ဗော်ကောန်ဂကူမန် စောဲလဝ်အမှု ကုကောန်ဗော်တြေံ ၃ တၠဂှ် ပ္ဍဲတ္ၚဲတိုန်ရုၚ်သၞောဝ်ဓဝ် အလန်ပထမ ဂိတုဂျောန် ၁ ဂှ် ရုၚ်သၞောဝ်ဓဝ်ပွိုၚ်ဍုၚ်ကျာ်မြဟ် ကဵုလဝ်တၚ်ဒုၚ်လျိုၚ်ရောၚ် ညးဗိုၚ်ရေၚ်တၠုၚ်ဂဗုတ် (ရှေ႕နေ) ဥူဇြဝ်ဝေန် ဂးရ။

“သွက်ညးဒးဒုၚ်စောဲအမှုပိတၠဏံ ပိုဲဂရၚ်ပ္တီ အာတ်မိက်လဝ် ပရေၚ်ဒုၚ်လျိုၚ်။ ရုၚ်သၞောဝ်ဓဝ်လေဝ် ညးမွဲမွဲ နကဵုၚုဟ် ၅ ကိုဋ် ကဵုဒုၚ်လဝ်လျိုၚ်ရ။ သွက်ဂွံတိုန်ရုၚ်မွဲအလန်ပၠန်ဂှ် ချိၚ်လဝ် ဂိတုဂျောန် ၁၅ တေံရောၚ်” (တရားလႊတ်တော် ရှေ႕နေ) ဥူဝေန်ဇြဝ် ဂးရ။

ခတဵုယၟုဗော် ဗော်ကောန်ဂကူမန် ပ္တိုန်လဝ်ပ္ဍဲကွာန်ဆုကၠ ပွိုၚ်ဍုၚ်ကျာ်မြဟ်ဂှ် ကောန်ဗော်တြေံ မိစန္ဒာနန်၊မိသုမန် ကေုာံနာဲညာဏ်တၟး တံ ၃ တၠ ဟိုတ်နူကၠောန်ကၠုၚ်လဝ် ပွသိက္ခာဗော်ဂွံစှေ်ဂှ်ရ မိက်ဂွံကဵုပရေၚ်ဒၠေါံဗ္တောန်တုဲ ဒးစောဲအမှုဏံဏောၚ် နာဲပါန်အံၚ် နူဂကောံရေၚ်တၠုၚ်ကေၚ်ကာဗဟဵု ဗော်ကောန်ဂကူမန် ဟီုရ။

“လ္တူပိုဲပ္တိုန်လဝ်ဂှ် တ္ၚဲဏံ စိုပ်ရုၚ်သၞောဝ်ဓဝ်ဣရတှေ် ပိုဲပတှေ်ရုၚ်သၞောဝ်ဓဝ်တုဲ လ္တူက္တဵုဒှ်ကၠုၚ်လဝ်တံဂှ် အတိုၚ်ရုၚ်သၞောဝ်ဓဝ် သ္ဂုတ်သွာတ်ဂှ်ရ ပိုဲဒုၚ်ကေတ်ကီုဏောၚ် အဲကီု ကမ္မတဳဗဟဵုတံကီု ဖျေံလဝ်သ္ဂုတ်သွာတ်တုဲမံၚ်ရ” နာဲပါန်အံၚ် ဂး။

ညးမွဲလ္ပာ်တေံပၠန်လေဝ် ပြဟ်ဟ်ဏံ နွံအဆံၚ်ဒးဒုၚ်စောဲအမှုဓဝ်ရတှေ် ပ္ဍဲပိုဲ အခေါၚ်သှ်ခၠေဝ် နွံမံၚ်ဏီဏောၚ်၊တုဲပၠန် ဒးဒုၚ်စောဲလဝ် နကဵုၝောံပိုဒ် ပိၝောံပိုဒ်ဂှ်လေဝ် အတိုၚ်သၞောဝ်ဥပဒေဂှ်ရ ပိုဲသောၚ်က္လးအာဏောၚ် ညးဒးဒုၚ်စောဲအမှု မိစန္ဒာနန် ဟီုကဵုဌာန်ပရိုၚ်မန်ရ။

ကုကောန်ဗော်တြေံ ၃ တၠဏံ ဗော်ကောန်ဂကူမန် စောဲလဝ်အမှု နကဵုရာဇသာတ်ဇၞော် ၝောံပိုဒ် ၅၀၀/၄၂၇/၁၁၄ (အမှုခ္ဍိုက်ဂရိုက်ဖျေံသိက္ခာ/ အမှုသ္ပလလေၚ်ဖဵု/ အမှုတက်က္ဍိုပ်ပ္တိတ်ကသပ်) ရောၚ်တုဲ ဒုဟ်နွံဍာံမ္ဂး ဒဏ်သ္ၚိစာတ် ဒဵုကဵု ၂ သၞာံ ကေုာံ သီုဒဏ်သြန်လေဝ် ဒးမာန်မံၚ်ကီုဏောၚ် ဂွံတီကေတ် နူတၠပညာသၞောဝ်ဥပဒေတံကီုရ။

ပ္ဍဲအခိၚ်တိုန်ရုၚ်(အမှု) အလန်ပထမဝွံ သၟာၚ်နူ ညးဒးဒုၚ်စောဲအမှုပိတၠဂှ်တုဲ မၞိဟ်တွဳဗွိုၚ် ( ညးဗိုၚ်ကဵုဇြဟတ်) ၜိုတ် ၁၀၀ တၠလေဝ် ကၠုၚ်စိုပ်ဒဵုကဵုရုၚ်သၞောဝ်ဓဝ် ကျာ်မြဟ်ကီုရဂှ် ဂွံဆဵုကေတ်ဗီု ပ္ဍဲ Facebook တေံကီုရ။