ရန်ကဵုသ္ဂောံဗပေၚ်ကပေါတ်အရပ်စပ်ဘာ ကေုာံ သွက်ဂွံပလေဝ်ဘာကောန်ဂကူမန် နွံပ္ဍဲတွဵုရးမန်ဂှ်တုဲ ညံၚ်ဂွံထံက်ပၚ် သြန် (၅၀၀) ကိုဋ်ဒကေဝ်ဂှ် ကၠတ်ထဝ်တွဵုရးမန် ပ္တိုန်ထ္ၜးကဵုအလဵုအသဳ တွဵုရးမန်ဏောၚ် ဂွံတီကေတ် နူကၠတ်ထဝ်တွဵုးမန်ကီုရ။
ပ္ဍဲသၞာံပရေၚ်ဘဏ္ဍာ ၂၀၁၈ ဏံ နူကဵုသြန်ဂအုံတွဵုရးမန် ဖန်လဝ်ပရေၚ်ထံက်ပၚ် ဆေၚ်ကဵုလိက်ပတ် ယေန်သၞာၚ်မန်ဂှ် သှေ်ဒၟံၚ် ၅၀၀ ကိုဋ်ဒကေဝ်ဏီတုဲ သြန်ဏံ ညံၚ်ဂွံထံက်ပၚ် ဘာပရေၚ်ပညာ ကောန်ဂကူမန်ဂှ် နူကၠတ်ထဝ် မွဲတဆံၚ် ပ္တိုန်ထ္ၜးလဝ် သာ်ဝွံ ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ် တွဵုရးမန် ဂးရ။
“နူဘာပရေၚ်ပညာမန်တေံ ပ္တိုန်ထ္ၜးနၚ် နကဵုလိက်၊ သွက်ဂွံ ဗပေၚ် ပလေဝ် ဘာညးတံဂှ် ညးတံ အာတ်မိက်ကၠုၚ် သြန် ၅၀၀ ကိုဋ်ဒကေဝ်” ဒံက်တာအံၚ်နာၚ်ဥူ ဂးရ။
ပ္ဍဲလိက်ပ္တိုန်ထ္ၜးဂှ် ဒံက်တာအံၚ်နာၚ်ဥူ ဒုဥက္ကဌကၠတ်ထဝ်တွဵုရး၊ အ္စာသဝ်ဟံၚ်ဍုၚ် ဝန်ဇၞော် ထိၚ်ဒဝ်သယံဇာတ ကေုာံသဘာဝပွဳပွူ၊ အ္စာသဝ်စောန်တၟး အမာတ်ကၠတ်ထဝ်တွဵုရး နူဒေသမာဲ လၟိဟ် (၁) ပွိုၚ်ဍုၚ်ရေဝ်တံ ထ္ပက်စၟတ်တဲတုဲ ပ္တိုန်ထ္ၜးလဝ် ဂွံတီကေတ်။
သၟာၚ်နူဂှ်ပၠန် သွက်ဂကောံအ္စာကၞေဟ်မန်ကီု၊ သွက်ဂွံပ္တိတ်လိက်အုပ်သဒ္ဒါမန်ကီုဂှ် နူသြန်ဂအုံ သှေ်ဒၟံၚ်ဏံရ ပါ်ပရအ်စကာအာဏောၚ် အ္စာသဝ်ဟံၚ်ဍုၚ် ဂးရ။
“အလဵုအသဳ တွဵုရးမန် ဒုၚ်တဲသ္ပကဵုဒ္တန်မာန်ဏောၚ် ထေၚ်၊ အကြာဏံ ကမၠောန် သှေ်မံၚ်တံလေဝ် နွံမံၚ်ဏီ၊ ကိစ္စဂကောံအ္စာကၞေဟ်မန်လေဝ်နွံ၊ မွဲပၠန်ဂှ် သွက်ဂွံပ္တိတ် လိက်သဒ္ဒါမန်လေဝ် နွံမံၚ်ဏီ၊ ဆ္ဂး သြန်ဂအုံဂှ် အောန်မံၚ်ဏောၚ်တှေ် ပြဟ်ဟ်ဏံ ပါ်ပရအ်တုဲ စကာအာဏောၚ်” ညးဆက်ဟီုရ။
တုဲပၠန် ဘာ ဒးက္လေၚ်ပလေဝ် မပ္တံ ပွမဒပ်ဒၞး၊ စဵုအဖိုၚ်ဘာ၊ စုတ်ကၟဳ တက်လှဖ္ဍာန်၊ပလေဝ်ပယျေဝ်၊ လးကၞဳခတဵု၊စုတ် တရၚ် ဗ္တၚ်တံဂှ် ပ္ဍဲပွိုၚ်ဍုၚ်ဇြပ်ဗု နွံ ၂ ဘာ၊ ပ္ဍဲပွိုၚ်ဍုၚ်မုဟ်ဍုၚ် နွံ ၂ ဘာ၊ ပ္ဍဲပွိုၚ်ဍုၚ်ရေဝ် နွံ ၃ ဘာရောၚ် ဂွံတီကေတ် နူကမ္မတဳပရေၚ်ပညာ မန်ရ။
သၞာံအာဏံလေဝ် သွက်ဘာမန် (၁၃၀) ဘာပြၚ်ဂှ် နူကၠတ်ထဝ်တွဵုရးမန် မွဲတဆံၚ် အာတ်ဂွံသြန်ထံက်ပၚ် နူအလဵုအသဳ တွဵုရးမန် (၈၀၀) ကိုဋ်ဒကေဝ် ကီုရဂှ်လေဝ် ဂွံဆဵုကေတ် ပ္ဍဲပရိုၚ်တံကီုရ။