Tag: သၟဟ်သၟန်

ရုၚ်ကမၠောန်ဟဒမ်ဂံက် (သံလွၚ်အေး အအေးခန်းစက်ရုံ) စနူကဵုမၞိဟ်ယဲမွဲတၠဂှ် ဆက်စပ်ကၠောံထၞာန်အာ လၟိဟ်မၞိဟ် (၆၇) တၠရောၚ် ဂွံတီကေတ်ရ။

စနူကဵုဂိတုအံက်တဝ်ဗာ ၆ ဏံဂှ် ပ္ဍဲကဵုတွဵုရးဍုၚ်မန် ပွိုၚ်ဍုၚ်ရေဝ် ဗဒဲါဂၠံၚ်လုပ်ကွာန်ကလအ်ဂှ် ပံက်လဝ်သၞေဟ်ကၚ်တုဲ စမ်ၜတ်အာစၟယဲကဝ်ဝေဒ် သွက်ရဲဒဳကွဳစက်၊ ရဲဗက်သ္ကံကွဳစက်တံကီု ဂွံတီကေတ်ရ။

ပ္ဍဲကဵုအရာပ်ဏံဂှ် ပွိုၚ် (၁၄) တ္ၚဲဂှ် ဟွံဆဵုမၞိဟ်ယဲကဝ်ဝေဒ်ကီု နူကဵုမၞိဟ်ယဲအရာပ်ဏံဂှ်လေဝ် ဟွံဆက်ကၠောံထၞာန်အာကဵု ဗွဲဗွဝ်ကီု မၞိဟ်လုက်စုက်လဝ်ကဵုမၞိဟ်ယဲအရာပ်ဏံ တိုက်ရိုက်တံဂှ်လေဝ် ဟွံဆဵုစၟယဲဂှ်ရ အရာပ်ဏံဂှ် နူကဵုကၟာတ်လဒဵုလဝ်အခေါၚ်အာကၠုၚ် (Lockdown) ဂှ် ကဵုအခေါၚ်အာကၠုၚ်ယျရောၚ် ဂွံတီကေတ်ရ။

ပ္ဍဲကဵုပွိုၚ်ဍုၚ်မုဟ်ဍုၚ် ဍုၚ်ကၟာဝက် အရာပ်ဝါယာပ်ဂှ် ကၟာတ်လဒဵုထောံအခေါၚ်အာကၠုၚ် သ္ပထောံ (lockdown) တုဲ အရာပ်စိၚ်တံၚ်၊ ကၟာဝက်၊ ထံၚ်ကှ်ေ ကေုာံ ဘာဟနိ (ဂုံးညၚ်းတန်း) တံဂှ် ကဵုဒၟံၚ်အပ္ဍဲသ္ၚိ (Stay Home) ရောၚ် ဌာနပရေၚ်ထတ်ယုက်တွဵုရးဍုၚ်မန် လလောၚ်တြးလဝ်ရ။

ပ္ဍဲကဵုရုၚ်ဂဥုဲဇၞော် ဍုၚ်မတ်မလီု ဟဒမ်ပန်ထပ်တၟိ စကာမံၚ်ဒၞာဲလွဳလွတ်ယဲကဝ်ဝေဒ်လၟုဟ်ဝွံ မၞိဟ်ယဲ (၁၀၀) တၠဟေၚ် ဒၟံၚ်ဂွံမံၚ်တုဲ အကာဲအရာလၟုဟ်ဝွံ ဖန်ဖက်ပလေဝ်လဝ်ဒၞာဲတၟိ နွံမံၚ်ရောၚ် ဂကောံအလဵုအသဳတွဵုရးဍုၚ်မန် ဝန်ဇၞော်ပရေၚ်မၞိဟ် ဒံက်တာထုၚ်လေန် လလောၚ်တြးလဝ် ပ္ဍဲကဵုမုက်လိက်ပရေၚ်မၞိဟ်ရ။