန်ဂၞန်ဂှ် ဗၠေတ်အာယျတှေ် GDP အလုံမွဲတွဵုရးဂှ်လေဝ် ဗၠေတ်အိုတ်ကီုဏောၚ်” သာ်ဝွံ ဒံက်တာ အံၚ်နာၚ်ဥူ ဒုဥက္ကဌ ကၠတ်ထဝ်တွဵုရးဍုၚ်မန် ဂးရ။
သၟာၚ်နူဂှ်ပၠန် ကမၠောန်ဂေါ်ဍိုတ် ပ္ဍဲဝါဗ္ၚ ပွိုၚ်ဍုၚ်သဓီုဂှ် ညံၚ်ဟဂွံဆက်ကၠောန် ဗဒေံါလဝ်တုဲကီုလေဝ် ဆက်ကၠောန်ဒၟံၚ် ကမၠောန်စံၚ်ဍိုတ်ဖိုဟ်၊ တုဲပၠန် ကတိကဝတ် နူကၠတ်ထဝ် သ္ပလဝ်ဒ္တန်တုဲဂှ်လေဝ် ဓမံက်ထ္ၜးလဝ်ဟွံမွဲရောၚ် ဒဝ်ခါၚ်ၚ်ဠေအ် ညးစၞးကၠတ်ထဝ်တွဵုရး နူဒေသမာဲစၟတ်(၁) ပွိုၚ်ဍုၚ်သဓီု ထံက်ထ္ၜးကၠုၚ်ရ။
“အလုံဖအိုတ်ဏံဂှ် ဒၟါနူဍိုန်လျအာဟာ၊ ဟွံသေၚ် ဗၠေတ်ယောၚ်အာဟာ ပိုဲဒးက္လေၚ်စၟဳစၟတ်ဏောၚ်။ လ္ၚဵုလ္ၚဵု ပ္ဍဲ ကာလတက်လိက်ဂှ် လ္ဆောဝ်ဝ်တှေ် လၟိဟ်မဂၞန်တံဂှ် သုည ဂၠိုၚ်တိုန်အာမွဲမဟာ၊ ဒေက်စှေ်အာ မွဲမဟာ ဒှ်စလေပ်ဒၟံၚ်တုဲ ဒှ်အန္တရာဲကွေံကွေံရ။ ဣဏံလေဝ် ဒးစၟဳစၟတ်အာပၠန်ဏောၚ်” သာ်ဝွံ ဥူထောန်ဌေ ဝန်ဇၞော်ပရေၚ်တဵုလွဳ ပရေၚ်လွဳလွတ် ကေုာံပရေၚ်ဆက်စၠောံပလံၚ်ဗ္စိုပ် နူဂကောံ အလဵုအသဳတွဵုရးဍုၚ်မန် ဟီုရ။
ညံၚ်ရဴလိက်ဒုၚ်စဳရေၚ်ဏံကီု လိက်ဒုၚ်စဳရေၚ် ပထမတြဴဂိတု သွက်သၞာံဘဏ္ဍာ ၂၀၁၆-၂၀၁၇ အလဵုအသဳတွဵုရးမန် လက်ထက်သ္ကိုပ်ဝန်ဇၞော်တြေံ ဥူမေန်မေန်ဥူတေံလေဝ် တၚ်နၚ်ဆောတ်ယောၚ် နွံဗွဲမဂၠိုၚ်ဏောၚ် ညးစၞးတံ ထံက်ထ္ၜးအိုတ်ရ၊ ဒၟါနူဂှ်ရ ဒးက္လေၚ်စၟဳစၟတ် ချူပ္တိုန်တၟိဏောၚ် ကၠတ်ထဝ်တွဵုရးမန်အလန်ဒုတိယ ကၠောန်ကၠုၚ်ကောံဓရီု လၟေၚ်စတုတ္ထ ပ္ဍဲသၞာံ ၂၀၁၆၊ ဂိတုဒဳဇြေမ်ဗာ ၁၄ တေံ ဖျေံကၠုၚ်သ္ဂုတ်သွာတ်ဂှ်လေဝ် ဂွံဆဵုကေတ်ကီုရ။
