နကဵုဂကောံပံၚ်ကောံပရေၚ်ဂကူမန်ဂှ် လ္တူပေဲါရုဲမာဲ (၂၀၂၅) ဏံ ထံက်ဂလာန်ကီု ဒစဵုဒစးကီုဂှ် မုဟွံပတိတ်လစွံစိုတ် မွဲသာ်ရောၚ် ညးကြပ်ကဵု ဂကောံကေၚ်ကာ ပံၚ်ကောံမွဲတၠ ဟီုလဴထ္ၜးရ။

ဒြဟတ်ဂကောံဂှ် ဗဒေါမ်ဒဵုသိန္နရာဇ်မာန် ညးတီ၊ အဲတီကီုလေဝ် နဇိုၚ်နတဲ ဂွံဗဒေါမ်ဒဵုသိန္နရာဇ်မာန်ဍာံဍာံဂှ် ဟွံလောဲလးလးရ။ တုပ်ပၟာသာ်ဂှ်ကီု ဒြဟတ်ပၠန်ဂတးဂမၠိုၚ်တအ် ပံၚ်ကောံ ဗတိုက်သရိုဟ်မာန်မှလေဝ် တၠအဝဵုပၞာန်ဏံ သရိုဟ်စှေ်အာမာန်ရ။

ဝေါဟာရပိုဒ်လိက်ပါဠိ မၞုံအဓိပ္ပါဲသာ်ဝွံ အဲဒးစိုတ်လောန်နူကဵုပိုဒ်လိက် ပ္ဍဲဘာသာမန် တၞဟ်ဟ်တအ်ဂှ်ရ ရုဲစှ်ကေတ်ဂလာန်ဝွံတုဲ မိက်ဂွံချူပတိုန်ထ္ၜးလညာတ်ရ။ လေပ်လိက်၊ လေပ်ဘာသာ၊ လေပ်ပညာတအ်ဂှ် မွဲကဵုမွဲ ကလိဂွံအဓိပ္ပါဲဟွံတုပ်ရောင် ပိုဲတအ် တီကေတ်အိုတ်ရ။ ပၞောဝ်ကဵုဝေါဟာရနာနာသာ်တအ်ဂှ် “တီ” မွဲမဝွံ အဓိပ္ပါဲဍေံဇြိုဟ်နက်လောန်ရ။ တီကေတ် ဗွဲအလဵုဇကု နူကဵုမကတ်လ္ၚတ်နင်မွဲအဆံင်ဂှ် ခိုဟ်အိုတ်မွဲ ဟီုမာန်ရ။

တၠကမၠောန်ရုၚ်ဂဒဵုထၜိုတ်ဍုၚ်မန်ဗွဲမဂၠိုၚ်ဂှ် ပြံၚ်ကၠောံကၠုၚ် ရုၚ်ကၠောန်ထၜိုတ်ဂတှ်ေ အဆံၚ်သၠုၚ်နွံဂၠိုၚ်ကၠုၚ်ကွေံကွေံရောၚ် တၠကမၠောန်ထၜိုတ်နူမုဟ်ဍုၚ်မွဲတၠ ဟီုထ္ၜးရ။

ပ္ဍဲကဵုမွဲဒမြိပ်ဒေသမန်သကုတ်သၠုၚ်ဂှ်ဝွံ ကေတ်ဂီုကၠီုထိၚ်ဒဝ်တိဍာ်ခိုၚ်တုဲမ္ဂး ကၠောန်အာ ပေါဲရုဲမာဲရောၚ် ညးက္ဍိုက်ပ်ဒပ်မၚ်ကၚ်ကွာန် ပါလုပ်ပ္ဍဲဂကောံကမ္မယှေန်ပေါဲရုဲမာဲ ဍုၚ်မန်မွဲတၠဂှ် ဟီုရ။

ဒဒန်ဆက်စၠောံၜဳဝၚ်ရော ပ္ဍဲကွာန်သၞေဟ်သြောံ၊ ပွိုၚ်ဍုၚ်လှာဒကှ်၊ မၞုံလ္တူဂၠံၚ်အဓိကအာကၠုၚ်ဒၟံၚ် ကျာ်ပိ-မုဟ်ဍုၚ်ဂှ် ဟိုတ်နူလအ်ကၠုၚ်ကဵုသၞာံအခါတုဲ ဆုဒဒန်ဂမၠိုၚ် အိုဟ်လီုလာ်ကၠုၚ်ဒၟံၚ်ဂှ်ရ နကဵုညးဒေသလှာဒကှ်တအ် စဳဇန်ကၠုၚ်သွက်ဂွံပလေဝ်အာဒဒန်နွံဂှ် ဂွံတီကေတ်ရ။

အခိင်ပေါဲရုဲမာဲ တၠအဝဵုအပၞာန်တံ ကၠောန်ဗဒှ်ဂှ် ကြပ်ကၠုင်ကွေံကွေံရ။ အတိုင်စရင် ကဝ်မယှေန်ပေါဲရုဲမာဲကၟိန်ဍုင် (UEC) ထမံက်ထ္ၜးလဝ်ဂှ်မ္ဂး ဗော်ပရေင်ဍုင်ကွာန် လုပ်ဗဗွဲသၞောဝ် နွံဒၟံင် ၆၀ ဗော်ပြင်ရ။ ဟိုတ်နူကဵုသၞောဝ်ဒၞက်လဝ် ဂြက်လောန်အာတုဲ ဗော်အဆံင်လုပ်ဒုင်ရုဲ အလုံကၟိန်ဍုင် အခေါင်ဒက်ပတန်ဗော် စှ်ေလဝ်တုဲတုဲ နွံ ၉ ဗော်ဂှ် ကလှ်တိတ်အာ ၃ ဗော် ကေုာံ ဗော်အဆံင်ရးဒေသဇၞော် ၁ ဗော် ပ္ဍဲသေတ်တေမ်ပါ ၉ ဂှ်ရောင် ဂွံတီကေတ်ရ။

အလုံတွဵုရးဍုၚ်မန် (၁၀) ပွိုၚ်ဍုၚ်ဂှ် ကၠောန်အာပေါဲရုဲမာဲရောၚ် ကမ္မယှေန်ပၞာန်တအ် ဟီုလလောၚ်လဝ်ကီုလေဝ် ပွိုၚ်ဍုၚ်လ္ၚဵု ဂွံကၠောန်မာန်ဂှ် ဒှ်ဟွံလောဲရောၚ် ညးဒေသ ပွိုၚ်ဍုၚ်ရေဝ်သၟဝ်ကျာမွဲတၠ ဟီုရ။

က္ဍိုပ်သ္ကိုပ်ဂၠးတိ ဗၞတ်ၜိုတ်ၜါစှော်ဍုင်တအ် တိုန်စိုပ်သ္ဘင်ကၞာ အိတ်သဳအိုဝ် (SCO) ပ္ဍဲဍုင်ကြုက်အိုတ်ရ။ ပ္ဍဲကဵုဂှ်ဝွံ ပရောသမ္မတရာတ်ရှာ နာဲပူတေန်၊ သ္ကိုပ်ဝန်ဇၞော်အိန္ဒိယ နာဲမိုဝ်ဒဳ၊ က္ဍိုပ်သ္ကိုပ် ကိုဝ်ရဳယျာသၟဝ်ကျာ နာဲကေန်ဂျုင်အာန်တအ်ဂှ် ဌာနပရိုင်မဳဒဳယျာ ဍုင်ပလိုတ်တအ် ချူဗၟံက်ဟီုလဝ်ဂၠိုင်ဂှ် လ္ၚတ်ကေတ်မာန်ရ။ အရာမဆေင်စပ်ကဵု ပရေင်ကူသာန်ဗၞိက်မ္ဂး ဗီုရုပ်က္ဍိုပ်သ္ကိုပ်အိန္ဒိယ၊ ကြုက်၊ ရာတ်ရှာ ပိဍုင်တအ် ဗဇဵုက္ဍိုပ် တက်မံင်ကျာဂှ် ဗၟံက်အိုတ်တုဲ စပ်ကဵုဂီုကၠီုဍုင်မ္ဂး ဗီုကြုက်၊ ရာတ်ရှာ၊ ကိုဝ်ရဳယျာသၟဝ်ကျာပိဍုင်တအ်ဂှ် ဗၟံက်ပတိတ်အိုတ်ရ။ ကရောံဂှ် ဗီုသမ္မတအမေရိကာန် ချူဗၟံက်ပါ်ပါဲလဝ် ညိညဂှ်လေဝ် ဗၟံက်လဝ်နွံကီုဂှ် ဂွံဗှ်ကေတ် ပ္ဍဲပရိုင်ဗဳဗဳဇြဳကီုရ၊ ဟိုတ်နူက္ဍိုပ်သ္ကိုပ် နူဍုင်ပလိုတ်တအ် မွဲတၠဟွံပါလုပ်ဂှ်တုဲ သ္ဘင်ကၞာ မစၟတ်သမ္တီ ကလိဂွံပေါဲအံင်ဇၞး ပ္ဍဲပၞာန်ဂၠးတိဒုတိယ ပေင် (၈၀) ဝါဂှ် တၟေင်ဒၟံင်ညိညကီု။ ဂကောံရှာန်ဟာဲဝွံ ဒှ်ဂကောံမပြိုင်ပ္ကာန်ကဵု ဂကောံမဟာမိတ်ပၞာန်နေတိုဝ်မွဲကီုရောင်ဂှ်လေဝ် ဟီုတဴညိညအိုတ်ကီုရ။